كەشە قازاقستان پرەزيدەنتى جانىنداعى ورتالىق كوممۋنيكاتسيالار قىزمەتىنىڭ رەسمي وكىلى التاي ابيبۋللاەۆتىڭ قاتىسۋىمەن جۋرناليستەرگە ارنالعان كەزەكتى بريفينگ ءوتتى. رەسمي وكىل ءوز سوزىندە اعىمداعى اپتادا وتەتىن ماڭىزدى ءىس-شارالارمەن تانىستىردى.
كەشە قازاقستان پرەزيدەنتى جانىنداعى ورتالىق كوممۋنيكاتسيالار قىزمەتىنىڭ رەسمي وكىلى التاي ابيبۋللاەۆتىڭ قاتىسۋىمەن جۋرناليستەرگە ارنالعان كەزەكتى بريفينگ ءوتتى. رەسمي وكىل ءوز سوزىندە اعىمداعى اپتادا وتەتىن ماڭىزدى ءىس-شارالارمەن تانىستىردى.
التاي ابيبۋللاەۆ يران باسشىلىعىنىڭ شاقىرۋى بويىنشا, مەملەكەت باسشىسى نۇرسۇلتان نازارباەۆ 4 تامىزدا يران يسلام رەسپۋبليكاسىنىڭ جاڭادان سايلانعان پرەزيدەنتى حاسان ءروۋحانيدى ۇلىقتاۋ راسىمىنە قاتىساتىنىن, سالتاناتتى شاراعا باسقا دا شەت مەملەكەتتەردىڭ باسشىلارى, ۇكىمەتتەر جانە پارلامەنتتەر سپيكەرلەرى شاقىرىلىپ وتىرعانىن, تەھەراندا نۇرسۇلتان نازارباەۆ يراننىڭ جاڭا پرەزيدەنتى حاسان روۋحانيمەن ەكىجاقتى كەزدەسۋ وتكىزەتىنىن اتادى.
قازاقستان مەن يران كاسپي جاعالاۋىنداعى مەملەكەتتەر رەتىندە كاسپي تەڭىزىنىڭ قۇقىقتىق مارتەبەسىن انىقتاۋ جونىندەگى كەلىسسوز پروتسەسىنە قاتىساتىنى بەلگىلى. بۇل رەتتە, ءبىزدىڭ ەلىمىز ءوڭىردىڭ بارلىق ەلدەرىمەن دوستىق جانە ارىپتەستىك قارىم-قاتىناستا جانە ساۋدا-ەكونوميكالىق بايلانىستاردى ءارى قاراي كەڭەيتۋدى قولدايتىنى دا ايان. «ءبىز يران يادرولىق باعدارلاماسىنىڭ توڭىرەگىندەگى ماسەلەلەردى بەيبىت جانە ديپلوماتيالىق جولمەن رەتتەۋدىڭ ماڭىزدىلىعىن و باستان ايتىپ كەلەمىز. قازاقستاننىڭ شاقىرۋى بويىنشا اعىمداعى جىلدىڭ اقپان جانە ءساۋىر ايلارىندا الماتىدا يران يادرولىق باعدارلاماسى بويىنشا «5+1» ءپىشىنىندەگى كەلىسسوزدەردىڭ ەكى كەزەڭى ءوتتى», دەدى رەسمي وكىل.
ۇكىمەت جەلىسى بويىنشا وتەتىن ءىس-شارالارعا توقتالعان التاي ءابيبۋللاەۆ قىزىلوردا وبلىسىنىڭ دامۋ جاعدايىمەن تانىسۋ ماقساتىندا 1 تامىز كۇنى پرەمەر-ءمينيستردىڭ ءبىرىنشى ورىنباسارى – وڭىرلىك دامۋ ءمينيسترى باقىتجان ساعىنتاەۆتىڭ اتالمىش وڭىرگە جۇمىس ساپارى جوسپارلانىپ وتىرعانىن ايتتى. ۆيتسە-پرەمەر ساپار اياسىندا كوكارال بوگەتىن, ارال بالىق وڭدەۋ زاۋىتىن, ءوڭىردىڭ باسقا دا الەۋمەتتىك ماڭىزدى شارۋاشىلىق نىساندارىن ارالاماق. سونداي-اق پرەمەر-ءمينيستردىڭ ءبىرىنشى ورىنباسارى باقىتجان ساعىنتاەۆ, قورشاعان ورتانى قورعاۋ ءمينيسترى نۇرلان قاپپاروۆ, ۇلتتىق عارىش اگەنتتىگىنىڭ ءتوراعاسى تالعات مۇساباەۆ جانە باسقالار «پروتون-م» زىمىران تاسىعىشى قۇلاعان جەردە بولىپ, ونداعى جاعدايدى ءوز كوزدەرىمەن كورىپ قايتادى. بايقوڭىر قالاسىندا وسى اپاتتىڭ سالدارىن جويۋ جونىندەگى كوميسسيانىڭ جۇمىس قورىتىندىسىنا ارنالعان كەڭەس وتكىزىلەدى دەپ جوسپارلانۋدا.
