ءىس-شارادا ءسوز سويلەگەن م.اشىمباەۆ كادر رەزەرۆىن انىقتاۋدىڭ ماڭىزىنا توقتالىپ, ماقساتى مەن مىندەتىن اتاپ كورسەتتى.
«مەملەكەت باسشىسى قاسىم-جومارت توقاەۆتىڭ ماڭىزدى باستامالارىنىڭ ءبىرى – پرەزيدەنتتىك كادر رەزەرۆىن جاساقتاۋ. مۇنى العاش رەت سايلاۋالدى باعدارلاماسىندا جاريالاعان بولاتىن. پرەزيدەنت تاپسىرماسىنا سايكەس بىرنەشە اي بويى اۋقىمدى جۇمىس اتقارىلدى. ساراپتامالىق كوميسسيا ۇسىنعان كانديداتتار قارالىپ, 300 قازاقستاندىق جاس ىرىكتەلىپ الىندى», دەدى پرەزيدەنت اكىمشىلىگى باسشىسىنىڭ ءبىرىنشى ورىنباسارى.
م.اشىمباەۆتىڭ سوزىنە قاراعاندا, رەزەرۆكە ەنگەن جاستار مەملەكەتتىك باسقارۋ جۇيەسىندەگى جاۋاپتى قىزمەتتەرگە تاعايىندالادى. مۇنداعى باستى ماقسات – بىلىكتى باسشىلاردىڭ جاڭا بۋىنىن قالىپتاستىرۋ جانە جاستار ءۇشىن الەۋمەتتىك ءليفتىنىڭ ۇتىمدى جۇيەسىن قۇرۋ.
«بۇل رەزەرۆ مەملەكەتتىك قىزمەت سالاسىن جاڭارتۋعا, وزىق ويلى جاس كوشباسشىلاردى جۇمىلدىرۋعا جانە جاستاردى ىنتالاندىرۋعا مۇمكىندىك بەرەدى. بىراق مۇنى جوعارى لاۋازىمعا ۇسىنىلاتىن توپ دەپ قاراۋعا بولمايدى. بۇل جوبا جاستاردى حالىققا شىن نيەتىمەن قىزمەت ەتۋگە ىنتالاندىرۋى ءتيىس», دەدى پرەزيدەنت اكىمشىلىگى باسشىسىنىڭ ءبىرىنشى ورىنباسارى.
م.اشىمباەۆ اتالعان جوبا ءبىر كۇندىك باستاما ەمەس ەكەنىن اتاپ ءوتتى. بۇل – ەلىمىزدەگى باسقارۋ جۇيەسىن جاڭعىرتۋدىڭ ناقتى تەتىگى جانە ۇزاقمەرزىمدى ساياسات.
«ىرىكتەۋدەن وتكەندەر جاۋاپتى قىزمەتتەرگە تاعايىندالادى. بۇل جوبا كەيىن دە جالعاسادى. باسقا دا جاستار كادرلىق رەزەرۆكە ەنەدى. جالپى, پرەزيدەنت بۇل جۇمىستى جالعاستىرۋ تۋرالى ناقتى تاپسىرما بەردى», دەدى ول.
جوباعا 300 ادام عانا ىرىكتەلسە دە, تىزىمگە ەنبەي قالعان جاستار نازاردان تىس قالمايدى. ولار كەلەسى ىرىكتەۋدە قايتادان قۇجات تاپسىرا الادى. قازىرگى جەڭىمپازدار رەزەرۆتە 5 جىل بولادى. «جاستار ءوسىپ كەلەدى. جاڭارۋ پروتسەسى جۇرەدى. سول سەبەپتى ىرىكتەۋ ەرتە ءوتۋى مۇمكىن. ونىڭ ناقتى ۋاقىتى, جيىلىگى ۇلتتىق كوميسسيانىڭ وتىرىسىندا شەشىلەدى. ازىرگە 300 جاستى دامىتۋ, قۇزىرەتىن ارتتىرۋ جۇمىستارى كۇتىپ تۇر», دەدى م.اشىمباەۆ.
جيىن بارىسىندا پرەزيدەنتتىك جاستار كادر رەزەرۆىنە ىرىكتەلگەندەردىڭ كەلەشەگى تۋرالى دا ءسوز بولدى.
«جالپى, ۇمىتكەردىڭ ءبارى بىردەن تاعايىندالمايتىنىن ەسكەرۋ كەرەك. جاقىن ارادا پرەزيدەنتتىك جاستار كادر رەزەرۆىنە قاتىسۋشىلار مەملەكەتتىك ورگاندار مەن ۇلتتىق كومپانيالاردا ءارتۇرلى پوزيتسيادا جۇمىس ىستەي باستايدى. قاتىسۋشىلاردىڭ كەيبىرى كارەراسىن جەكە سەكتوردا جالعاستىرۋدى كوزدەۋى مۇمكىن. بۇل – ولاردىڭ قۇقىعى. ول سالاعا دا جاقسى ماماندار قاجەت», دەدى م.اشىمباەۆ.
