سىبايلاس جەمقورلىقپەن كۇرەس قىزمەتىنىڭ باسشىسى كەزدەسۋ الدىندا وبلىستىق اكىمدىكتە اشىلعان ادالدىق دۇكەنىنىڭ جۇمىسىمەن تانىستى. سۋسىندار مەن ازىق-ت ۇلىك ونىمدەرى قويىلعان باسقا وبلىستارداعى دۇكەندەردەن ايىرماشىلىعى - سورەدە كىتاپتار مەن جۋرنالدار بار. دۇكەن جۇمىسى ساتىپ الۋشىنىڭ ادالدىعى مەن ار-ۇياتىنا نەگىزدەلگەن.
كەزدەسۋدى اشقان اتىراۋ وبلىسىنىڭ اكىمى ماحامبەت دوسمۇحامبەتوۆ ەلباسىنىڭ, مەملەكەت باسشىسىنىڭ «ەستيتىن مەملەكەت» تۇجىرىمداماسىندا بەلگىلەگەن مىندەتتەرىن اتاپ ءوتتى.
-سىبايلاس جەمقورلىق تاۋەكەلدەرىن ازايتۋدىڭ ءتيىمدى ادىستەرىنىڭ ءبىرى - مەملەكەتتىك ورگانداردىڭ اشىقتىعى, مەملەكەتتىك قىزمەت كورسەتۋدىڭ اشىق, كەدەرگىسىز ىسكە اسۋى. بۇل باعىتتا «تسيفرلى قازاقستان» باعدارلاماسىن جۇزەگە اسىرۋدىڭ ماڭىزى زور. حالىقپەن ءوزارا بايلانىس ورناتۋ ۇشىن Telegram جەلىسىندە اتىراۋ وبلىستىق اكىمدىگىنىڭ چات-كانالى, Facebook, Instagram جەلىلەرىندە رەسمي پاراقشالارى اشىلدى. بۇل ءوڭىردىڭ بارلىق پروبلەمالىق ماسەلەلەرىن جەدەل شەشۋدە ءتيىمدى ءادىس بولىپ وتىر. گەواقپاراتتىق پورتال جوباسى دا حالىق پەن بيلىك اراسىنداعى ءوزارا بايلانىستىڭ تيىمدىلىگىن كورسەتتى, دەدى م. دوسمۇحامبەتوۆ.
وبلىس اكىمى سىبايلاس جەمقورلىق تاۋەكەلدەرىن ازايتۋ ءۇشىن ايماقتىڭ كۆازيمەملەكەتتىك سەكتورىندا كورپوراتيۆتىك باسقارۋ ەنگىزىلەتىنىن اتاپ ءوتتى. باستى ماقسات - ءبىرىنشى باسشىلاردىڭ كەيبىر قىزمەتتەرىن باقىلاۋ كەڭەستەرىنە بەرۋ, القالى شەشىم قابىلداۋ جانە ۇنەمى ەسەپ بەرىپ وتىرۋ. باقىلاۋشىلار كادر ساياساتى, مەملەكەتتىك ساتىپ الۋلار مەن قارجىلىق-وندىرىستىك ماسەلەلەردى شەشۋى ءتيىس. بۇل باستاما قازىر دەنساۋلىق ساقتاۋ سالاسىنا ەنگىزىلۋدە, العا قاراي باسقا دا سالالارعا قولدانۋ جوسپاردا بار.
«اتىراۋ – ادالدىق الاڭى» جوبالىق كەڭسەسىنىڭ جەتەكشىسى الفيا اديەۆا ايماقتا اتقارىلىپ جاتقان جۇمىستار تۋرالى ايتتى. جوبا مەملەكەت پەن حالىق اراسىنداعى كوپىرگە اينالا وتىرىپ, قوعام مۇشەلەرىنىڭ سىبايلاس جەمقورلىقپەن كۇرەس ساياساتىنا قاتىستى جۇمىستارعا ءوز پىكىرلەرىن ايتىپ قانا قويماي, ونى جۇزەگە اسىرۋعا قاتىسۋىنا مۇمكىندىك بەرەدى. كەڭسە سىبايلاس جەمقورلىققا قارسىلىق تاقىرىبىندا «ادالدىق ايناسى», «ادالدىق كوپىرى», ت.ب 15 اكتسيا وتكىزدى.
