پرەزيدەنت • 09 قاڭتار، 2020

«Egemen Qazaqstan» گازەتىندە پرەزيدەنتتىڭ اباي تۋرالى ماقالاسى جارىق كوردى

697 رەتكورسەتىلدى

«Egemen Qazaqstan» گازەتىنىڭ بۇگىنگى №5 سانىندا مەملەكەت باسشىسى قاسىم-جومارت توقاەۆتىڭ اباي قۇنانباي ۇلىنىڭ 175 جىلدىعىنا ارنالعان «اباي جانە XXI عاسىرداعى قازاقستان» اتتى كولەمدى ماقالاسى جارىق كوردى.

ماقالادا ەل پرەزيدەنتى حالقىمىزدىڭ ۇلى پەرزەنتىنىڭ مەرەيتويىن لايىقتى اتاپ ءوتۋ ءۇشىن ارنايى قۇرىلعان كوميسسيا دايىندىق جۇمىستارىن باستاپ كەتكەنىن، مەملەكەت كولەمىندە جانە حالىقارالىق دەڭگەيدە اۋقىمدى ءىس-شارالار ۇيىمداستىرۋ جوسپاردا ەكەنىن اتاپ ءوتتى.

سونداي-اق بۇل شارالاردىڭ «توي تويلاۋ ءۇشىن ەمەس، وي-ءورىسىمىزدى كەڭەيتىپ، رۋحاني تۇرعىدان دامۋىمىز ءۇشىن وتكىزىلمەك» ەكەنىن العا تارتتى.

«اباي قۇنانباي ۇلى عۇلاما، ويشىل، اقىن، اعارتۋشى، ۇلتتىڭ جاڭا ادەبيەتىنىڭ نەگىزىن قالاۋشى، اۋدارماشى، كومپوزيتور رەتىندە ەل تاريحىندا وشپەس ءىز قالدىرعانى ءسوزسىز. ونىڭ ولەڭدەرى مەن قارا سوزدەرىندە ۇلت بولمىسى، ءبىتىمى، تۇرمىسى، تىرشىلىگى، دۇنيەتانىمى، مىنەزى، جانى، ءدىنى، ءدىلى، ءتىلى، رۋحى كورىنىس تاۋىپ، كەيىن اباي الەمى دەگەن بىرەگەي قۇبىلىس رەتىندە باعالاندى» دەلىنگەن پرەزيدەنت ماقالاسىندا.

ماقالادا اۆتور اباي ءسوزىنىڭ بۇگىنگى زامانىمىز ءۇشىن كوكەيكەستىلىگى، اقىن شىعارمالارىنان حالقىمىز قانداي تاعىلىم الۋعا ءتيىس ەكەندىگى جونىندە جۇرتشىلىقپەن وي بولىسەدى. 

قاسىم-جومارت توقاەۆ بىلتىر حالىق اراسىندا تاراعان ابايدىڭ 175 جىلدىعىنا ارنالعان ەستافەتانى ەسكە الىپ، بۇل جاقسى ءداستۇردىڭ بيىل دا جاڭاشا جانداناتىنىنا سەنىم ءبىلدىردى. 

«وتكەن جىلى ابايدىڭ شىعارمالارىنان ءۇزىندى وقۋ ەستافەتاسى ءوتتى. ءلايلىم اتتى وقۋشى قىز ۇسىنعان بۇل ەلدىك شاراعا مەن دە قاتىسىپ، قولداۋ كورسەتتىم. مەكتەپ وقۋشىلارىنان ەل ازاماتتارىنا، ءتىپتى الەمدىك دەڭگەيدەگى تانىمال تۇلعالارعا دەيىن زور قىزىعۋشىلىق تانىتىپ، لەزدە ءىلىپ اكەتكەن بۇل باستاما بىرنەشە ايعا ۇلاستى. سونىڭ ارقاسىندا بۇكىل قازاقستان اباي مۇراسىن تاعى ءبىر زەردەلەپ شىقتى. بۇل – ابايعا دەگەن قۇرمەت ءارى ۇرپاقتى تاربيەلەۋدىڭ ءتيىمدى ءتاسىلى. اباي جىرلارىن وقۋ چەللەندجى بيىل، اقىن مەرەيتويى تۇسىندا جاڭاشا جاندانادى دەپ سەنەمىن»، دەدى مەملەكەت باسشىسى. 

سوڭعى جاڭالىقتار

ەسىك نەگە «تەسىك»؟

قوعام • كەشە

ۇقساس جاڭالىقتار