استانادا تەننيستەن ەرلەر جانە ايەلدەر اراسىندا قازاقستان رەسپۋبليكاسى پرەزيدەنتىنىڭ كۋبوگى جولىنداعى تۋرنير اياقتالدى.
بۇل باسەكەدە ءبىزدىڭ سپورتشىلارىمىزدىڭ ىشىنەن تەك ميحايل كۋكۋشكين عانا فينالعا شىعىپ, باس جۇلدە ءۇشىن يزرايلدىك دۋدي سەلامەن كۇش سىناستى. باسقالارى تۋرنير كەزىندە بىرىنەن سوڭ ءبىرى ۇتىلىپ قالدى. ال كۋكۋشكين اقتىق سىندا جاراقاتىنا قاراماي, لايىقتى دەڭگەيدە ونەر كورسەتتى. ول ءبىرىنشى سەتتە قارسىلاسىن 7:5 ەسەبىمەن جەڭىپ, كەلەسى سەتتە 2:6 ەسەبىمەن ۇتىلۋعا ءماجبۇر بولدى. كەزدەسۋدىڭ ءۇشىنشى سەتى كۋكۋشكين ءۇشىن وتە اۋىر ءتيدى. ول بۇرىننان بەرى ءوزىن مازالاپ جۇرگەن ارقاداعى جاراقاتىن كورسەتۋ ءۇشىن دارىگەردىڭ كومەگىنە جۇگىندى. مەديتسينالىق كومەك بەرگەننەن كەيىن كۋكۋشكين قايتا كۇش جيناپ, وزىنە كەلگەنىمەن, كەزدەسۋدىڭ سوڭىنا قاراي تىزگىندى قولدان شىعارىپ الدى. ءسويتىپ, ەسەپ 7:6 بولىپ سەلانىڭ پايداسىنا شەشىلدى.
ايەلدەر جارىسىندا ۋكراينالىق ناديا كيچەنو پورتۋگاليالىق ماريا جواو كوحلەردى ەكى سەتتە 6:4 جانە 7:5 ەسەبىمەن ۇتىپ, جەڭىمپاز اتاندى. جۇپتاسىپ كەزدەسۋدە ەرلەر اراسىندا يتالياندار ريككاردو گەدين مەن كلاۋديو گراسسي ءبىزدىڭ ميحايل كۋكۋشكين مەن اندرەي گولۋبەۆتەن 6:3, 3:6, 10:8 ەسەبىمەن باسىم ءتۇستى. ايەلدەر اراسىندا اپالى-ءسىڭلىلى ۋكراينالىقتار ناديا جانە ليۋدميلا كيچەنولار رەسەيلىك دۋەت نينا براتچيكوۆا مەن ۆالەريا سولوۆەۆانى ەكى سەتتە 6:2,6:2 ەسەبىمەن ۇتتى.
