رەسمي قوناقتارعا «Zhersu» ينۆەستيتسيالىق-وندىرىستىك كورپوراتسياسى باقىلاۋ كەڭەسىنىڭ توراعاسى باۋىرجان وسپانوۆ الدىمەن ارقارلى اۋىلدىق وكرۋگى اۋماعىنداعى «الاكول اسىل جىلقىسى» جشس-نىڭ جىلقى فەرماسىن كورسەتتى. ونىڭ ايتۋىنشا, وتكەن جىلدىڭ قاراشاسىندا ىسكە قوسىلعان جىلقى تۇقىمىن اسىلداندىرۋ ماقساتىنداعى بۇل شارۋاشىلىققا 1 ملرد. تەڭگەگە جۋىق ينۆەستيتسيا سالىنعان. جوبانىڭ قازىرگى ءبىرىنشى كەزەڭىندە مۇندا 10 مىڭ باس جىلقى اكەلىنىپ, باعىلىپ وتىر. ولار نەگىزىنەن رەسەيدەن جانە ەلىمىزدىڭ ماڭعىستاۋ, قاراعاندى, شىعىس قازاقستان وبلىستارىنان اكەلىنگەن. رەسەيدىڭ التاي, بارناۋىل وڭىرلەرىنىڭ قىسى قاتال, جازى جايلى تابيعاتىنىڭ الاكول كليماتىنا ۇقساستىعى سىرتتان اكەلىنگەن جىلقىلاردى جەرسىندىرۋدە ەشقانداي قيىندىقتىڭ تۋىنداماۋىنا زور ىقپال ەتكەن. ال جوبانىڭ ەكىنشى كەزەڭىندە اسىل تۇقىمدى جىلقىنىڭ سانىن 20 مىڭ باسقا جەتكىزۋ جوسپارلانىپ وتىر. ولاردىڭ بارلىعى دا نەگىزىنەن ەت پەن ءسۇت باعىتىن وركەندەتۋگە باعىتتالماق. فەرماداعى مال باعۋ JPS-ءتىڭ كومەگىمەن الدەقايدا جەڭىلدەتىلگەن. قازىرگى كەزدە مۇندا تۇيە ءوسىرۋ دە قولعا الىنعان.
بۇگىنگى كۇنى مۇندا 56 ادام جۇمىس ىستەيدى. بۇل فەرمادا جۇمىسشىلارعا بارلىق جاعدايلار جاسالعان. ولار ءۇشىن جاتاقحانا سالىنىپ, ارنايى تۇرعىن ۇيلەر دە پايدالانۋعا بەرىلگەن. ءتىپتى كينوتەاتر مەن كىتاپحانا دا جۇمىس ىستەپ تۇر. بالالار وينايتىن الاڭ جاسالىپ, اسحاناسىندا جۇمىسشىلارعا تەگىن تاماق ۇيىمداستىرىلعان. وسىنىڭ ءبارى شارۋاشىلىقتاعى مامانداردىڭ وزىنە جۇكتەلگەن مىندەتتەرىن جاۋاپكەرشىلىكپەن, ساپالى ورىنداۋلارىنا مۇمكىندىك بەرىپ وتىر.
مۇنان سوڭ رەسمي قوناقتار كورپوراتسيانىڭ بۇدىر اۋىلىندا ورنالاسقان «قايىڭدى» جشس-نىڭ مال بورداقىلاۋ الاڭى مەن ەت وڭدەۋ زاۋىتىنا اتباسىن بۇرىپ, تسەحتارىن ارالاپ كوردى.
سەرىكتەستىكتىڭ ۇيەستىرۋشىسى اسقار مۇقاشەۆتىڭ ايتۋىنا قاراعاندا, مۇنداعى مال بورداقىلاۋ الاڭى 5 مىڭ باس ءىرى قارا سەمىرتۋگە ارنالعان. قازىر گەرەفورد جانە انگۋس تۇقىمدى 4500 باس بار, ىسكە قوسىلعالى 500 باس ءىرى قارا سويىلعان. زاۋىتتىڭ مال سويۋ تسەحىندا ءبىر كۇندە 60 باسقا دەيىن مال سويىلادى. ال شۇجىق تسەحىندا تاۋلىگىنە 6 تونناعا دەيىن دايىن ءونىم وندىرىلەدى. بۇل جەردەن شۇجىقتىڭ 18 ءتۇرىن تابا الاسىز. قازىرگى كەزدە ءونىمنىڭ ساۋدا ماركاسى دايىندالۋدا, بۇل «قايىڭدى» سەرىكتەستىگىنىڭ شۇجىقتارىن وتاندىق ساۋدا سورەلەرىنەن كورەتىن كۇن دە الىس ەمەس دەگەن ءسوز. ونىمەن قاتار دايىن ءونىمدى العاشقىدا قىتاي مەن رەسەيگە ەكسپورتتاۋ مەجەلەنىپ وتىر. جالپى ەت وڭدەۋ زاۋىتى ەت ونىمدەرىن وڭدەۋ مەن ەكسپورتتاۋعا باعىتتالعان.
وبلىس اكىمى اماندىق باتالوۆ مال شارۋاشىلىعىنىڭ وسىنداي ىرگەلى نىساندارىنىڭ ءوڭىردىڭ ەت ءوندىرىسىن, ەكسپورتتىق مۇمكىندىكتەرىن ۇلعايتۋعا زور ىقپال ەتەتىنىن ايتتى.
- وسىنداي ايتۋلى جوبالاردى عىلىمي-ادىستەمەلىك ورتالىق رەتىندە كورسەتۋگە بولادى. «مىڭ رەت ەستىگەننەن ءبىر رەت كورگەن ارتىق», - دەگەن. بۇگىنگى ارالاعان نىساندار اگرارلىق سالادا تاجىريبە الماسۋ, ۇيرەنۋ الاڭى بولۋعا ابدەن لايىق. ءبىز ءىرى بيزنەسمەندەردىڭ كومەگىمەن وسىنداي وتە پايدالى, زامان تالابىنا ساي جوبالاردى جۇزەگە اسىرۋ ارقىلى وبلىسقا ينۆەستيتسيا تارتۋ جۇمىستارىن ودان ءارى دە جالعاستىرامىز, - دەدى ا. باتالوۆ.
دەپۋتاتتار دا ءوز كەزەگىندە مۇنداي نىسانداردىڭ مال شارۋاشىلىعىن وركەندەتۋدەگى ۇلەسىنە وڭ باعا بەردى.
اتاپ وتسەك, وسى ءۇش نىسان دا - «الاكول اسىل جىلقىسى» جشس-نىڭ جىلقى فەرماسى, «قايىڭدى» جشس-نىڭ مال بورداقىلاۋ الاڭى مەن ەت وڭدەۋ زاۋىتى «Zhersu» ينۆەستيتسيالىق-وندىرىستىك كورپوراتسياسىنىڭ ينۆەستيتسيا سالۋى ناتيجەسىندە جۇزەگە اسىرىلعان.
