سەناتور كوكشەتاۋ قالاسىنداعى بىرقاتار ءبىلىم بەرۋ نىسانىن ارالاپ, وقىتۋشىلارمەن, وقۋشىلارمەن جانە ستۋدەنتتەرمەن كەزدەستى. دەپۋتات بولعان وقۋ ورىندارىنىڭ ىشىندە ش.ءۋاليحانوۆ اتىنداعى كوكشەتاۋ مەملەكەتتىك ۋنيۆەرسيتەتى, ا.مىرزاحمەتوۆ اتىنداعى كوكشەتاۋ ۋنيۆەرسيتەتى, ششۋچينسك قالاسىنداعى جوعارى تەحنيكالىق كوللەدج, جوعارى پەداگوگيكالىق كوللەدج, №2 ورتا مەكتەپ, سونداي-اق اقىلباي اۋىلىنداعى شاعىن جيناقتى مەكتەپ بار.
كەزدەسۋلەردە «پەداگوگ مارتەبەسى تۋرالى» زاڭ مەن قازاقستان رەسپۋبليكاسىنىڭ 2020-2025 جىلدارعا ارنالعان ءبىلىم بەرۋ مەن عىلىمدى دامىتۋدىڭ مەملەكەتتىك باعدارلاماسىنىڭ ەرەجەلەرى جان-جاقتى ءتۇسىندىرىلدى.
دەپۋتات جاڭا زاڭداعى ادەپكە قاتىستى جانە باسقا دا قۇقىقتىق, الەۋمەتتىك كەپىلدىكتەر تۋرالى ەرەجەلەر تۋرالى ايتا كەلىپ, پەداگوگتاردىڭ ءوز قىزمەتىنە ادالدىعى بارىنەن دە جوعارى ەكەنىن ەرەكشە اتاپ ءوتتى.
ب.جۇماعۇلوۆ بۋراباي اۋدانىنىڭ جۇمىسپەن قامتۋ جانە حالىققا قىزمەت كورسەتۋ ورتالىعىندا دا بولدى. سەناتور اتاۋلى الەۋمەتتىك كومەك الۋعا ءوتىنىش بىلدىرگەن ازاماتتارمەن اڭگىمەلەسىپ, الەۋمەتتىك قولداۋ الۋعا بايلانىستى كورسەتىلەتىن قىزمەتتەردىڭ قۇجاتتارىن قابىلداۋ, تاپسىرۋ راسىمدەرىمەن تانىستى.
