حالىققا ستاتسيونارلىق كومەك تەگىن مەديتسينالىق كومەكتىڭ كەپىلدەندىرىلگەن كولەمى اياسىندا شۇعىل كورسەتىلەدى جانە مىنالاردى قامتيدى:
- تەكسەرۋلەر, ماماننىڭ كەڭەستەرى, سونىڭ ىشىندە تەلەمەديتسينا بايلانىسىن قولدانۋ;
- دەنساۋلىق ستاندارتتارىنا سايكەس زەرتحانالىق جانە اسپاپتىق زەرتتەۋلەر;
- مەديتسينالىق قىزمەتتەر (اقىلى قىزمەتتەردى قوسپاعاندا), مەديتسينالىق سەبەپتەرگە سايكەس دارىلىك پرەپاراتپەن قامتاماسىز ەتۋ;
- مەديتسينالىق ماقساتتا قان پرەپاراتتارىمەن جانە ونىڭ كومپونەنتتەرىمەن قامتاماسىز ەتۋ;
- مەديتسينالىق ۇيىمدا انانىڭ (اكەنىڭ) نەمەسە ءۇش جاسقا دەيىنگى بالانى تىكەلەي باعىپ وتىرعان باسقا ادامنىڭ, سونداي-اق دارىگەرلەردىڭ قورىتىندىسى بويىنشا قوسىمشا كۇتىمدى قاجەت ەتەتىن اۋىر ناۋقاستانعان ۇلكەن بالالاردىڭ ۋاقىتشا ەڭبەككە جارامسىزدىق پاراعى بەرىلۋىمەن قامتاماسىز ەتۋ;
- بالانى كۇتۋ ءۇشىن مەديتسينالىق ۇيىمدا ءبىر جاسقا دەيىنگى بالا ەمىزەتىن انانى اقىسىز تاماقپەن قامتاماسىز ەتۋ;
- ۋاكىلەتتى ورگان بەكىتكەن مەديتسينالىق كومەكتى ۇيىمداستىرۋ ستاندارتتارىنا سايكەس, ونىڭ ىشىندە بالالار مەن ازاماتتاردىڭ الەۋمەتتىك ءالسىز ساناتتارىنا كەش جانە جالعاستىرىلاتىن مەديتسينالىق وڭالتۋ;
- بالالاردىڭ ستاتسيونارلىق مەديتسينالىق ۇيىمدارىندا ويىندار, دەمالۋ جانە تاربيە جۇمىستارى ءۇشىن قاجەتتى جاعدايلار جاساۋ;
- پاللياتيۆتىك كومەك جانە مەيىربيكەلىك كومەك.
جوسپارلى ستاتسيونارلىق كومەك مىندەتتى الەۋمەتتىك مەديتسينالىق ساقتاندىرۋ اياسىندا كورسەتىلەدى جانە وعان مىناداي قىزمەتتەر كىرەدى:
- مەديتسينالىق كورسەتكىشتەر بويىنشا بەيىندى مامان تەكسەرەدى, كونسۋلتاتسيا جاسايدى;
- دياگنوستيكالىق قىزمەتتەر;
- اۋرۋ اسقىنعاندا, ومىرگە قاۋىپ توندىرەتىن دەرتتى دارىلىك زاتتار, مەديتسينالىق بۇيىمدار ارقىلى, مەديتسينالىق مانيپۋلياتسيا, حيرۋرگيالىق وپەراتسيامەن ەمدەۋ;
- قانمەن, ونىڭ كومپونەنتتەرىمەن قامتاماسىز ەتۋ;
- جوعارى تەحنولوگيالىق مەديتسينالىق قىزمەتتەردى قولدانۋ;
- بمسك مامانىنىڭ نەمەسە مەديتسينالىق ۇيىمنىڭ جولداماسى بويىنشا مەديتسينالىق وڭالتۋ جانە قالپىنا كەلتىرۋ ەمى;
- ادامنىڭ ەڭبەككە ۋاقىتشا جارامسىز ەكەنىن راستايتىن ساراپتاما;
- ەمدىك تاماقتانۋ;
- پاتسيەنتتى ستاتسيونار پالاتاسىندا توسەك-ورىنمەن قامتاماسىز ەتۋ;
- ءۇش جاسقا تولماعان بالانىڭ, قوسىمشا كۇتىمگە مۇقتاج ەرەسەك بالالاردىڭ اۋرۋحانادا اناسى, اكەسى نەمەسە وزگە دە جاقىنىمەن بىرگە جاتۋىنا رۇقسات ەتۋ, ەڭبەككە ۋاقىتشا جارامسىزدىق پاراعىن بەرۋ;
- ءبىر جاسقا تولماعان بالا ەمىزەتىن اناعا مەديتسينالىق ۇيىمدا تەگىن تاماق بەرۋ;
- ستاتسيونارلىق مەديتسينالىق ۇيىمداردا بالالارعا ارنالعان ويىن الاڭىن, دەمالىس جانە تاربيە جۇمىستارىن جۇرگىزەتىن ورىندار اشۋ.
