«قازاگروقارجى» اق-ى وتكەن جىلدىڭ سوڭىندا 20 جىل تولعانىن اتاپ وتكەن ءجون. اتالمىش كومپانيا ۇكىمەت قاۋلىسىنا سايكەس 1999 جىلدىڭ 28 جەلتوقسانىندا «قازاگرو» ۇلتتىق باسقارۋشى حولدينگىنىڭ جانىنان قۇرىلدى. قر اۋىل شارۋاشىلىعى مينيسترلىگى كومپانيانىڭ جالعىز اكتسيونەرى بولىپ تابىلادى. كومپانيانىڭ نەگىزگى مىندەتى – شارۋالارعا قول جەتىمدى ليزينگتەر بەرۋ ارقىلى اۋىل شارۋاشىلىعى تەحنيكالارىن جاڭارتۋعا كومەك كورسەتۋ.
20 جىل ىشىندە اكتسيونەرلىك قوعام جالپى سومماسى 602 ملرد تەڭگەگە 49 مىڭعا جۋىق جاڭا اۋىل شارۋاشىلىعى تەحنيكاسىن ساتىپ الۋدى قارجىلاندىردى.
بۇگىندە «قازاگروقارجى» اق اگروونەركاسىپتىك كەشەنى ءۇشىن بەرىلەتىن ليزينگ نارىعىندا ۇلتتىق كوشباسشى بولىپ تابىلادى. بۇل باعىتتاعى ونىڭ ۇلەسى 90%-دى قۇرايدى.
وتكەن جىلى كومپانيا اۋىل شارۋاشىلىعى تاۋارلارىن وندىرۋشىلەرگە ليزينگكە 5 893 بىرلىك جاڭا اۋىل شارۋاشىلىعى تەحنيكاسىن بەردى. بۇل 2018 جىلعا قاراعاندا 72%-عا ارتىق. اتاپ ايتقاندا, فەرمەرلەر جەڭىلدەتىلگەن شارتتارمەن جالپى سومماسى 99 ملرد تەڭگەگە 540 كومباين, 1 713 تراكتور, 416 تۇقىم سەپكىش, 143 ەگىس كەشەنىن جانە 3 081 بىرلىك باسقا دا تەحنيكا ساتىپ الدى.
ەستەرىڭىزگە سالساق, «قازاگروقارجى» اق جىلدىق پايىزى 17% جانە 9%-دى قۇرايتىن قارجىلاندىرۋدى ۇسىنادى. بۇل رەتتە, جىلدىق پايىزى 17% مولشەرلەمەنىڭ مەملەكەت 10 پايىزىن سۋبسيديالايدى, ياعني اگراريالار 7%-دى قۇرايدى. ءوز كەزەگىندە, 9 پايىز سۋبسيديالانبايدى.
تەحنيكانىڭ قۇنى مەن تۇرىنە بايلانىستى قارجىلاندىرۋ مەرزىمى 5 جىلدان 10 جىلعا دەيىن, باستاپقى جارنا – 15%-دان 20%-عا دەيىن, ال كەيبىر ارنايى باعدارلامالار بويىنشا - 0-دەن 10%-دى قۇرايدى.
بۇل رەتتە ليزينگ الۋشى العاشقى تولەمدى ءوز قاراجاتى ەسەبىنەن نەمەسە ينۆەستسۋبسيديا ەسەبىنەن تولەنەدى. بىراق, شارۋالاردىڭ ينۆەستيتسيالىق سالىمنىڭ ءبىر بولىگى مەملەكەتتىك سۋبسيديا ارقىلى وتەلەدى.
