استانادا №1 قالالىق اۋرۋحانانىڭ بازاسىندا امبۋلاتورلىق كولوپروكتولوگيا ورتالىعى جۇمىس ىستەپ كەلەدى. بۇل ەلوردادا كولوپروكتولوگيالىق اۋرۋلاردى ەمدەيتىن جالعىز مامانداندىرىلعان ورتالىق بولىپ تابىلادى. مۇنى astana.kz سايتى جازادى.
اتالمىش حيرۋرگيا №1 قالالىق اۋرۋحاناسىندا كوپ جىلدان بەرى دامىتىلۋدا. قازاقستاننىڭ جەتەكشى كولوپروكتولوگتاردىڭ ءبىرى مەديتسينا عىلىمدارىنىڭ دوكتورى, پروفەسسور ن. مۋن. قالالىق اۋرۋحانانىڭ حيرۋرگيا ءبولىم بازاسىندا جۇمىس ىستەپ, كوپ جىلدارىن وسى عىلىمعا ارناپ, جەكە كولوپروكتولوگتار مەكتەبىن اشتى. ونىڭ تاربيەسىنەن وتكەن كولورەكتالدى حيرۋرگتەردىڭ كوبى قازاقستاننىڭ ءتۇرلى ايماقتارىندا جەمىستى ەڭبەك ەتۋدە.
اتالعان ورتالىقتى قۇرۋدىڭ نەگىزگى ماقساتى - كولورەكتالدى اۋرۋلارعا شالدىققان, جانە اۋىر وپەراتسيادان كەيىنگى پاتسيەنتتەرگە مامانداندىرىلعان جانە جوعارى مامانداندىرىلعان مەديتسينالىق كومەك كورسەتۋ.
«ورتالىقتا پاتسيەنتتەرگە بىلىكتى كونسۋلتاتسيالار بەرىلەدى, بارلىق قاجەتتى تەكسەرۋلەر وتكىزىلەدى (فۋنكتسيونالدىق, رەنتگەنولوگيالىق, ەندوسكوپيالىق, ۋدز-زەرتتەۋلەر جانە ت.ب.), سونىمەن قاتار تاجىريبەلى دارىگەرلەر مەن مەدبيكەلەردىڭ قاداعالاۋىمەن قاجەتتى مانيپۋلياتسيالار جاسالادى. بارلىق پروكتولوگيالىق پاتسيەنتتەردى حيرۋرگيالىق ەمدەۋ بارىسىندا يننوۆاتسيالىق تەحنولوگيالار قولدانىلادى, بۇل كۇندىزگى ستاتسيوناردا ەمدەۋگە مۇمكىندىك بەرەدى»,- دەلىنگەن قالالىق دەنساۋلىق ساقتاۋ باسقارماسىنىڭ اقپاراتىندا.
امبۋلاتورلىق ەمدەۋ پاتسيەنتتەردىڭ ۋاقىتى مەن قارجىسىن ۇنەمدەيدى. ورتالىق قالالىق ەمحانالاردىڭ جولداۋى بويىنشا بيۋدجەتتىك (تەگىن) جانە اقىلى نەگىزدە قابىلداۋ جۇرگىزىپ, ەم-دوم جاسايدى.
جاپى, كولوپروكتولوگيا - حيرۋرگياداعى جاڭا باعىت, ونىڭ دامۋى كەز كەلگەن ەكونوميكاسى جوعارى مەملەكەتتىڭ اجىراماس بولىگى بولىپ تابىلادى. ادامنىڭ تاماقتانۋ سيپاتىنىڭ جانە گيپودينامياسىنىڭ وزگەرۋىنە بايلانىستى اسقازان-ىشەك جولدارى اۋرۋلارىنىڭ قۇرىلىمىندا توق ىشەك پەن تىك ىشەك پاتولوگياسى كەڭىنەن تارالعان.
سۇلتان بوزايعىر.
