جۋىردا جاعىمدى جاڭالىق جەتتى. قازاق مادەنيەتى مەن ادەبيەتىنىڭ اق ورداسى سانالاتىن الماتى شاھارىنداعى «نۇرلى الەم» باسپاسىنان – ماڭعىستاۋ جۋرناليستيكاسىنىڭ بەلگىلى وكىلى, قازاق ساتيراسىنىڭ ساربازى, «ەگەمەن قازاقستان» گازەتىنىڭ بالعابەك قىدىربەك ۇلى اتىنداعى رەسپۋبليكالىق سىقاقشىلار بايقاۋىنىڭ لاۋرەاتى, قازاقستان جۋرناليستەر وداعىنىڭ مۇشەسى, ماڭعىستاۋ اۋدانىنىڭ قۇرمەتتى ازاماتى – ءازىربايجان قونارباەۆتىڭ «كۇلكى بازار» اتتى ساتيرالىق جيناعى جارىق كوردى.
اناۋ-مىناۋ ەمەس – 500 بەتتىك كىتاپقا سايىپقىران ساتيريكتىڭ سوڭعى جىلدارى جازىلعان تۇينەك-تۇينەك ساتيرالارى, شىندىققا تولى شىمشىمالارى, زىلدەي بولعان ازىلدەرى مەن فەلەتوندارى, يۋمورلىق ولەڭدەرى مەن قالجىڭباس اڭگىمەلەرى جيناقتالعان.
اقىننىڭ بۇدان باسقا 60-تان استام شەجىرەلىك, تاريحي-تانىمدىق, ادەبي ساتيرالىق كىتاپتارى جارىق كورگەن. ازەكەڭنىڭ ەلگە تانىمال وسى كۇنگە دەيىن جارىق كورگەن ء«تۇرلى-ءتۇرلى ءتانتاناي», «ويباي عانا قۇداي-اي», «جايمابازار» كىتاپتارى كوپتىڭ كوڭىلىنەن شىعىپ, ءدۇيىم حالىقتى كۇلكىگە باتىرعان ەدى. ەندى, مىنە سونداي وعى الىسقا تيەتىن قالجىڭ قالتاعا, ءاجۋا مەن ازىلگە, قيسىق ءسوز بەن قىڭىر سوزگە تولى سىقاق دۇنيەلەرى وقىرمانعا تاعى دا جول تارتتى.
قازاق – قالجىڭقوي حالىق. كۇللى الەمنىڭ كۇلكىسىن وقيمىز دا, ءوز كۇلكىمىزدى الەمگە پاش ەتە المايتىنىمىز قىنجىلتادى. سوندىقتان قازاق ساتيراسىنا تاعى دا ءبىر سۇبەلى ەڭبەكتىڭ كەلۋى – بۇگىنگى قازاق ساتيراسىنىڭ بولاشاعى جارقىن ەكەندىگىنىڭ ايقىن دالەلى بولماق. قازاق كۇلكىسىنىڭ كورولى وسپانحان اۋباكىروۆ, ۇمبەتباي ۋايدين, عابباس قابىش ۇلىنىڭ اق باتاسىن الىپ, «ساتيرا» اتتى ارالعا ماڭگىلىك تۇراقتاعان ازەكەڭنىڭ الەمى ءالى تالاي جۇرتتى تاڭعالدىرىپ, تاڭداي قاقتىراتىنى ءسوزسىز.
ارالباي ماقان
ماڭعىستاۋ وبلىسى
