مەملەكەتتىك حاتشى گۇلشارا ابدىقالىقوۆا قاتىسقان جيىندا مەملەكەتتىك ورگانداردىڭ, حالىقارالىق ۇيىمداردىڭ, ديپلوماتيالىق كورپۋستىڭ, ءبىلىم جانە عىلىم سالالارىنىڭ وكىلدەرى جانە كورنەكتى قوعام قايراتكەرلەرى دە جينالدى. وتىرىسقا اگەنتتىك توراعاسى قايرات قوجامجاروۆ جەتەكشىلىك ەتتى.
سىبايلاس جەمقورلىققا قارسى كۇرەس جۇرگىزۋدىڭ باعىت-باعدارلارىن ستراتەگيالىق تۇرعىدا زەردەلەي وتىرىپ, حالىقارالىق شەڭبەردەگى ارىپتەستىكتى تەرەڭدەتۋدى ماقسات ەتكەن كونفەرەنتسيادا الدىمەن گۇلشارا ابدىقالىقوۆا ءسوز سويلەدى. مەملەكەتتىك حاتشى قۇتتىقتاۋ سوزىندە مۇنداي باسقوسۋ قازاقستان تاۋەلسىزدىگىنىڭ 25 جىلدىعىن مەرەكەلەۋ قارساڭىندا ءوتىپ وتىرعانىنا توقتالدى. «وتكەن جىلدارى مەملەكەتىمىز سىبايلاس جەمقورلىققا قارسى ءىس-قيمىل ماسەلەلەرىنە قاتىستى اۋقىمدى شارالار قابىلدادى. بۇگىنگى كۇنى قازاقستان سىبايلاس جەمقورلىققا قارسى ساياساتتى ىسكە اسىرۋدىڭ ساپالى جاڭا كەزەڭىنە كوشتى, ونىڭ مازمۇنى «قازاقستان-2050» ستراتەگياسىندا جانە «100 ناقتى قادام» «ۇلت جوسپارىندا, سونداي-اق, سىبايلاس جەمقورلىققا قارسى كۇرەستىڭ 2015-2025 جىلدارعا ارنالعان ستراتەگياسىندا ايقىندالعان», دەدى گ.ابدىقالىقوۆا.
سونىمەن قاتار, ول سىبايلاس جەمقورلىققا قارسى كۇرەس جونىندەگى شارالاردى ودان ءارى كۇشەيتۋ باعىتىندا قازاقستان پرەزيدەنتى تاباندى ۇستانىمدى باسشىلىققا العانىن اتاپ ءوتتى. «سول سەبەپتەن دە ەلىمىز سىبايلاس جەمقورلىققا قارسى ءىس-قيمىلدىڭ الەمدىك ستاندارتتارىنا سايكەس كەلەتىن ءتيىمدى تەتىكتەرىن قالىپتاستىرۋ جونىندە جۇيەلى ءىس-ارەكەتتەر قابىلداۋدا. «سىبايلاس جەمقورلىققا قارسى ءىس-قيمىل تۋرالى» جاڭا زاڭ سىبايلاس جەمقورلىققا قارسى مونيتورينگ, سىبايلاس جەمقورلىق قاتەرلەرىن جۇيەلى تالداۋ جانە سىبايلاس جەمقورلىققا قارسى وقۋ-اعارتۋ ءىسى سياقتى كەڭ اۋقىمدى قۇقىقتىق تاسىلدەردى تاجىريبەگە ەنگىزدى. ال حالىقارالىق ىنتىماقتاستىقتى نىعايتۋدىڭ ماڭىزدىلىعى جونىندە ايتار بولساق, بۇل باعىتتاعى جۇمىستارىمىز دا جۇيەلى ىسكە اسىرىلۋدا.
قازاقستان بۇۇ-نىڭ سىبايلاس جەمقورلىققا قارسى كونۆەنتسياسىنىڭ, سىبايلاس جەمقورلىققا قارسى ۆەدومستۆولار قاۋىمداستىعىنىڭ, ەكونوميكالىق ىنتىماقتاستىق جانە دامۋ ۇيىمىنىڭ (ەىدۇ) سىبايلاس جەمقورلىققا قارسى كۇرەس جونىندەگى ىستانبۇل ءىس-قيمىل جوسپارىنىڭ جانە باسقا دا حالىقارالىق ۇيىمداردىڭ مۇشەسى بولىپ تابىلادى», دەدى گۇلشارا ناۋشاقىزى.
