رۋحانيات • 09 قاڭتار، 2020

پرەزيدەنت: الەۋمەتتىك جاۋاپكەرشىلىكتى كۇشەيتۋدى ابايدىڭ «تولىق ادام» فورمۋلاسىنان ىزدەگەن ءجون

134 رەت كورسەتىلدى

جاڭا قازاقستاننىڭ وزەگىن جاڭا قوعام قۇرايتىنى انىق. بۇل رەتتە، ەڭ الدىمەن، ۇلتىمىزدىڭ قادىر-قاسيەتىن ارتتىرىپ، حالقىمىزدىڭ باسەكەگە قابىلەتتىلىگىن جەتىلدىرۋگە باسا ءمان بەرۋىمىز كەرەك. سونداي-اق قوعامنىڭ دامۋىنا كەدەرگى كەلتىرەتىن، بەرەكە-بىرلىگىمىزگە ىرىتكى سالاتىن جاعىمسىز قاسيەتتەردەن ارىلۋ قاجەت. 

مەملەكەت باسشىسى قاسىم-جومارت توقاەۆ «Egemen Qazaqstan» گازەتىنىڭ بۇگىنگى №5 سانىندا جاريالانعان ماقالاسىندا وسىلاي دەدى.

«بۇگىندە دۇنيە ءجۇزىنىڭ بىرقاتار ينتەللەكتۋالى كلاسسيكالىق كاپيتاليزم داعدارىسقا تاپ بولعانىن ەسكەرتىپ، ونىڭ بولاشاعىنا كۇمانمەن قارايدى.

سەبەبى الەمدە باي مەن كەدەيدىڭ، ءبىلىمدى مەن ءبىلىمسىزدىڭ، قالا مەن اۋىلدىڭ اراسى الشاقتاپ كەتتى. بۇل ۇدەرىستىڭ قارقىنى بارعان سايىن كۇشەيىپ كەلەدى. بيزنەس تەك پايدا كوزدەسە، بىلىمدىلەر بولەك ورتا قالىپتاستىردى، ارقايسىسى وزدەرى ءۇشىن عانا جاۋاپكەرشىلىك ارقالايتىن بولدى» دەپ جازدى پرەزيدەنت.

سونداي-اق مەملەكەت باسشىسى قالالار تەز ءوسىپ-وركەندەپ، شاعىن ەلدى مەكەندەردىڭ دامۋى تۇرالاعانىن، عالىمدار مۇنىڭ بارلىعى الەۋمەتتىك جاۋاپكەرشىلىكتىڭ السىرەگەنىنەن دەپ ەسەپتەيتىنىن اتاپ وتەدى.

«الەۋمەتتىك جاۋاپكەرشىلىك قايتكەندە ورنىنا كەلەدى؟ ارينە، بۇل – وڭاي شارۋا ەمەس. وسى كۇردەلى ماسەلەنىڭ شەشىمىن ابايدىڭ «تولىق ادام» فورمۋلاسىنان ىزدەگەن ءجون. «تولىق ادام» دەگەن ءسوز اعىلشىن تىلىندەگى «A man of integrity» تۇسىنىگىنە ساي كەلەدى. بۇل – تەك وتە ىلكىمدى، وزىنە سەنىمدى، ىزگىلىك پەن جاقسىلىققا ۇمتىلاتىن ادامدارعا عانا ءتان سيپاتتاما. قازىر تاراپ جاتقان وسى ۇعىمدى اباي سوناۋ ون توعىزىنشى عاسىردىڭ وزىندە-اق ءتۇسىندىرىپ ايتتى» دەپ جازدى قاسىم-جومارت توقاەۆ.

سونىمەن قاتار پرەزيدەنت ادام ءومىرى تۇتاسىمەن ءتۇرلى قارىم-قاتىناستاردان قۇرالاتىنىن، ونسىز ادام قوعامنان ءبولىنىپ قالاتىنىن تىلگە تيەك ەتەدى.

«ال قارىم-قاتىناس مىندەتتى تۇردە ءوزارا جاۋاپكەرشىلىكتى تۋعىزادى. بۇل جاۋاپكەرشىلىك قارا باسىنىڭ قامىن بيىك قوياتىن وزىمشىلدىك ارالاسقان كەزدە بۇزىلادى. سوندىقتان اباي: «اقىل، قايرات، جۇرەكتى بىردەي ۇستا، سوندا تولىق بولاسىڭ ەلدەن بولەك»، دەپ ادامعا نۇرلى اقىل مەن ىستىق قايراتتان بولەك، جىلى جۇرەك كەرەك ەكەنىن ايتادى.

وسى ءۇش ۇعىمدى ول ۇنەمى بىرلىكتە قاراستىرادى، بىراق الدىڭعى ەكەۋى جۇرەككە باعىنۋى كەرەك دەپ ەسەپتەيدى. بۇل – قازاق حالقىنىڭ ومىرلىك فيلوسوفياسى» دەپ جازدى قاسىم-جومارت توقاەۆ. 

وسىنداي تانىم-تۇسىنىكپەن ءومىر سۇرگەن حالقىمىز ءوزى قيىن جاعدايدا وتىرىپ، وزگە ۇلتتاردى باۋىرىنا باسقانىن، ءوزى اسقا جارىماي قينالسا دا، ءبىر ءتىلىم نانىن ءبولىسىپ جەۋدى پارىز ساناعانىن اتاپ وتكەن پرەزيدەنت:

«ۇنەمى ۇلكەنگە قۇرمەت، كىشىگە ىزەت كورسەتىپ، سۇرىنگەنگە سۇيەۋ، جىعىلعانعا دەمەۋ بولا بىلگەن. وسى قۇندىلىقتاردى دارىپتەپ، بۇگىنگە جەتكىزۋ ارقىلى حالقىمىز ءوزىنىڭ ۇلت رەتىندە ساقتالۋى ءۇشىن بارىن سالعان»، - دەپ جازدى ماقالاسىندا.

سوڭعى جاڭالىقتار

ۇقساس جاڭالىقتار