دارىگەرلەردىڭ ايتۋىنشا, الماتى ستاتسيونارلارىندا 27 پاتسيەنت جاتىر. ولاردىڭ جەتەۋى بالا. الماتى كوپبەيىندى كلينيكالىق اۋرۋحاناسىنىڭ جانساقتاۋ بولىمىندە 1 ادام جاتىر.
بارلىق زارداپ شەككەندەر مەن جانساقتاۋ بولىمىندە جاتقان ادامنىڭ جاعدايى تۇراقتى, ءبىر قالىپتى جاقسارىپ كەلەدى. اپاتتان زارداپ شەككەن ءۇش جولاۋشى ودان ءارى ەمدەلۋ ءۇشىن ساناۆياتسيا ارقىلى نۇر-سۇلتان قالاسىنىڭ تراۆماتولوگيا جانە ورتوپەديا عىلىمي-زەرتتەۋ ينستيتۋتىنا جەتكىزىلگەن.
جالپى العاندا, دارىگەرلەر 22 وپەراتسيا جاسادى. بارلىق وتا ءساتتى ءوتتى. ونىڭ ىشىندە ەكى بالاعا بالالار شۇعىل مەديتسينالىق كومەك كورسەتۋ ورتالىعىنىڭ تراۆماتولوگتارى جوعارى تەحنولوگيالىق زاماناۋي ەمدەۋ ءادىسىن قولدانا وتىرىپ, كەسۋسىز, اتاپ ايتقاندا «وڭ سان سۇيەگىنىڭ يىلگىش وزەكشەلەرىمەن وستەوسينتەزى» وپەراتسياسىن جاسادى. مۇنداي وپەراتسيادان سوڭ بىرنەشە كۇننەن كەيىن سىنعان اياق-قولدىڭ قالپىنا كەلۋ مۇمكىندىگى جوعارى بولماق.
ايتا كەتەيىك, اۋە اپاتىنىڭ ناتيجەسىندە 69 جولاۋشى زارداپ شەككەن, ونىڭ ىشىندە 9-ى بالا. قازىر الماتى, نۇر-سۇلتان ستاتسيونارلارىندا جانە الماتى قالالىق كوپبەيىندى كلينيكالىق اۋرۋحاناسىندا 30 ادام جاتىر.