ەڭ الدىمەن «حالىققا جوسپارلى تۇردە ستاتسيونارلىق كومەك كورسەتۋدىڭ» بيزنەس جوسپارىن قاراستىرايىق.
پاتسيەنت جوسپارلى تۇردە ستاتسيونارعا جاتۋ ءۇشىن بمسك مامانى جولداما بەرۋ كەرەك نەمەسە اقپاراتتىق جۇيەدەگى كۇتۋ پاراقشاسىنا تىركەلىپ, جوسپارلى ەمگە تالون الادى.
ستاتسيونار مامانى كۇن سايىن جوسپارلى ەمگە جولداما العان پاتسيەنتتەر ءتىزىمىن قاراپ وتىرادى. ءسويتىپ, اۋرۋحاناداعى بوساعان ورىنداردى مەديتسينالىق اقپاراتتىق جۇيەدەگى پورتالعا ەنگىزەدى, ول مالىمەت 9 جارىم ساعات ساقتالادى. مەديتسينالىق ۇيىم پاتسيەنتتى قابىلداۋ بولىمىندە جۇمىس كەستەسىنە سايكەس 60 مينۋتتىڭ ىشىندە قابىلداپ, تىركەيدى. ەگەر اۋرۋ احج 10 كودتارىنا سايكەس كەلمەسە, وندا تاۋلىك بويى دارىگەردىڭ باقىلاۋىنا مۇقتاج ناۋقاس جايلى مالىمەت اقپاراتتىق جۇيەگە جانە 907 بۇيرىق بويىنشا 003 ۋ پاراعىنا ەنگىزىلەدى. قاجەت بولعان جاعدايدا قابىلداۋ بولىمشەسىندە كونسيليۋم ۇيىمداستىرىلادى.
ناۋقاس تولىق تەكسەرۋدەن وتكەن سوڭ جانە قارسى كورسەتكىشتەر انىقتالماسا, بەيىندى بولىمشەگە جاتقىزىلادى. ەگەر ەمدەلۋگە جاتۋدىڭ قاجەتى بولماسا, قابىلداۋ بولىمشەسىنىڭ دارىگەرى پاتسيەنتكە مەديتسينالىق قورىتىندى جازىپ بەرەدى. ال مەيىربيكە پاتسيەنتتى تىركەلگەن جەرى بويىنشا بمسك ۇيىمىنا جىبەرەدى.
پاتسيەنت پەن مەديتسينالىق ۇيىم اراسىندا مەديتسينالىق كومەك كورسەتۋ بويىنشا شارت جاسالادى. پاتسيەنت نەمەسە ونىڭ زاڭدى وكىلى ەمدەۋ-دياگنوستيكاعا جازباشا كەلىسكەننەن كەيىن عانا مەديتسينالىق كومەك كورسەتىلەدى. ال ادام قاتتى قورقىپ, كوماتوزدىق كۇيدە بولعاندا; اينالاسىنداعىلارعا قاۋىپ توندىرەتىن اۋرۋعا شالدىققاندا; پسيحيكاسى بۇزىلعان جاعدايدا كەلىسىمسىز جانە ناۋقاستىڭ جاعدايى جاقسارعانشا مەديتسينالىق كومەك كورسەتىلەدى.
دارىگەر پاتسيەنتتى تۇسكەن كۇنى قارايدى, وعان قاجەتتى ەم جازادى جانە تاعايىندالعان دياگنوستيكالىق ەمدى تۇسىندىرەدى. دەمالىس, مەرەكەدەن باسقا ۋاقىتتا كۇن سايىن تەكسەرەدى. پاتسيەنت اۋرۋحاناعا جاتقاننان باستاپ 3 كۇننىڭ ىشىندە بولىمشە مەڭگەرۋشىسىمەن بىرگە كلينيكالىق دياگنوز قويىلادى. قوسىمشا دياگنوستيكالىق جانە ەمدىك قىزمەت تاعايىندالسا, كەزەكشى دارىگەر مەديتسينالىق كارتاعا جازادى. پاتسيەنتتىڭ جاعدايى ناشارلاسا, كەزەكشى دارىگەر مەڭگەرۋشىگە, ەمدەۋشى دارىگەر نەمەسە جاۋاپتى كەزەكشى دارىگەر حابارلايدى. دياگنوستيكا مەن ەمدەۋ پروتسەسىنە وزگەرىستەر ەنگىزەدى جانە ونى مەديتسينالىق كارتا مەن اقپاراتتىق جۇيەگە ەنگىزەدى.