سونداي-اق ول جۇمىسقا ورنالاسۋ مەحانيزمى قالاي جۇزەگە اساتىنىن دا اڭگىمەلەپ بەردى. بىرىنشىدەن, جاريالانعان ءتىزىم مەن سوعان سايكەس قۇجاتتار اكىمدەرگە, مينيسترلەرگە, مەملەكەتتىك ورگان باسشىلارىنا جىبەرىلەدى. ولار ءتىزىمدى قاراپ, جاس مامانداردى وزدەرىنە جۇمىسقا شاقىرادى.
«ەكىنشىدەن, پرەزيدەنت اكىمشىلىگى ءوز قۇزىرەتى شەگىندە كەي مەكەمەلەرگە ءتيىستى مامانداردى ۇسىنادى. ۇشىنشىدەن, مەملەكەت باسشىسى قاسىم-جومارت توقاەۆ پرەزيدەنتتىك جاستار كادر رەزەرۆى بويىنشا شەشىم قابىلداپ, جاۋاپتى مەملەكەتتىك پوزيتسياعا تاعايىنداۋى مۇمكىن. وسى باعىتتار بويىنشا جۇمىس كەلەسى جىلدان باستالادى. ونى پرەزيدەنت اكىمشىلىگى باقىلايدى», دەدى پرەزيدەنتى اكىمشىلىگى باسشىسىنىڭ ءبىرىنشى ورىنباسارى.
مەملەكەتتىك قىزمەت ىستەرى اگەنتتىگىنىڭ توراعاسى ا.جايىلعانوۆا ءوز سوزىندە ىرىكتەۋ جۇمىستارى قالاي جۇرگىزىلگەنى, كادرلىق رەزەرۆكە ءوتىنىش بەرگەندەر تۋرالى ايتىپ بەردى. «مەملەكەت باسشىسى قاسىم-جومارت توقاەۆتىڭ «يگىلىك بارشاعا! ساباقتاستىق. ادىلدىك. ورلەۋ» سايلاۋالدى باعدارلاماسىندا اگەنتتىكتىڭ الدىنا پرەزيدەنتتىك جاستار كادر رەزەرۆىن قالىپتاستىرۋ مىندەتى قويىلدى. بۇگىن ءبىز پرەزيدەنتتىك جاستار كادر رەزەرۆىنە ىرىكتەۋدىڭ اياقتالعانىن قۋانىشپەن حابارلايمىز», دەدى ا.جايىلعانوۆا.
پرەزيدەنت باستاماسىنا العاشىندا 13 مىڭنان استام قازاقستاندىق قاتىسۋعا نيەت بىلدىرگەن. قاتىسۋشىلارعا وتىز بەس جاستان اسپاعان, جوعارى ءبىلىمى جəنە بەس جىلدان كەم ەمەس ەڭبەك ءوتىلى بار قازاقستان ازاماتى بولۋى ءتيىس دەگەن تالاپتار قويىلدى.
«جەڭىمپازدار اراسىندا جەكە سەكتوردىڭ – 106 وكىلى, كۆازيمەملەكەتتىك سەكتوردىڭ – 98 قىزمەتكەرى جانە 96 مەملەكەتتىك قىزمەتكەر بار. كانديداتتاردىڭ 58 پايىزى شەتەلدىك وقۋ وردالارىندا ءبىلىم العان. 42 پايىزى – قازاقستاندىق جوو تۇلەكتەرى. 6 ادام – عىلىم دوكتورى, 204 ادام ماگيستر دارەجەسىنە يە», دەدى ا.جايىلعانوۆا.
اگەنتتىك توراعاسىنىڭ ايتۋىنشا, ىرىكتەۋ جەڭىمپازدارىنىڭ ورتاشا جاسى 31-ءدى قۇراعان. سونداي-اق ولار ءتۇرلى سالادا ايتارلىقتاي تاجىريبەگە يە. ىرىكتەۋدەن وتكەندەردىڭ كوبى ءىرى شەتەلدىك جانە ترانسۇلتتىق كومپانيالاردا جۇمىس ىستەگەن, ءالى دە جۇمىس ىستەيتىندەرى بار.
