مەملەكەت باسشىسى نۇرسۇلتان نازارباەۆتىڭ اتىنا م.ۆ.لومونوسوۆ اتىنداعى ماسكەۋ مەملەكەتتىك ۋنيۆەرسيتەتىنىڭ قازاقستانداعى فيليالى تۇلەكتەرىنەن ۇجىمدىق حات كەلدى, دەپ حابارلادى پرەزيدەنتتىڭ ءباسپاسوز قىزمەتى.
ءوز حاتىندا ممۋ فيليالىنىڭ ديپلومىن العان تۇلەكتەر قازاقستان پرەزيدەنتىنە ريزاشىلىقتارىن ءبىلدىرىپ, الەمدەگى ۇزدىك ۋنيۆەرسيتەتتەردىڭ بىرىندە ءبىلىم الۋعا مۇمكىندىك جاساعانى ءۇشىن العىس ايتادى.
«ءسىزدىڭ باستاماڭىزبەن استانادا ممۋ-ءدىڭ قازاقستانداعى فيليالى اشىلۋىنىڭ ارقاسىندا ءبىز تەرەڭ ءبىلىم العانىمىز ءۇشىن سىزگە ريزامىز. بۇل ءبىزدىڭ الدىمىزدان ەلىمىزدىڭ يگىلىگى ءۇشىن قىزمەتتە ءوز قابىلەتىمىزدى جۇزەگە اسىرۋ ءۇشىن, سول ارقىلى ەل ءومىرى مەن دامۋىندا لايىقتى ورنىمىزدى تابۋعا مول مۇمكىندىكتەر اشادى», – دەلىنگەن حاتتا.
حات يەلەرى مەملەكەت باسشىسىنىڭ قىزمەتى ەل يگىلىگىنە, سونداي-اق قازاقستان مەن رەسەي اراسىنداعى دوستىقتى نىعايتۋعا باعىتتالعانىن اتاپ وتكەن.
«ءبىزدىڭ وقۋ ورنىن ءبىتىرىپ شىعۋىمىز – ءسىزدىڭ بۇدان 20 جىلداي بۇرىن ماسكەۋ ۋنيۆەرسيتەتىندە جاريا ەتكەن ەۋرازيا قاعيداتتارىن ىسكە اسىرۋدىڭ تاعى ءبىر مىسالى», – دەپ اتاپ وتەدى تۇلەكتەر.
حاتتا 2013 جىلى وقۋ ءبىتىرۋدىڭ ايرىقشا ەكەنىنە, ويتكەنى, ەلوردانىڭ 15 جىلدىعىن مەرەكەلەۋمەن تۇسپا-تۇس كەلگەنىنە دە توقتالعان. ممۋ-ءدىڭ قازاقستانداعى فيليالىنىڭ قۇرىلۋى مەن قالىپتاسۋى – استانا تاريحىنىڭ اجىراماس بولىگى.
سوڭىندا حات يەلەرى قازاقستان پرەزيدەنتىنىڭ سەنىمىن اقتاۋعا جانە ەلىمىزدىڭ ءوسىپ-ءوركەندەۋىنە لايىقتى ۇلەستەرىن قوسۋعا ۇمتىلاتىندارى تۋرالى ءمالىمدەيدى.