بريفينگ بارىسىندا قازاقستان رەسپۋبليكاسىنىڭ اۋداندىق ماڭىزى بار قالالارى, اۋىلدىق وكرۋگتەرى, اۋىلدىق وكرۋگتەردىڭ قۇرامىنا كىرمەيتىن كەنتتەرى مەن اۋىلدارى اكىمدىگىنە كانديداتتاردى ۇسىنۋ اياقتالعاننان كەيىن, 24 شىلدەدە كانديداتتار ۇگىت-ناسيحات شارالارىنا كىرىسكەنى, قازاقستان بويىنشا بارلىعى 2 457 اكىم سايلاناتىنى, بۇل ەلىمىزدەگى بارلىق اكىمدەردىڭ 91,5% قۇرايتىنى ايتىلدى. ورتالىق كوممۋنيكاتسيالار قىزمەتى رەسمي وكىلىنىڭ حابارلاۋىنشا, رەسپۋبليكا بويىنشا ۇسىنىلعان 7173 ۇمىتكەردەن اكىمدىككە كانديداتتار رەتىندە 7018 ادام تىركەلىپتى. ال سايلاۋ 5-9 تامىز ارالاعىندا وتەدى.
بۇل كۇنگى جيىنعا «استانا ەكسپو-2017» ۇلتتىق كومپانياسىنىڭ كوممۋنيكاتسيالار جانە ماركەتينگ دەپارتامەنتىنىڭ ديرەكتورى اسەل قوجاقوۆا دا قاتىسىپ, EXPO-2017-ءنىڭ جاڭا لوگوتيپى ءۇشىن داۋىس بەرۋدىڭ ءناتيجەلەرىن جاريالادى. ونىڭ ايتۋىنا قاراعاندا, بۇل ۇلتتىق جوبا بولىپ تابىلاتىندىقتان, جاڭا لوگوتيپ تاڭداۋ قۇقىعىن قازاقستاندىقتاردىڭ وزدەرىنە قالدىرۋعا شەشىم قابىلدانعان. «بۇدان بۇرىن بەلگىلى بولعانىنداي, 9 بەن 22 شىلدە كۇندەرى ارالىعىندا «استانا ەكسپو-2017» ۇق» اق-تىڭ سايتىندا ەكسپو-2017 حالىقارالىق مامانداندىرىلعان كورمەسىنىڭ جاڭا لوگوتيپى ءۇشىن حالىقتىق داۋىس بەرۋى ءوتتى. ءتورت اي بويى 18 ەلدىڭ 27 ديزاينەرلەرى ەكسپو-2017 كورمەسىنىڭ جاڭا بەينەلەمەسىن جاساعان بولاتىن, بارلىعى 56 لوگوتيپ دايىندالدى. ونىڭ ىشىندە ەڭ ۇزدىك دەگەن جەتەۋى ىرىكتەلىپ, حالىق نازارىنا ۇسىنىلدى. ەكسپو-2017 حالىقارالىق مامانداندىرىلعان كورمەسىن دايىنداۋ مەن وتكىزۋ جونىندەگى مەملەكەتتىك كوميسسيانىڭ شەشىمىمەن ەكسپو-2017 حالىقارالىق مامانداندىرىلعان كورمەسىنىڭ جاڭا فيرمالىق بەلگىسى رەتىندە «جەل ەنەرگياسى» لوگوتيپى بەكىتىلدى», دەدى اسەل قوجاقوۆا.
ال بريفينگكە قاتىسقان «قازاگرو» ۇلتتىق باسقارۋشى حولدينگ» اق باسقارما توراعاسىنىڭ ورىنباسارى داۋرەن ماقاجانوۆ حولدينگتىڭ اگروونەركاسىپتىك كەشەندى يندۋستريالىق دامىتۋدى ىنتالاندىرۋ باعىتىنداعى مەملەكەتتىك ساياساتىمەن, نەسيەلەندىرۋ, وتاندىق وندىرىسكە, اۋىلداعى شاعىن جانە ورتا بيزنەسكە كورسەتىلەتىن قولداۋ شارالارىمەن تانىستىردى.
ءلايلا ەدىلقىزى,
«ەگەمەن قازاقستان».