ناۋقاس مىناداي كريتەريلەر بويىنشا ستاتسيوناردان شىعارىلادى:
1) ساۋىعىپ كەتسە, جاعدايى جاقسارسا نەمەسە وزگەرىس بايقالماسا, قايتىس بولسا, باسقا مەديتسينالىق ۇيىمعا اۋىستىرىلسا;
2) اۋرۋ ناۋقاستىڭ ومىرىنە نەمەسە اينالاسىنداعىلارعا تىكەلەي قاۋىپتى بولماسا, پاتسيەنتتىڭ نەمەسە ونىڭ زاڭدى وكىلىنىڭ جازباشا وتىنىشىمەن.
3) دەنساۋلىق ساقتاۋ ۇيىمىنىڭ ىشكى ءتارتىبىن بۇزسا, سونداي-اق ەمدەۋ-دياگنوستيكالىق پروتسەسىنە كەدەرگى كەلتىرسە, باسقا پاتسيەنتتەردىڭ مەديتسينالىق كومەك الۋىنا قىسىم جاساسا.
ستاتسيوناردان شىعار الدىندا پاتسيەنتكە № 907 بۇيرىقپەن بەكىتىلگەن 027/ە فورماسى بەرىلەدى, وندا كلينيكالىق دياگنوزدىڭ قورىتىندىسى, دياگنوستيكالىق زەرتتەۋلەردىڭ, ەمدەۋ ءىس-شارالاردىڭ كولەمى, ءارى قاراي باقىلاۋ جانە ەمدەۋ بويىنشا ۇسىنىمدار جازىلادى.
بۇدان ءارى پاتسيەنتكە امبۋلاتوريالىق-ەمحانالىق كومەك; بمسك بويىنشا كۇندىزگى ستاتسيوناردا مەديتسينالىق كومەك; تاۋلىك بويعى ستاتسيونار كەزىندە كۇندىزگى ستاتسيوناردا مەديتسينالىق كومەك جانە ەمدى جالعاستىرۋ ءۇشىن باسقا مەديتسينالىق ۇيىمعا اۋىستىرۋ قاراستىرىلادى.
ال اۋرۋحانادان شىققان ناۋقاس تۋرالى بار مالىمەت اقپاراتتىق جۇيەدە ستاتسيونارلىق ناۋقاستىڭ ەلەكتروندىق تىركەۋىنە ەنگىزىلەدى.
ەندى «حالىققا شۇعىل تۇردە ستاتسيونارلىق كومەك كورسەتۋدىڭ» بيزنەس جوسپارىنا كوشسەك.
پاتسيەنت شۇعىل ستاتسيونارلىق مەديتسينالىق كومەككە جەدەل مەديتسينالىق جاردەم قىزمەتىنىڭ, بمسك جانىنداعى جەدەل جاردەمنىڭ جانە سانيتارلىق اۆياتسيانىڭ ءموبيلدى بريگاداسى ارقىلى نەمەسە ءوز بەتىنشە جۇگىنە الادى. كەيدە پاتسيەنتتەردى ەمحانا, اۋرۋحاناعا ازاماتتار نەمەسە قۇقىق قورعاۋ ورگاندارىنىڭ قىزمەتكەرلەرى جەتكىزەدى. ناۋقاسقا جەدەل جاردەم كولىگى مەن سانيتارلىق اۆياتسيانىڭ بورتىندا دا مەديتسينالىق كومەك كورسەتىلەدى. ال پاتسيەنت ەمدەۋگە جاتقىزىلسا, قابىلداۋ ءبولىمىنىڭ دارىگەرى نەمەسە مەيىربيكە №450 بۇيرىققا سايكەس ترياج جۇيەسى بويىنشا بولەدى.
پاتسيەنت ءبىرىنشى توپقا تۇسسە, قارقىندى تەراپيا پالاتاسىندا نەمەسە وپەراتسيا بولمەسىندە جەدەل مەديتسينالىق كومەك كورسەتىلەدى. جاعدايى تۇراقتالعان كەزدە پاتسيەنت انەستەزيولوگيا, رەانيماتسيا جانە قارقىندى تەراپيا بولىمشەسىندە نەمەسە بەيىندى بولىمگە جىبەرىلەدى.
