ادەتتە ءبىز: «ۋاقىت ءوتىپ بارادى!» دەۋگە اۋەسپىز. ال شىندىعىندا... جىلى جاققا بەت العان تىرنالار سەكىلدى بىرىنەن سوڭ ءبىرى تىزبەكتەلىپ, الىسقا ۇزاپ بارا جاتقان كۇندەرمەن بىرگە ءومىر دە ءوتىپ بارادى ەمەس پە؟!
ويلا-ا-اپ قاراساڭىز, ول دا ءبىر ۇزاق ساپار. جانە سول ساپاردا اركىمنىڭ-اق وزىنە ءتان كورەر قىزىعى, تارتار تاۋقىمەتى بار. ونى ءبىز – تاعدىر دەيمىز...
ءاسىلى, قۋانىشتى كۇندەردىڭ سالماعى بولمايدى. ولار زىمىراپ, كوزدى اشىپ-جۇمعانشا-اق عايىپ بولادى. ال قيىندىقپەن, ۋايىممەن وتەتىن كۇندەر جارالى قۇس سياقتى. قاناتىن اۋىرسىنا قاعىپ, اۋپىرىممەن ازەر ۇشادى. بىراق ول دا الىستاپ, كوڭىلىڭىزدە تەرەڭ ءىز قالدىرىپ كەتەدى...
پەندەشىلىكپەن كۇندەلىكتى تىرلىكتىڭ ىڭعايىنا قارايسىز, ارينە. بىردە ك ۇلىپ, قۋانىپ, تاعى بىردە وكىنىپ, وكپەلەپ جۇرەسىز. ايتسە دە, ۇلى مارتەبەلى ۋاقىتتىڭ كوڭىل كۇيگە قاراپ, ءبىر ساتكە ايالداپ, پەندە شىركىنگە مۇرسات بەرىپ, يىلگەن كەزىن كورمەيسىز. قولىڭىزداعى ساعات ءتىلى سىرتىلداپ, سول باياعى جۇرىسىنەن جاڭىلمايدى...
شىنىن ايتقاندا, كەيدە ءسىزدىڭ دە وسى ۋاقىتتى بىرەر مينۋتقا توقتاتىپ, ەس جيىپ, الداعى كۇندەرگە اسىقپاي جوسپار قۇرىپ العىڭىز كەلەتىنى راس. ەندەشە, ونى ەپتەپ الاڭداتىپ, از دا بولسا كوڭىلىن الداندىراتىن شاقتى كۇتپەيمىز بە؟..
انە, قاراڭىزشى, ەسكى جىل قولىن بۇلعاپ, قوشتاسىپ بارادى. ال جاڭا جىل بولسا, جان-جاعىنا قاراپ, دۇركىن-دۇركىن اتىلىپ جاتقان وتشاشۋلاردى كورىپ, تاڭىرقاپ كەلەدى.
دەمەك, تىڭ جوسپارلار قۇرىپ, كۇش جيناپ, الداعى بيىكتەرگە كوتەرىلۋگە ازىرلىك جاسايتىن ەڭ قولايلى ءسات تە وسى-داعى.
ولاي بولسا, ءبىر-ءبىرىمىزدىڭ قولىمىزدى قىسىپ: «ىسكە ءسات!» دەيىك!
مۇنىڭ قىزىعى, كۇنتىزبەنىڭ بەتىندە ەكى ساندىق بەلگى عانا وزگەرىپ, 2019-دىڭ ورنىنا 2020 دەپ جازىلۋىنا قاراي قانشاما جاڭا باستامالاردىڭ ومىرگە كەلىپ, جارقىن ۇمىتتەردىڭ ويانىپ جاتاتىندىعىندا ەمەس پە.
الماتى
