مەملەكەت باسشىسى نۇرسۇلتان نازارباەۆ ۇلتتىق بانكىنىڭ توراعاسى گريگوري مارچەنكونى قابىلدادى. بۇل تۋرالى اقوردانىڭ ءباسپاسوز قىزمەتى حابارلادى.
گ.مارچەنكو نەگىزگى ماكروەكونوميكالىق كورسەتكىشتەر مەن ۆاليۋتا نارىعىنداعى احۋال تۋرالى مالىمدەدى.
«مەملەكەت باسشىسى قازىرگى ۋاقىتتا التىن-ۆاليۋتا رەزەرۆتەرى كولەمىن, سونداي-اق وتاندىق ەكونوميكانىڭ دامۋ قارقىنىن ەسكەرگەندە ۇلتتىق ۆاليۋتانىڭ دەۆالۆاتسياعا ۇشىراۋىنا ەشقانداي نەگىز جوقتىعىن اتاپ ءوتىپ, بۇل رەتتە ۇلتتىق بانك جۇمىسىن باستاپقى رەجىمدە جالعاستىرۋ قاجەتتىگىنە توقتالدى»,-دەپ جازىلعان حابارلامادا.
ۇلتتىق بانك توراعاسى قارجى نارىعىنىڭ بارلىق سەگمەنتى بويىنشا ورنىقتى ءوسىم بايقالعانىن, ال ينفلياتسيا دەڭگەيى 2012 جىلعى شىلدە مەن بيىلعى شىلدە ارالىعىندا 5,9 پايىزدى قۇراعانىن جانە جوسپارلانعاننان 6-8 پايىز تومەن تۇرعانى جونىنەن حاباردار ەتتى.
كەزدەسۋ قورىتىندىسىندا مەملەكەت باسشىسى قارجى جۇيەسىنىڭ تۇراقتىلىعى مەن ەكونوميكانىڭ دامۋ قارقىنىن ساقتاۋدى قامتاماسىز ەتۋ جونىندە بىرقاتار ناقتى تاپسىرمالار بەردى.
ساكەن مايلىباي.