مەملەكەتتىك قىزمەتكەرلەرمەن كەزدەسكەن سىبايلاس جەمقورلىققا قارسى ءىس-قيمىل قىزمەتىنىڭ باسشىسى اليك شپەكباەۆ بۇل ماسەلەنىڭ قوعامداعى ماڭىزى زور ەكەنىنە توقتالدى. سىبايلاس جەمقورلىق تاۋەكەلدەرى ەكونوميكانىڭ بارلىق سالاسىنا اسەر ەتەدى. ونىڭ تامىرىنا بالتا شابۋ ءۇشىن قۇقىق قورعاۋ ورگاندارى, اتقارۋشى بيلىك پەن ازاماتتىق قوعام بىرلەسە جۇمىس اتقارۋى كەرەك. Open-space فورماتىنا كوشۋ - مەملەكەتتىك ورگانداردىڭ ازاماتتارعا اشىقتىعىن, قولجەتىمدىلىگىن قامتاماسىز ەتۋگە باعىتتالعان قادام.
-قازاقستاندا كاسىبي مەملەكەتتىك اپپارات قۇرىلدى. مۇنى شەتەلدىك باقىلاۋشىلار دا مويىندادى. بۇعان جەتۋ وڭاي بولمادى, بىراق ءبىز قازىر مەملەكەتتىك قىزمەتشىلەردىڭ ازاماتتارعا اشىقتىعىن سەنىممەن ايتا الامىز. مۇنى سىزدەردىڭ ءوز ەلدەرىڭىزدىڭ پاتريوتى بولا وتىرىپ, ادالدىقپەن اتقارعان جۇمىستارىڭىز كورسەتىپ وتىر, دەدى اليك شپەكباەۆ.
اگەنتتىك باسشىسى مەملەكەتتىك قىزمەتكەرلەردىڭ جاۋاپكەرشىلىگى جونىندە دە ءسوز قوزعادى. ەگەر بۇزۋشىلىق بولسا, اتقارىپ وتىرعان لاۋازىمىنا قاراماستان جازالانادى.
-مەملەكەتتىك ساياسي قىزمەتشىلەردىڭ ءبىرىنشى باسشىسىنىڭ وتستاۆكاعا كەتۋ ينستيتۋتىنا بايلانىستى زاڭنامالىق اكتىلەر قابىلداندى. بۇل ءبىرىنشى كەزەكتە مينيسترلەرگە, ولاردىڭ ورىنباسارلارى مەن اپپارات باسشىلارىنا قاتىستى. وبلىستىق دەڭگەيدە - اكىمدەر مەن ورىنباسارلارى. بۇل ءبىرىنشى باسشى رەتىندە ماعان دا قاتىستى. ەگەر مەنىڭ ورىنباسارىم, اپپارات باسشىسى نەمەسە ايماقتاعى دەپارتامەنت باسشىسى بۇزۋشىلىققا جول بەرسە, سوت شەشىمى شىعارىلادى جانە مەن دە اۆتوماتتى تۇردە وتستاۆكاعا كەتۋىم كەرەك. بۇل قازاقستانعا كەلگەن حالىقارالىق ستاندارت. سىبايلاس جەمقورلىقتىڭ الدىن الۋ شارالارىن قابىلداماعان باسشىلاردىڭ جەكە جاۋاپكەرشىلىگى دە بار, دەدى اليك شپەكباەۆ.
جينالىستان كەيىن اليك شپەكباەۆ پەن ماحامبەت دوسمۇحامبەتوۆ كاسىپكەرلەر فورۋمىنا قاتىستى. وڭىرلىك بيزنەس-قاۋىمداستىق كاسىپكەرلەر مەن شەنەۋنىكتەردىڭ اراسىنداعى ءوزارا بايلانىستىڭ پروبلەمالىق ماسەلەلەرىن كوتەردى. سونىڭ ىشىندە جەر ۋچاسكەلەرىن بەرۋ, تاريف ساياساتى, ينفراقۇرىلىم بەرۋ. ءار ماسەلەنى اگەنتتىك توراعاسى مەن وبلىس اكىمى نازارعا الدى.
فورۋم اياقتالعاننان كەيىن سىبايلاس جەمقورلىققا قارسى ءىس-قيمىل قىزمەتىنىڭ باسشىسى مەن وبلىس اكىمى قۇرمانعازى اتىنداعى مادەنيەت سارايىندا جاستارمەن كەزدەستى. «ادام بولىپ كەلدىڭ ومىرگە» اتتى سىبايلاس جەمقورلىققا قارسىلىق تاقىرىبىندا تەاترلاندىرىلعان قويىلىم كورسەتىلدى. ودان كەيىن ايماقتاعى ەرىكتىلەر كورپۋسىمەن اڭگىمەلەستى. كەزدەسۋدە جاستاردىڭ بويىنا جەمقورلىققا قارسى مادەنيەت قالىپتاستىرۋدا وتباسىندا العان تاربيەنىڭ ماڭىزى زور ەكەنى تۋرالى ايتىلدى. ادال, پاراساتتى, ءتارتىپتى, ار-ۇياتى بار جاس ادام ەشقاشان زاڭ بۇزبايدى جانە حالقىنا قىزمەت ەتەدى.