«رەزەرۆ ىرىكتەۋىنە شەتەلدە جۇرگەن قازاقستاندىقتار دا بەلسەنە قاتىستى. ەلىمىزدىڭ بارلىق ايماقتارىنان, سونداي-اق شەتەلدەردە جۇمىس ىستەيتىن قازاقستاندىقتاردان ءوتىنىش كەلىپ ءتۇستى. وڭىرلەر اراسىندا ۇمىتكەرلەردىڭ ەڭ كوبى الماتى (46), قاراعاندى (41) جانە شىعىس قازاقستان وبلىسىنا (30) تيەسىلى», دەدى اگەنتتىك باسشىسى.
بۇدان كەيىن ءسوز العان مەملەكەتتىك باسقارۋ اكادەمياسىنىڭ رەكتورى ە.ءابىل كادر رەزەرۆىندەگى كانديداتتار پرەزيدەنت جانىنداعى مەملەكەتتىك باسقارۋ اكادەمياسى جانە باسقا دا ۇيىمداردا بىلىكتىلىگىن ارتتىرا الاتىنىن جەتكىزدى.
ء«وزىڭدى ۇزدىكسىز دامىتىپ وتىرۋ – جەتىستىككە جەتۋ مەن ەڭبەككە قابىلەتتى بولۋدىڭ كەپىلى. قاتىسۋشىلاردا وزدەرىنىڭ دامۋ دەڭگەيىن كورۋ مۇمكىندىگى بار. ءار رەزەرۆشى كەزەڭ سايىن قانداي ناتيجە كورسەتكەنى تۋرالى ەسەپ الىپ وتىردى. بۇل – قۇرعان جوسپاردىڭ دامۋىنىڭ نەگىزى», دەدى ەرلان ءابىل.
ونىڭ ايتۋىنشا, مەملەكەتتىك باسقارۋ سالاسىنا ارنالعان «ويلاۋ ديزاينى», «ەموتسيونالدى ينتەللەكت», «ستراتەگيالىق مەنەدجمەنت», «جوبالىق مەنەدجمەنت», «بيزنەس-پروتسەستەردى جۇزەگە اسىرۋ» جانە تاعى دا باسقا ترەنينگتەر جوباسى جاسالعان. بۇل باعدارلامالاردىڭ ترەنەرلەرى – وتاندىق جانە شەتەلدىك جەتەكشى ساراپشىلار. ولاردىڭ كاسىبي دەڭگەيلەرى جوعارى. رەزەرۆتەگىلەر وسى ترەنينگتەردىڭ ءبىرىن تاڭداپ, كاسىبي بىلىكتىلىگىن ارتتىرماق.
ەستەرىڭىزگە سالا كەتەيىك, پرەزيدەنتتىك جاستار كادر رەزەرۆىنە تىركەلۋ بيىلعى قىركۇيەك ايىندا باستالدى. جوبانىڭ ستراتەگيالىق ماقساتى – ءتيىمدى مەنەدجەرلەردىڭ جاڭا تولقىنىن قالىپتاستىرۋ جانە ەلىمىزدىڭ جاڭا بۋىنى ءۇشىن پارمەندى الەۋمەتتىك ليفتىلەر جۇيەسىن قۇرۋ. ىرىكتەۋ ناتيجەلەرى بويىنشا پۋلعا جاڭا فورماتسيانىڭ باسقارۋشىلارى بولۋعا قابىلەتتى تالانتتى جانە كرەاتيۆتى جاس قازاقستاندىقتار ىرىكتەلدى.
ىرىكتەۋ اشىق ءارى ءادىل ءوتتى
اقەركە بەرلىباي,
پرەزيدەنت جانىنداعى مەملەكەتتىك باسقارۋ اكادەمياسىنىڭ ءباسپاسوز حاتشىسى:
– جوبا ۇيىمداستىرۋشىلارىنىڭ ءبىرى رەتىندە جوبانىڭ تۇجىرىمداماسىن دايىنداعان كۇننەن باستاپ باسى-قاسىندا ءجۇرمىن. شىنىمەن دە بۇل – بىرەگەي جوبا. ىرىكتەۋ اشىق ءارى ءادىل ءوتتى دەپ تولىق سەنىممەن ايتا الامىن. ءۇمىتىمىز اقتالدى, سەبەبى بۇل جوباعا شەتەلدىك جاستاردىڭ دا قىزىعۋشىلىعى جوعارى بولدى. بايقاۋ جاريالانعاندا 13 مىڭنان استام ادام ءوتىنىم بەردى. 7312 ادام تولىق تىركەلىپ, ءبىرىنشى كەزەڭگە ءوتتى. ولاردىڭ ماقساتى ايقىن, جوبادان نە كۇتەتىنىن انىق بىلەدى. ال بارلىق كەزەڭنەن سۇرىنبەي وتكەن 300 قاتىسۋشىنىڭ بولاشاعى جارقىن دەر ەدىم. سەبەبى ولار – تالانتتى, اقىلدى, بىلىكتى ماماندار. مەن ولاردىڭ ارقايسىسىن جەكە تانيمىن, ءارتۇرلى كەزەڭدە ولارمەن سويلەسىپ, سۇحبات الدىم.