مەملەكەت باسشىسىنىڭ «100 ناقتى قادام» ۇلت جوسپارىندا سىبايلاس جەمقورلىققا قارسى كۇرەس ساياساتىنىڭ باعىت-باعدارى اشىق ءارى ناقتى كورسەتىلگەنىن تىلگە تيەك ەتكەن ق.قوجامجاروۆ مۇندا نەگىزگى باسىمدىق دامىعان ەلدەردىڭ تاجىريبەسىنە ارقا سۇيەۋ بولاتىندىعىن باسا ايتتى. سونىڭ ىشىندە قازاقستان قازىرگى تاڭدا الەمدىك قوعامداستىقتا مويىندالعان ءادىس – سىبايلاستىققا تاۋەكەل جاساۋدى باقىلاۋ مەن ونى سارالاۋدى ءوز قىزمەتىندە ءبىرىنشى كەزەكتە قولدانىسقا ەنگىزگەن. سونىمەن قاتار, ۇيىمداستىرىلاتىن ءتۇرلى قوعامدىق-مادەني شارالار اياسىندا «ماڭگىلىك ەل» جالپىۇلتتىق يدەياسى ازاماتتار ساناسىنا كەڭىنەن ءسىڭىرىلىپ جاتقانى اتاپ كورسەتىلدى.
الەمدىك دەڭگەيدەگى حالىقارالىق ۇيىمداردىڭ وكىلدەرى قاتىسقان القالى جيىننىڭ ماقساتى ەركىن پىكىر الماسۋ ارقىلى وزىق تاجىريبەلەردى تالقىلاۋ بولدى. وسى رەتتە اگەنتتىك توراعاسىنىڭ ورىنباسارى اليك شپەكباەۆ «قازاقستاننىڭ سىبايلاس جەمقورلىققا قارسى زاماناۋي ساياساتى: تاجىريبە مەن جەتىستىكتەر» تاقىرىبىندا بايانداما جاسادى. اليك جاتقامباي ۇلى ءوز سوزىندە, سىبايلاستىققا قارسى كۇرەستە مەملەكەت پەن حالىقتىڭ ءوزارا قارىم-قاتىناسىنداعى كەدەرگىلەردى جويۋدا وزىق تەحنولوگيالار كەڭ قولدانىسقا يە ەكەندىگىن العا تارتتى. «سونىمەن قاتار, رۇحسات بەرۋ پروتسەدۋرالارى مەن اكىمشىلىك كەدەرگىلەردى قىسقارتۋدىڭ دا ماڭىزى جوعارى. ارينە, مۇنداي تالاپتار, ەڭ الدىمەن, مەملەكەتتىك قىزمەت پەن سوت جۇيەسى جانە قۇقىق قورعاۋ ورگاندارىنىڭ زاڭنامالارىندا ايقىن كورىنۋى ءتيىس. قازاقستان سوڭعى كەزدەرى وسى سارىنداعى جوسپارلى جۇمىستاردى جۇيەلى تۇردە جۇزەگە اسىرىپ كەلەدى», دەدى بايانداماشى.
حالىقارالىق دەڭگەيدەگى ساراپشىلار مەن ماماندار اراسىندا وربىگەن اشىق پىكىر الماسۋ بارىسىندا ەلىمىزدەگى ەلەۋلى جوبالار دا اڭگىمەگە ارقاۋ بولدى. اتاپ ايتقاندا, شەتەلدىك دەلەگاتسيا وكىلدەرىنە «ادالدىق الاڭى» سىندى قوعامدىق قوزعالىستىڭ تاجىريبەسى تانىستىرىلىپ, ۇيىم قىزمەتى شەبەر ۇيىمداستىرىلاتىندىعى باياندالدى. مۇنداي ارەكەتتىڭ بارلىعى دا جەمقورلىقتى ءتۇپ-تامىرىمەن جويۋ جولىندا قوعامدىق تۇسىنىكتىڭ قالىپتاسىپ, ونىڭ كەڭ ءورىس الىپ جاتۋىنىڭ ايقىن كورىنىسى رەتىندە باعالاندى.
نۇرلىبەك دوسىباي, «ەگەمەن قازاقستان»
