قىزىلوردا قالاسىندا كوپىر قۇرىلىسىنا بولىنگەن قىرۋار قارجىنى ماقساتسىز پايدالانعان دەرەك انىقتالدى. اتالمىش تەمىر جولدىڭ 2 جاق بەتىن جالعاۋ ءۇشىن سالىنعان وتكەلدىڭ جوبالىق قۇنى 1,5 ملرد. تەڭگە بولاتىن. بۇل تۋرالى «24 kz» حابارلادى.
كوپىر قۇرىلىسى تولىق اياقتالماعانىنا قاراماستان, 2011 جىلى پايدالانۋعا بەرىلىپ كەتكەن. وسىنداي كەلەڭسىزدىكتىڭ سالدارىنان مەملەكەتكە 76,5 ملن. تەڭگە شىعىن كەلدى. ونى ارنايى تەكسەرۋ بارىسىندا قارجى پوليتسياسى وكىلدەرى انىقتادى. سوندىقتان قۇرىلىس جۇمىستارىن جۇرگىزگەن «بۋشرا» تۇرىك كومپانياسىنىڭ باسشىلارى مەتين مەن ەردوعان قاماۋعا الىنعان. قارجى پوليتسياسىنىڭ قىزمەتكەرلەرى ءىرى كولەمدەگى قارجىنى جىمقىرعان قازالى اۋدانىنداعى گيمنازيانىڭ باس ەسەپشىنىڭ دە قىلمىستىق ارەكەتىن اشكەرەلەدى.
«قازالى اۋدانىنداعى №226 گيمنازيانىڭ باس ەسەپشىسى مەن ونىڭ سىبايلاسىنا قاتىستى قىلمىستىق ءىس سوتتا قارالدى. ولار 2010 جىلدىڭ قاڭتارى مەن 2012 جىلدىڭ قازان ايى ارالىعىندا 7,7 ملن. تەڭگەنى جەكە ماقساتتارىنا جۇمساعان. سوت ۇكىمىمەن باس ەسەپشىگە 7 جىل باس بوستاندىعىنان ايىرۋ جازاسى تاعايىندالسا, ال ونىڭ سىبايلاسى 5 جىلعا شارتتى تۇردە سوتتالدى», - دەيدى قىزىلوردا وبلىستىق قارجى پوليتسياسى دەپارتامەنتىنىڭ ءباسپاسوز حاتشىسى ايدا جاڭابەرگەنوۆا.
دانيار تۇيمەباي.
