بىردە...
سايلاۋ كەزىندە برەجنەۆ گرۋزياعا كەلىپ اۋىل ارالاپ ءجۇرىپ ءبىر قوي جەتەكتەپ بارا جاتقاندى توقتاتىپ:
– گەناتسۆالە, قويىڭدى ساتشى؟! – دەيدى سىناپ.
– ال, تاڭداڭىز, – دەيدى اناۋ جاپادان-جالعىز قويىن الدىنا تارتىپ.
– نە تاڭدايتىنى بار, قويىڭ بىرەۋ عانا عوي.
– ءسىز دە ءبىر ءوزىڭىز, ءبىز دە ءسىزدى تاڭداپ سايلاپ جاتىر ەمەسپىز بە...
***
شەرلوك حولماس پەن دوكتور ۆاتسون بىردە قالا سىرتىندا پالاتكا تىگىپ الىپ تۇنەپ جاتىپتى. ءتۇن ورتاسىندا ۆاتسون حولمستى ءتۇرتىپ وياتىپ, توبەدەن ءتونىپ تۇرعان جۇلدىزدى نۇسقاپ:
– سوناۋ شوق جۇلدىز بىزگە ءبىر نارسەنى مەڭزەمەي مە؟ – دەپ سۇراپتى.
– جوق-ا... نە, سىزگە ءبىر بەلگى بەرە مە؟
– ماعان ول ايتادى: سىزدەردىڭ پالاتكىلەرىڭىز قولدى بولىپ كەتتى دەيدى...
***
چارلي ءچاپليننىڭ ونەرىنە ءتانتى بولىپ, ول ويناعان رولدەرگە ريزا بولىپ جۇرەتىن البەرت ەينشتەين بىردە وعان: ء«سىزدىڭ قاي كينوڭىزدى الساق تا بۇكىل ەلگە تۇسىنىكتى عاجاپ دۇنيە. ءسىز كوپ وتپەي ۇلى ادامداردىڭ قاتارىنان ورىن الاسىز» – دەپ حات جازىپ جىبەرىپتى.
بۇنى وقىعان چارلي چاپلين بىردەن: «مەن ءسىزدى ماقتان تۇتامىن, باس يەمىن. ءسىزدىڭ سالىستىرمالى تەورياڭىز كوپشىلىككە تۇسىنىكسىز دۇنيە بولسا دا, ءسىز قازىردىڭ وزىندە ۇلى ادامداردىڭ قاتارىنداسىز» دەپ جاۋاپ حات جازىپ جىبەرىپتى.
***
ءبىر ايەل بىردە بەرنارد شوۋدان:
– اللاتاعالا نەگە الدىمەن ەركەكتى, سودان سوڭ بارىپ ايەلدى جاراتتى ەكەن؟ – دەپ سىناي سۇراعاندا, ۇلى جازۋشى: – ە, ەركەكتى جاراتقان كەزدە ايەل جارىقتىق اقىل ايتىپ مازالاماسىن دەگەن بولۋ كەرەك, – دەپ مىسقىلداي جاۋاپ قايتارىپتى.
***
اعىلشىن استرونومى دجون گەرشەل ءتۇن مەزگىلىندە اسپان الەمىنە كوز تىگىپ جۇمىس ىستەپ وتىرعاندا ءۇي سىپىرۋشى ايەل تاقاپ كەلىپ: – گەرشەل مىرزا, ايتىڭىزشى, باسقا پلانەتالاردا دا كۇل-قوقىس بولا ما ەكەن وسى؟ – دەپ كەكەسىن سۇراق قويعاندا, عالىم: – ءدوپ باسىپ ايتا المايمىن, بىراق وندا ويلى ادامدار بولسا, كۇل-قوقىس, ارينە, بولادى, – دەگەن ەكەن.
