وبلىستىق ەنەرگەتيكا جانە تۇرعىن ءۇي شارۋاشىلىعى باسقارماسىنىڭ باسشىسى سايىن كامەنوۆتىڭ ايتۋىنشا, بۇل كۇندەرى وبلىستاعى قالالار مەن اۋدانداردىڭ قىسقى ماۋسىمعا دايىندىعى بەكىتىلگەن كەستەگە سايكەس جۇرگىزىلۋدە. جىلۋ ەنەرگەتيكا جانە تۇرعىن ءۇي-كوممۋنالدىق شارۋاشىلىق نىساندارىن الداعى كۇز-قىس ماۋسىمىنا دايىندىققا ساي وڭىردەگى ەلەكتر ستانسالارى كۇردەلى جوندەۋلەردەن ءوتىپتى. ياعني, ەلەكترمەن قامتۋ جەلىلەرىنىڭ 2462,8 شاقىرىمىنا جانە 745 قوسالقى ستانساعا, 29 قازاندىققا, جىلۋمەن قامتۋ جەلىلەرىنىڭ 25,4 شاقىرىمىنا, سۋمەن قامتۋ جەلىلەرىنىڭ 62,1 شاقىرىمىنا كۇردەلى جوندەۋلەر جۇرگىزىلىپ, 2399 تۇرعىن ۇيدە قىسقا دايىندىق جۇمىستارى جالعاسۋدا. قازىرگى كۇندەرى مەكتەپتەردىڭ – 77, دەنساۋلىق ساقتاۋ نىساندارىنىڭ – 86, الەۋمەتتىك, مادەنيەت جانە تۇرمىستىق نىسانداردىڭ 71 پايىزى دايىن.
سونىمەن قاتار, وبلىس اكىمى ەرلان ارىن وبلىستاعى بارلىق مەكتەپتەر 1 قىركۇيەككە دەيىن جىلۋ بەرۋ ماۋسىمىنا دايىن بولسىن دەگەن ارنايى تاپسىرما بەردى. بارىنەن بۇرىن وكىنىشتىسى سول, كەيبىر تۇرعىندار جىلۋ مەن جارىقتىڭ قايدان كەلىپ, قايدان شىعىپ جاتقانىن بىلمەي تەگىن دۇنيەدەي كورەتىنىن كوممۋنالدىق قىزمەتتەرگە تولەنبەگەن قارىزدار تىزىمىنەن كورەمىز. وسى جىلدىڭ 1 ماۋسىمىنداعى جاعداي بويىنشا وبلىس تۇرعىندارىنىڭ قارىزى 457,9 ميلليون تەڭگەنى قۇراپ وتىر. تۇتىنۋشىلار جىلۋمەن قامتۋعا 331,9 ميلليون تەڭگە, ەلەكترمەن قامتۋعا 90,0 ميلليون تەڭگە, سۋمەن قامتۋ قىزمەتتەرىنە 36,0 ميلليون تەڭگە تولەمەگەن. بۇدان بۇرىندارى دا قالالار مەن اۋدانداردىڭ اكىمدەرىنە مەرزىمىنەن كەشىكتىرىلگەن قارىزداردى جابۋ جانە ونى بولدىرماۋ بويىنشا ءتيىستى ءىس-شارالار ازىرلەۋ جونىندە تاپسىرمالار بەرىلگەن-ءدى. ءبىز بۇل جايىندا «قارىز بەن پارىز» اتتى ماقالامىزدا جازىپ كەتكەنبىز. سويتكەن قارىز ءالى كۇنگە دەيىن جينالعان ۇستىنە جينالىپ, كوبەيىپ بارادى.
ەرلان ارىن قالالار مەن اۋدانداردىڭ اكىمدەرىنە, مەملەكەتتىك ورگاندار باسشىلارىنا قارىز ماسەلەسىن باقىلاۋعا الىپ, 1 قىركۇيەككە دەيىن كورسەتىلگەن كوممۋنالدىق قىزمەتتەر قارىزىن جابۋ بويىنشا قاتاڭ شارالار جۇرگىزۋدى, سونداي-اق, شالعايداعى جانە قالا ىرگەسىندەگى اۋىلداردىڭ ەلەكتر, سۋ, جىلۋمەن قامتۋ نىساندارىن نازارعا الۋدى تاپسىردى. ايتپاقشى, اۋىلدار دەمەكشى, وبلىس ورتالىعىنا قاراستى تەمىرجولشىلار كەنتى قازىر قۇرىلىس الاڭىنا اينالعان, ءوز اعايىندارىمىز اۋىلداردان كەلىپ, تۇرعىن ۇيلەردى كوپتەپ سالىپ جاتىر. بىراق, ەلەكتر جارىعىنىڭ جوقتىعى ۇلكەن ماسەلەگە اينالىپ وتىر. وتكەن جىلى باعانالار ورناتىلىپتى. كەنتكە ەلەكتر جارىعىن تارتۋمەن جۇمىس جاساپ جاتقان «كابيسترويسەرۆيس» جشس مەردىگەر ۇيىمى وسى جىلدىڭ سوڭىنا دەيىن جارىق جاعىپ بەرەمىز دەپ ۋادە بەرىپتى. تۇرعىنداردىڭ ايتۋىنشا, قازىر جارقىراعان جاز ايىندا سىمدارىن تارتىپ, ەلەكتر جارىعىن جاقپاسا, بىلتىرعىداي تاعى دا قاراڭعى ۇيدە قالار تۇرلەرى بار. بىرەۋلەر جارىقتى سۋتەگىن پايدالانسا, اۋىل تۇرعىندارى جارىققا ءزارۋ...
فاريدا بىقاي,
«ەگەمەن قازاقستان».
پاۆلودار وبلىسى.