ىرىكتەۋدەن وتكەن 300 ادامنىڭ 96-سى – مەملەكەتتىك قىزمەتشىلەر. كوبى جەكە سەكتوردان قاتىسۋشىلار. پرەزيدەنتىمىز قاسىم-جومارت توقاەۆ مەملەكەتتىك قىزمەتتىڭ اشىق بولعانىن قالاپ, قالىپتاسىپ قالعان ستەرەوتيپتەردى بۇزعىسى كەلسە, ىرىكتەلگەن 300 ادام وسى تالاپتارعا تولىق ساي كەلەدى. ولار مەملەكەتتىك قىزمەتتەگى ستەرەوتيپتەردى جويىپ, مەملەكەتتىك قىزمەت سالاسىن وزگەرتەتىن جاڭا كوشباسشىلار بولادى دەگەن ءۇمىتىمىز بار.
كادرلىق رەزەرۆ – ەل جاستارىنا كومەك
ەرلان سايروۆ,
ەۋرازيالىق ينتەگراتسيا ينستيتۋتىنىڭ ديرەكتورى:
– بۇل – ەل جاستارىنا قوعامدىق جانە الەۋمەتتىك كومەك جاساۋداعى نەگىزگى قادامداردىڭ ءبىرى. حالىقتىڭ جارتىسىنان كوبى جاستار, بىراق مەملەكەتتىك جانە باسقا ورگانداردا ولاردىڭ ۇلەس سالماعى از. سوندىقتان پرەزيدەنتتىڭ بۇل قادامى جاستار ءۇشىن كادرلىق ادىلەتتىلىك ورناتۋعا باعىتتالعان دەپ ويلايمىن. پرەزيدەنتتىڭ جاستار رەزەرۆىنە ىرىكتەۋ ءادىل ءوتتى. مەنىڭ ويىمشا, ەندىگى كەزەكتە ولاردى نۇر-سۇلتان مەن الماتى قالالارىنا عانا ەمەس, ايماقتارعا دا جىبەرىپ, تاجىريبەدەن وتكىزگەن دۇرىس.
ءوزىمىزدى ءارتۇرلى قىرىمىزدان كورسەتە الدىق
داۋلەت كارىبەك,
Nur Otan پارتياسى Jas Otan جاستار قاناتىنىڭ توراعاسى:
– باستى ماقسات – پرەزيدەنتتىك كادرلىق رەزەرۆىنە وتكەن 300 ادامنىڭ تاعايىندالۋى ەمەس, مەملەكەتشىل, وتانشىل جاستاردىڭ جۇمىس وتىلىنە قاراماي, مەملەكەتتىك يدەيانى جۇزەگە اسىرۋىنا, مەملەكەتتىك قىزمەت ىستەرىنە ارالاسۋىنا مۇمكىندىك بەرۋ. پرەزيدەنتتىك كادرلىق رەزەرۆ دەر كەزىندە جاساقتالدى. سەبەبى 2050 جىلى قازاقستاندا ءومىر سۇرەتىن دە, ونى ۇزدىك وتىز ەلدىڭ قاتارىنا ەنگىزۋگە تىرىساتىن دا – قازىرگى جاستار. سوندىقتان جاستاردى مەملەكەتتىك قىزمەتكە تارتۋدىڭ وسىنداي مەحانيزمدەرى جاستار تاراپىنان جىلى قابىلداندى. جاستار دا جوباعا قاتىسۋشى رەتىندە عانا ەمەس, باعىندىرار بەلەس رەتىندە, ءبىلىمى مەن تاجىريبەسىنىڭ, بىلىكتىلىگىنىڭ سىنعا تۇسەتىن كەزەڭى دەپ قارادى. باستاپقى كەزەڭدەرى قيىن بولدى, ۆەربالدى تەست وڭاي بولعانىمەن, ماتەماتيكالىق تەست كۇندە شەشىپ جۇرمەگەندىكتەن, قيىنعا سوقتى. كەلەسى كەزەڭدەردە دايىندىقتى كۇشەيتىپ, ءوزىمىزدى جان-جاقتى كورسەتۋگە تىرىستىق. كەي سىناقتار ويىن تۇرىندە ءوتتى, اقپاراتتىق جوبا قورعادىق. ءاربىر تاپسىرعان تەستىمىزدىڭ بەينەكامەراعا جازىلۋى دا ىرىكتەۋدىڭ اشىقتىعىن, ادىلدىگىن كورسەتتى. وسىلايشا, ۇمىتكەرلەر ءاربىر كەزەڭدە ءوزىن ءتۇرلى قىرىنان كورسەتە الدى.
