ادەتتە جەڭىس دەگەن قاي كوماندا ءۇشىن دە جەڭىس پەن تابىس اكەلىپ جاتادى عوي. دەگەنمەن, ونىڭ ءبارى كەرىسىنشە بوىلپ شىعاتىن كەزدەرى دە كەزدەسەدى ەكەن. مۇنى نيگەريادا تاياۋدا ورىن العان مىنا جاعداي تولىق دالەلدەپ وتىر. بۇل تۋرالى يتار-تاسس حابارلادى.
اتالمىش ەلدى اسا ءىرى ەسەپپەن جەڭىسكە جەتكەندەرىنە بايلانىستى ەكى فۋتبول كومانداسىنىڭ ويىنشىلارى اسا قاتاڭ جازاعا ۇشىرادى. ناقتىراق ايتقاندا, نيگەريا ۇلتتىق فۋتبول فەدەراتسياسى ەكى كوماندانىڭ ويىنشىلارى مەن باسشىلارىن ءومىر بويىنا ديسكۆاليفيكاتسياعا جىبەردى. بۇل جانجال ەكى كلۋبتىڭ ەل چەمپيوناتىنىڭ كەزەكتى تۋرىندا قارسىلاستارىن 79:0 جانە 67:0 دەگەن ەسەپتەرمەن جەڭگەنىنەن كەيىن كوتەرىلدى. وسى قورىتىندى ماتچتارعا دەيىن بۇل كوماندالاردىڭ ۇپايلارى بىردەي ەدى. ولاردىڭ ءبىرىنشى ورىن ءۇشىن سىرتتاي باسەكەسى ايتىلىپ وتىرعان كەزدەسۋلەردە ورىستەدى. وسىندا كىم كوبىرەك دوپ ايىرىمىنا جەتسە, سول چەمپيون بولۋعا ءتيىس ەدى.
ال ماتچتار ادام كۇتپەگەن ناتيجەلەرمەن اياقتالدى: «پوليس ماشين» كومانداسى «بۋبايارونى» 67:0 ەتىپ تالقانداسا, «پلاتو يۋنايتەد فيدەرس» جاساعى «اكۋربۋ»ۇجىمىن 79:0 ەتىپ ىسكە اسىرماي تاستادى.
نيگەريا فۋتبول فەدەراتسياسىنداعىلار مۇنى مازاق دەپ ءتۇسىندى, ەلدىڭ بىرىنشىلىگى مارتەبەسىن اياققا تاپتاۋ دەپ ءبىلدى. ولار بۇل ويىنداردىڭ الدىن اال كەلىسۋ ارقىلى وتكەندەرىنە دە كۇمان كەلتىرمەيدى. كوميسسيا «پلاتو يۋنايتەد فيدەرستىڭ» ءبىر ويىنشىنىڭ وسىندا ءتىپتى 14 گول سوققانىن دا انىقتاپ شىقتى. ال «پوليس ءماشيننىڭ» جىگىتتەر ءبىر مينۋتتىڭ ىشىندە 4 گول سالىپ ۇلگەرگەن.
كوميسسيانىڭ شەشىمىمەن بۇل شوۋدى ۇيىمداستىرعان كوماندالار باسشىلارى مەن ويىنشىلارىن تۇگەلدەي ومىرلىك ديسكۆاليفيكاتسياعا جىبەردى. ال كلۋبتاردىڭ وزدەرى بولسا, الداعى ون جىلعا دەيىن چەمپيوناتقا قاتىسۋ قۇقىعىنان ايرىلدى.
دامير قوجامقۇل.
