قوستاناي وبلىسىنداعى «التىن دالا» تابيعي رەزەرۆاتىنا بىلتىر عانا جىبەرىلگەن توعىز قۇلاننىڭ ءبىرى براكونەر وعىنان مەرت بولدى. قورىقشىلار 26 جەلتوقسان كۇنى ارقالىق ماڭىنداعى قايىڭدى اۋىلىنان 30 شاقىرىم جەردە قۇلاننىڭ موينىنداعى سپۋتنيك ارقىلى باقىلاناتىن GPS قارعىباۋى قوزعالىسسىز قالعانىن بايقاعان. وقيعا ورنىنا جەدەل جەتكەن ولار جانۋاردىڭ باسى مەن GPS قارعىباۋىن عانا تابادى. قۇلان قۇلاعان جەردە كولىك ءىزى قالعانىن بايقاعان ولار, دەرەۋ سۋرەتكە ءتۇسىرىپ, ارقالىق قالالىق پوليتسيا باسقارماسىنا ارىز تۇسىرەدى.
بۇل تۋرالى وبلىستىق پوليتسيا دەپارتامەنتىندە وتكەن ءباسپاسوز جيىنىندا ايتىلدى. پوليتسەيلەر وقيعا ورنىنا جەتكەنشە, قۇلاننىڭ باسىن دا, كولىكتەن قالعان ءىزدى دە قار باسىپ قالعان.
– ءبىزدىڭ ماماندار قارعىباۋدى عانا تاپتى. قىلمىستى اشۋ ءۇشىن ارنايى توپ قۇرىلدى. قازىر قر قك-ءنىڭ 337-بابى بويىنشا ءىس قوزعالدى. زاڭسىز اڭشىلىق جاساعاندارعا قاتىستى الدىن الا تەرگەۋ شارالارى جۇرگىزىلۋدە, – دەيدى تابيعاتتى قورعاۋ ءبولىمىنىڭ باستىعى تالعات احمەتوۆ.
تابيعات ەركەسىن باسسىز قانجىعاسىنا بوكتەرگەن براكونەرلەر قولعا ءتۇسىپ, قىلمىسى دالەدەنسە, 5 جىلدان 10 جىلعا دەيىن باس بوستاندىقتارىنان ايىرىلۋى مۇمكىن.
نۇرقانات قۇلاباەۆ
قوستاناي وبلىسى
