قازاقستان • 13 قاڭتار، 2020

قازاقستاندا 2019 جىلى 13،1 ملن شارشى مەتر باسپانا پايدالانۋعا بەرىلدى

17 رەتكورسەتىلدى

حالىق ءۇشىن تۇرعىن ءۇيدىڭ قولجەتىمدىلىگىن قامتاماسىز ەتۋدى ماقسات ەتەتىن «نۇرلى جەر» مەملەكەتتىك باعدارلاماسى اياسىندا 2019 جىلدىڭ قورىتىندىسىندا رەسپۋبليكا بويىنشا بارلىعى 13،1 ملن شارشى مەتر باسپانا پايدالانۋعا بەرىلدى. بۇل دەگەنىمىز 115 800 پاتەر. 2018 جىلمەن سالىستىرعاندا اتالعان كورسەتكىش 104،9% قۇرايدى. بۇل تۋرالى يندۋستريا جانە ينفراقۇرىلىمدىق دامۋ مينيسترلىگىنىڭ ءباسپاسوز قىزمەتى حابارلادى.

ەندى ءبارىن تارقاتىپ ايتساق. وتكەن جىلدىڭ 12 ايى ىشىندە ساتىپ الۋ قۇقىعىنسىز 14،5 مىڭ جالعا بەرىلەتىن پاتەر سالىندى. ونىڭ ىشىندە 6 266 پاتەر الەۋمەتتىك جاعىنان از قامتىلعان ازاماتتارعا بەرىلدى. وڭىرلەر اراسىندا بۇل تۇرعىدان تۇركىستان (1532 پاتەر)، اتىراۋ (600 پاتەر) جانە قىزىلوردا (521 پاتەر) وبلىستارى الدا كەلەدى. 5 597 پاتەر كوپ بالالى وتباسىلاردىڭ يگىلىگىنە بەرىلدى. تۇركىستان وبلىسى (841 پاتەر) بۇل جاعىنان دا كوش باسىندا. ودان كەيىنگى ورىنداردا الماتى وبلىسى (686 پاتەر) جانە نۇر-سۇلتان قالاسى (549 پاتەر) تۇر. سونداي-اق، ساتىپ الۋ قۇقىعىنسىز بەرىلەتىن پاتەرلەرگە جاستار دا يە بولدى. ونىڭ ىشىندە نۇر-سۇلتان قالاسىندا 1050 پاتەر، شىمكەنتتە 904 پاتەر جانە الماتى قالاسىندا 576 پاتەر كىلتى جۇمىس ىستەيتىن جاستارعا تابىس ەتىلدى.

سونداي-اق، جەرگىلىكتى اتقارۋشى ورگاندار 10 600 پاتەر، «سامۇرىق-قازىنا جىلجىمايتىن م ۇلىك قورى» اق قارجىلاندىرۋى ەسەبىنەن 643 پاتەر، جەكە سالۋشىلار ەسەبىنەن 2 748 پاتەر سالىندى.

وسى ورايدا 2018 جىلى قازاقستاندا 12،5 ملن شارشى مەتر باسپانا پايدالانۋعا بەرىلگەنىن ايتا كەتۋ كەرەك. ياعني، ەلىمىزدىڭ ءار تۇرعىنىنا 0،68 شارشى مەتردەن كەلگەن. بۇل - تمد ەلدەرى بويىنشا ەڭ جوعارى كورسەتكىش. سالىستىرمالى تۇردە ايتساق، رەسەيدە اتالعان كورسەتكىش ءار تۇرعىنعا 0،54 شارشى مەتر، بەلارۋستا - 0،40 شارشى مەتر، وزبەكستاندا - 0،36 شارشى مەتردەن كەلەدى. جالپى، قازاقستاندا باسپانامەن قامتاماسىز ەتۋ تۇرعىسىنان ءبىر تۇرعىنعا 21،9 شارشى مەتردەن كەلەدى. ەندىگى ماقسات - 2030 جىلعا دەيىن بۇل كورسەتكىشتى 30 شارشى مەترگە جەتكىزۋ.

ەلىمىزدە تۇرعىن ءۇي قۇرىلىسى سالاسىنداعى جۇمىستار ەندى 2020-2025 جىلدارعا ارنالعان «نۇرلى جەر» جاڭا مەملەكەتتىك باعدارلاماسى اياسىندا جالعاسىن تابادى. تۇرعىن ءۇي-كوممۋنالدىق سالانى دامىتۋعا ارنالعان بۇل باعدارلاما ەلباسى ن.ءا.نازارباەۆتىڭ ستراتەگيالىق باستامالارى مەن مەملەكەت باسشىسى ق.ك.توقاەۆتىڭ تاپسىرمالارىن ىسكە اسىرۋ اياسىندا ازىرلەنىپ، 2019 جىلدىڭ جەلتوقسان ايىندا قابىلداندى.        

جاڭا باعدارلامادا تۇرعىن ءۇي قۇرىلىسى، ازاماتتاردى باسپانامەن قامتاماسىز ەتۋ، تۇرعىن ءۇي كوممۋنالدىق شارۋاشىلىق جۇيەسىن دامىتۋ سالاسىنداعى مەملەكەتتىك قولداۋدىڭ بارلىق شارالارى ۇيلەستىرىلگەن. باستى ماقساتى – قازاقستاندا باسپانانىڭ قولجەتىمدىلىگى مەن جايلىلىعىن ارتتىرىپ، تۇرعىن ءۇي ينفراقۇرىلىمىن دامىتۋ.

سوڭعى جاڭالىقتار

جۇزدەگەن تۇرعىنعا جۇمىس تابىلدى

ايماقتار • بۇگىن، 12:44

اۋىلدا سپورت كەشەنى سالىنۋدا

ايماقتار • بۇگىن، 09:28

ۇقساس جاڭالىقتار