ەكىنشى توپتاعى پاتسيەنت دياگنوستيكالىق پالاتادا ەمدەلەدى. ديناميكالىق باقىلاۋ قاجەت بولسا, ناۋقاس 24 ساعاتقا دەيىن دياگنوستيكالىق پالاتادا بولادى. وسى ارالىقتا تولىق جەدەل مەديتسينالىق دياگنوستيكالىق كومەك كورسەتىلەدى.
ءۇشىنشى توپتاعى پاتسيەنتتى قابىلداۋ بولىمىندەگى تەكسەرۋ كابينەتىنە جىبەرەدى. ول جەردە ەمدەۋ ءتاسىلى انىقتالادى, دياگنوز قويىلعانعا دەيىن ەمدىك جانە دياگنوستيكالىق قىزمەت كورسەتىلەدى.
قاجەت بولعان جاعدايدا قابىلداۋ بولىمشەسىندە كونسيليۋم ۇيىمداستىرىلادى. ياعني, كەمىندە ءۇش جوعارى بىلىكتى نەمەسە بەيىندى مامان بىرلەسىپ دياگنوز قويادى, اۋرۋدى ەمدەۋ ءتاسىلىن انىقتاۋ, بولجام جاساۋ ءۇشىن پاتسيەنتتى قوسىمشا تەكسەرەدى.
ەگەر پاتسيەنت ەمدەۋدەن باس تارتسا, قابىلداۋ ءبولىمىنىڭ دارىگەرى 907 بۇيرىققا سايكەس ناۋقاستىڭ جازباشا ءوتىنىشى نەگىزىندە مەديتسينالىق انىقتاما بەرەدى.
پاتسيەنت ەمدەلۋ ءۇشىن اۋرۋحاناعا جاتسا, وندا №907 بۇيرىققا سايكەس مەديتسينالىق 003 /ە كارتاسى تولتىرىلادى. قابىلداۋ كۇنى دارىگەر ناۋقاستى تەكسەرىپ, ەم تاعايىندايدى. جانە پاتسيەنتتى ەمدەۋ‐دياگنوستيكالىق شارالار جايلى حاباردار ەتەدى. دارىگەر دەمالىس, مەرەكەنى قوسپاعاندا, كۇن سايىن تەكسەرەدى.
پاتسيەنت ەمدەلۋگە جاتقان ساتتەن باستاپ ءۇش كۇن ىشىندە بولىمشە مەڭگەرۋشىسى مەن دارىگەر كلينيكالىق دياگنوز قويادى. كەزەكشى دارىگەر قوسىمشا دياگنوستيكالىق جانە ەمدىك پروتسەدۋرالار تاعايىنداعاننان كەيىن مەديتسينالىق جازبا تولتىرادى. ەگەر ناۋقاستىڭ جاعدايى ناشارلاسا, كەزەكشى دارىگەر ءبولىم باسشىسىنا, ەمدەۋشى دارىگەرگە نەمەسە كەزەكشى جاۋاپتى دارىگەرگە حابارلايدى. دياگنوستيكا مەن ەمدەۋ پروتسەسىنە وزگەرىستەر ەنگىزۋ تۋرالى شەشىم قابىلدانىپ, ستاتسيونارلىق ناۋقاستاردىڭ ەلەكتروندىق تىركەلىمى اقپاراتتىق جۇيەگە ەنگىزەدى.
پاتسيەنت مىناداي جاعدايدا ستاتسيوناردان شىعارىلادى: 1) ناۋقاس ساۋىعىپ, جاعدايى جاقسارسا نەمەسە وزگەرىس بايقالماسا, قايتىس بولسا, باسقا اۋرۋحاناعا اۋىسسا; 2) پاتسيەنتتىڭ ومىرىنە جانە اينالاسىنداعىلارعا قاۋىپ تونبەسە, ەمدەۋ كۋرسى اياقتالعانعا دەيىن پاتسيەنتتىڭ نەمەسە وعان جاۋاپتى زاڭدى تۇلعانىڭ جازباشا ءوتىنىشى ارقىلى; 3) ناۋقاس دەنساۋلىق ساقتاۋ ۇيىمىنىڭ ىشكى ءتارتىبىن بۇزسا, سونداي‐اق ەمدەۋ-دياگنوستيكالىق پروتسەسكە كەدەرگى كەلتىرسە, باسقا پاتسيەنتتەردىڭ مەديتسينالىق كومەك الۋ قۇقىعىنا قىسىم جاساعان جاعدايدا.
