ويتكەنى, مال بارىمتالاۋ ايماقتارداعى بەلەڭ العان قىلمىس تۇرىنە اينالعانى انىق ەدى. ەندى جازانىڭ كۇشەيتىلۋى بۇل باسسىزدىققا توسقاۋىل بولىپ, وڭىردەگى جۇرت قوراسىنداعى ۋاق جاندىق پەن تۇياقتى مالى ءۇشىن الاڭدامايتىن زامان تۋماق. ال ازىرگە الماتى وبلىسىندا دا ءتورت ت ۇلىككە توسىننان تيگەن ۇرى-قارىنىڭ جىمىسقى ارەكەتى ازايماي تۇر. ءتارتىپ ساقشىلارىنىڭ قىلمىسپەن كۇرەسى ناتيجەسىز ەمەس. بىراق جازانىڭ السىزدىگى بۇل بەلدەسۋدە تەڭسىزدىككە ۇشىراپ تۇرعانىن جاسىرۋعا بولمايدى. ال كۇرەس جالعاسا بەرەدى. وتكەن جىلى دا بارىمتاشىلاردى قۇرىقتاۋ ءىسى جەمىسسىز اياقتالعان جوق. مىسالعا, ايماق پوليتسەيلەرى مال ۇرلىعىنا قاتىستى 680 قىلمىستىڭ ءىزىن سۋىتپاي اشتى. جەدەل ىزدەستىرۋ مەن انىقتاۋدىڭ ناتيجەسىندە ۇرلانعان 900 باس ءىرى قارا مالى مەنشىك يەلەرىنە قايتارىلعان. سونداي جاعدايدىڭ ءبىرى الاكول اۋدانىنىڭ «قازاقستان» اۋىلىندا بولدى. 16 جەلتوقسان كۇنى اۋىل تۇرعىنىنىڭ قوراسىنان اسىل تۇقىمدى 9 باس سيىر ۇرلانعان. مال يەسىنىڭ ءوز بەتىنشە ىزدەگەن ارەكەتىنەن تۇك ونبەي, پوليتسياعا شاعىمدانىپتى. الاكول اۋدانىنىڭ پوليتسەيلەرى ءبىر اپتا بويى ءىز كەسىپ, ۇرىنىڭ الىسقا ۇزاماعانىن انىقتاپتى. ءۇشارال قالاسىنىڭ 2 تۇرعىنى كۇدىككە ءىلىندى. بۇرىن دا مال ۇرلاپ سوتتالعان باۋكەسپە باستاپقىدا بۇلتارعانىمەن, ارتىنان كىناسىن مويىنداپتى. ولار ۇرلانعان مالدىڭ ءبىرازىن ساتىپ تا ۇلگەرىپتى. 2 باس سيىردى سويىپ, بازارعا ساۋدالاعان ەكەن. مالدىڭ قۇنى 2 ملن تەڭگەگە باعالاندى. بۇيىرعان 7 باس سيىردى مال يەسىنە قايتارعان پوليتسەيلەرگە اۋىل تۇرعىندارى ءدان ريزا.
جالپى, اۋىل ادامدارى قوراداعى مالىن عانا ەمەس, ۇيىندەگى باعالى زاتتارىنىڭ دا ۇرى-قارىعا جەم بولعانىنا نارازى. ويتكەنى ايماقتاردا ءۇي توناۋ قىلمىسى دا ءورشىپ تۇر. ارينە ءتارتىپ ساقشىلارىنىڭ جۇمىسىن جوققا شىعارۋعا بولمايدى. بىراق ۇرلىقتىڭ جولىن كەسۋ ءۇشىن جازانىڭ كۇشەيتىلۋى جۇگەنسىز كەتكەندەرگە ساباق بولۋى ىقتيمال. ال پوليتسيانىڭ ارەكەتسىز وتىرماعاندىعىنا بىرنەشە مىسال كەلتىرەيىك. جاقىندا الماتى وبلىسىنىڭ جامبىل اۋدانى اۋماعىندا تۇرعىن ۇيلەردى توناپ, وڭاي ولجاعا مولىنان كەنەلىپ جۇرگەن قىلمىسكەر توبى قولعا ءتۇستى. پوليتسيانىڭ ارنايى وپەراتسياسى كەزىندە ۇستالعان ۇرىلار 2 ايدا 16 ءۇيدى توناعان.
