ابايتانۋ بۇعان دەيىن دە بيىك دارەجەگە كوتەرىلىپ قالعان. العاش اباي الەمىن اشقان ءاليحان بوكەيحان, ونى جەرىنە جەتكىزگەن مۇحتار اۋەزوۆ بولسا, جوعارى دەڭگەيدە بايىپتاۋشى – مۇحتار ماعاۋين. ال مىنا مەرەيتويى بارىسىندا پرەزيدەنت بۇقارانىڭ بەتىن ءبىرجولا بۇرعانى نۇر ۇستىنە نۇر بولدى. پرەزيدەنت مۇنىسىمەن ءبىزدىڭ حالىق ابايعا قاراپ بوي تۇزەمەي, كوشەلى ەلگە اينالا المايتىنىمىزدى نۇسقاپ وتىر. ءبىزدىڭ كوبىمىز ابايدى وقىمايمىز. اتىن عانا بىلەمىز. ونىڭ وزىندە مەن كوپ بىلەم دەگەن جەلەۋمەن بىرەۋدى يمەندىرۋ, مۇقاتۋ ماقساتىندا عانا ايتامىز. ابايعا بويلاعان ادام – قازاق حالقىنىڭ قادىرىن دە, تراگەدياسىن دا اناعۇرلىم انىعىراق سەزىنىپ, قام قىلاتىن تۇلعا.
سونىمەن قاتار سەمەي قالاسىنا جوعارى مارتەبە بەرەتىنى دە – كورەگەندىك. سەمەي – قازاقتىڭ رۋحاني استاناسى. وعان ەندىگى ۋاقىتتا پروۆينتسيا دەپ قاراۋ ۇيات! وسى ۋاقىتقا شەيىن ەكونوميكالىق سالاعا باسا ءمان بەرىپ كەلدىك. رۋحانياتتى دا قاتار ۇستاۋ كەرەك ونىمەن. رۋح كوتەرىلمەي, ەكونوميكامىز دا وركەندەمەيدى. ول ءۇشىن قازاق ەلى ۇلتىمىزدىڭ رۋحاني شامشىراعى ابايعا باس قويۋى ءتيىس!
ابايدى وقىعان الاشقا قىزمەت ەتپەي قويمايدى دەگەن ءسوز!
سەرىك اقسۇڭقار ۇلى,
اقىن, قازاقستاننىڭ ەڭبەك سىڭىرگەن قايراتكەرى
قاراعاندى وبلىسى
