ال مۋزەيگە كىرەبەرىستە ءسىزدى مۇز داۋىرىندە تىرشىلىك ەتكەن مامونتتىڭ كوشىرمە الىپ قاڭقاسى قارسى الادى.
ارحەولوگيالىق ەكسپوناتتاردىڭ كوبى شىنايى, كونە زامانداعى بيزون مەن بۇعىنىڭ قاڭقاسى دا كەلۋشىلەردى تاڭعالدىرادى.
مۋزەي زالدارىنداعى شىنايى ارحەولوگيالىق جانە تابيعي ەكسپوناتتار زاماناۋي مۋلتيمەديالىق تەحنولوگيالار ارقىلى ەرەكشە اسەر بەرەدى.
مۇندا 9 ەكسپوزيتسيالىق زال, رەستاۆراتسيالىق زەرتحانا, «Gloss Vision» اتتى ۆيرتۋالدى كيىم ولشەۋ الاڭى, جەرلەس عالىمدارعا ارنالعان بولىمدەر بار. ەلەكتروندى-تسيفرلى ۇلگىدەگى تاريحي اقپاراتتار ءۇش تىلدە بەرىلگەن.
بۇدان ءارى قاراي ارالاپ ءجۇرىپ, مۇز ءداۋىرىنىڭ لاندشافتى, كەرەكۋ ءوڭىرىنىڭ تابيعي باي فلوراسى مەن فاۋناسىنىڭ ەۆوليۋتسياسى, «قازقوناق» تابيعي ەسكەرتكىشىن مەكەن ەتكەن ءتۇرلى قۇستىڭ جاساندى ءتۇرىن كورەسىز.
كەلۋشىلەردى كوپتەگەن ينستاللياتسيا – ۇلكەن ءمۇيىزدى بۇعى سۇيەكتەرى, مامونتتار, بيزوندار, تاريح, گەولوگيا, ارحەولوگيا بويىنشا ءارتۇرلى ءداۋىردىڭ زاتتارى قىزىقتىرادى.
ايتپاقشى, وڭىردە جۇمىس ساپارىندا جۇرگەن ءماجىلىس دەپۋتاتتارى ايزادا قۇرمانوۆا, ايگۇل نۇركينا دا مۋزەيدى ارالاپ شىعىپ, تاڭعالىپتى.
مۋزەي ديرەكتورى گۇلنار نۇراحمەتوۆانىڭ ايتۋىنشا, مۋزەيدى قۇرۋ ءۇشىن الەمنىڭ تاريحي-جاراتىلىستانۋ مۋزەيلەرىنىڭ ۇلگىسىن پايدالانعان. رەسەيدەگى جاڭاشىلدىقتارمەن تانىسىپ, جەرگىلىكتى عالىمدار پىكىرلەرىن تىڭداعان. قازىر 300-دەن اسا ەكسپونات ساقتاۋلى.
جاڭا مۋزەي جالپى, ەجەلگى دۇنيە تاريحى, كوشپەلىلەر وركەنيەتى, ەتنوگرافيالىق باعىتتا قۇرىلعان. كونە جادىگەرلەر مەن مۋلتيمەديالىق كونتەنت زاماناۋي مۋزەيلىك كەشەندى جاساۋعا مۇمكىندىك بەردى.
مىسالى, كوشپەلىلەر وركەنيەتى ينتەراكتيۆتى الاڭ رەتىندە جاسالعان. بۇل جەردە اركىم ەجەلگى ادامعا اينالىپ, ىدىس نەمەسە ءۇي جيھازىن جاساپ, قولا نەمەسە تەمىردەن جەبەنىڭ ۇشىن قۇيىپ كورۋى مۇمكىن.
مۋزەي ەرتىس وزەنى جاعالاۋىندا ورنالاسقان, رۋحاني نىساننىڭ اشىلۋىنا وبلىس اكىمدىگى باستاما جاساسا, ERG كومپانياسى دەمەۋشىلىك كورسەتتى.
پاۆلودار