– ۇيىمداسقان ۇرىلاردىڭ توبىندا 4 ادام بولعان. ولار جامبىل اۋدانىنىڭ قارعالى, ۇزىناعاش, قاينازار اۋىلدارىندا ءۇي توناۋمەن اينالىسقان. نەگىزىنەن اۋقاتتى ۇيلەردى تورۋىلداپ, اقشا, زەرگەرلىك بۇيىمدار مەن تۇرمىستىق تەحنيكانى ۇپتەپ كەتىپ وتىرعان. قازىر ۇستالعانداردىڭ 16 ۇرلىق وقيعاسىنا قاتىسى بارى انىقتالدى. ۇرىلار قاماۋعا الىندى, – دەيدى وبلىستىق پوليتسيا دەپارتامەنتى ءباسپاسوز قىزمەتىنىڭ وكىلى سەرىك ۇپيەۆ.
سونداي-اق تالعار اۋدانىنىڭ پوليتسەيلەرى 2 جىل بويى ۇستاتپاي جۇرگەن ۇرىنى قۇرىقتادى. 45 جاستاعى «اككى ۇرى» تالعار, ىلە اۋدانى اۋماعىندا ءۇي توناۋمەن اينالىسىپ كەلگەن ەكەن. قىلمىسكەردى ۇستاۋعا ءتارتىپ ساقشىلارىنا «جاڭا قۋات» كوتتەدجدى قالاشىعىنىڭ تۇرعىندارى جاردەمدەسكەن. كۇدىكتىنىڭ ۇرلىق, توناۋعا قاتىستى 28 وقيعاعا قاتىسى بارى دالەلدەنىپتى.
ايتپاقشى, قوعامدىق قاۋىپسىزدىك ماسەلەسىن ءسوز ەتكەندە تۇرعىندار اراسىندا زاڭسىز قارۋ ساقتايتىندار قاتارى ازايماي وتىرعانىن دا ايتۋعا ءتيىسپىز. ءتىپتى اۋىلداردا زاڭسىز قارۋ مەن ەسىرتكى زاتىن يمەنبەي الىپ جۇرەتىندەر كوبەيگەن.
بىرەر مىسال. جاقىندا الماتى وبلىستىق پوليتسيا دەپارتامەنتى ەسىرتكىگە قارسى كۇرەس باسقارماسىنىڭ جەدەل ۋاكىلدەرى مەن كوكسۋ اۋداندىق پوليتسيا قىزمەتكەرلەرى قارتال اۋىلىنىڭ تۇرعىنىن ۇستاعان. 25 جاستاعى ازامات ۇزاق ۋاقىت بويىنا ەسىرتكى ساۋداسىمەن اينالىسقان ەكەن. ءتىنتۋ ناتيجەسىندە تۇرعىننىڭ ۇيىنەن 33 گرامم ماريحۋانا جانە وتقارۋ مەن وق-ءدارى تابىلدى. اڭشى قارۋىنىڭ ەسەپتىك ءنومىرى قولمەن وشىرىلگەن. ءۇي يەسى قارۋدى جانە ەلۋدەن استام وقتى مۇزداتقىشقا مۇقيات وراپ جاسىرىپتى. سۇراق-جاۋاپ كەزىندە قارۋدى قايدان العانىن تۇسىندىرە الماعان. سونداي-اق تالدىقورعان قالاسىنداعى پوليتسيا ءپاترۋلى كۇدىكتى كورىنگەن كولىكتى توقتاتىپ, تەكسەرۋ كەزىندە وتقارۋ تاپتى. «BMB» كولىگىن تىزگىندەگەن 19 جاستاعى جىگىت 16 كاليبرلى مىلتىق پەن گاز پيستولەتىنىڭ رۇحسات قاعازىن كورسەتە الماعان. تەكسەرۋ كەزىندە بۇل قارۋ-جاراقتىڭ دا تىركەۋ ءنومىرى قولدان وشىرىلگەنى انىقتالدى.
جالپى, وبلىس پوليتسەيلەرى 2019 جىلى ساتىپ الىنعان, تاركىلەنگەن 157 اتىس قارۋى مەن 615 دانا وقتى زالاسىزداندىرىپتى. جويىلعان وتقارۋدىڭ دەنىن تۇرعىندار ءوز ەركىمەن قۇقىق قورعاۋ ورگاندارىنا اكەلىپ تاپسىرعان. بىلتىر 97 ادام ەسكى قارۋ-جاراق پەن وق-ءدارى وتكىزىپ, ولارعا سىياقى رەتىندە 6,5 ملن تەڭگە بيۋدجەت قارجىسى جۇمسالعان ەكەن.
الماتى وبلىسى
