شاراينا
ادۆوكات اناتولي كۋچەرەنانىڭ ايتۋىنشا, وبب-نىڭ بۇرىنعى قىزمەتكەرى ەدۆارد سنوۋدەننىڭ رف-نىڭ فەدەرالدىق ميگراتسيالىق قىزمەتىنە بەرگەن جانە ونىڭ رەسەيدە ۋاقىتشا تۇرۋ قۇقىن الۋىنا جاعداي جاسايتىن قۇجاتتارىن قاراۋ مەرزىمى اياقتالدى.
فەدەرالدىق ميگراتسيالىق قىزمەت تاجىريبەسى بويىنشا مۇنداي ماتەريالدار جەتى كۇنگە دەيىن قارالادى, ودان كەيىن سنوۋدەننىڭ رەسەي اۋماعىندا ەمىن-ەركىن ءجۇرىپ-تۇرۋىنا مۇمكىندىك بەرەتىن ارنايى انىقتاما بەرىلەدى. ءبىز ءوتىنىشتى 16 شىلدە كۇنى بەردىك, دەپ اتاپ كورسەتكەن ادۆوكات. ال فەدەرالدىق ميگراتسيالىق قىزمەت ە.سنوۋدەن ءوتىنىش بەرگەننەن كەيىن بەس جۇمىس كۇنى وتكەنىن, سوندىقتان شەشىم قابىلدانۋعا ءتيىس ەكەندىگىن راستاپ وتىر. ونداي جاعدايدا سنوۋدەننىڭ شەرەمەتەۆو اۋەجايىنان شىعۋىنا مۇمكىندىك تۋادى.
پارلامەنتشىلەر مىنەز كورسەتتى
بولگار پارلامەنتشىلەرى سارسەنبىگە قاراعان تۇنگى نارازىلىق اكتسياسىنان كەيىن جۇمىسقا شىقپاي قويدى. ولاردى پارلامەنت باسشىسى ميحايل ميكوۆ جۇمىسقا شىعۋدان باس تارتۋعا شاقىرعان.
سارسەنبىگە قاراعان ءتۇنى نارازىلىق اكتسياسىنا قاتىسۋشىلار پارلامەنت عيماراتىنان شىعاتىن ەسىكتى جاۋىپ تاستاعان. ول كەزدە عيمارات ىشىندە 100 ادام بولعان. تەك تاڭەرتەڭگىلىك قانا بارريكادانى بۇزىپ, ادامداردى عيماراتتان شىعارىپ الۋدىڭ ءساتى تۇسكەن. سوفيادا نارازىلىق اكتسيالارى وسىدان ءبىر اي بۇرىن, مەملەكەتتىك قاۋىپسىزدىك قىزمەتى باسشىسى لاۋازىمىنا مەديا-ماگنات دەليان پەەۆسكي تاعايىندالعاننان سوڭ باستالعان بولاتىن.
ءمۋرسيدىڭ قايدا ەكەنى بەيمالىم
وتكەن دۇيسەنبى كۇنى ەگيپەتتىڭ تاعىنان قۇلاتىلعان پرەزيدەنتى مۇحاممەد ءمۋرسيدىڭ ۇلى ۋساما مۋرسي اكەسىنىڭ قايدا ەكەنىنىڭ ءالى كۇنگە دەيىن بەلگىسىز كۇيدە قالىپ وتىرعانىن مالىمدەگەن.
ءالى كۇنگە دەيىن مەنىڭ اكەمنىڭ قاي جەردە ەكەنى بەلگىسىز بولىپ وتىر. ءبىز ونىڭ قاي جەردە وتىرعانىن جانە نە ءۇشىن قاماۋعا الىنعانىن بىلمەيمىز, دەپ اتاپ كورسەتكەن Russia Today تەلەارناسىنا بەرگەن سۇحباتىندا ۋساما مۋرسي. سونداي-اق ول ەگيپەتتەگى قازىرگى احۋالعا دا تۇسىنىك بەرگەن. ونىڭ ايتۋىنشا, 2011 جىلدىڭ كوكتەمىندە باستالعان ەگيپەتتەگى توڭكەرىس ءوزىنىڭ العاشقى كۇنىنەن باستاپ بۇگىنگە دەيىن بەيبىت توڭكەرىس بولىپ قالىپ وتىر. ال قازىرگى بيلىكتىڭ اۋىسۋىنا حوسني مۇباراك رەجىمىن جاقتاۋشىلار كىنالى.
وقۋشىلار دارىدەن ۋلاندى
انەمياعا قارسى كۇرەس جونىندەگى مەملەكەتتىك باعدارلامادا قاراستىرىلعان دارىلەردى پايدالانۋ سالدارىنان ءۇندىستاندا 900-گە جۋىق مەكتەپ وقۋشىسى ۋلانىپ قالعان. بۇل تۋرالى ريا نوۆوستي اگەنتتىگى حابارلاپ وتىر.
بەلگىلى بولعانىنداي, بالالارعا فولي قىشقىلى بار تابلەتكالار قابىلداۋ ۇسىنىلعان, ونىڭ سوڭى ۋلانۋعا اپارىپ سوقتىرعان. ءدارى قابىلداعان وقۋشىلار دەنساۋلىقتارىنىڭ ناشارلاپ, ىشتەرىنىڭ اۋىراتىندىقتارىنا, لوقسىپ, قۇسقىلارىنىڭ كەلەتىندىگىنە شاعىم جاساعان. بارلىق زارداپ شەككەن بالالارعا مەديتسينالىق كومەك كورسەتىلۋدە. ايتا كەتۋ كەرەك, مەملەكەتتىك باعدارلاماعا بارلىعى 1,6 ميلليون بالا قاتىسقان.
اقش سيرياعا شابۋىل جوسپارلاۋدا
امەريكا ارمياسى سيرياداعى داۋ-جانجالعا اسكەري ارالاسۋدىڭ جوسپارىن جاسادى. اقش كونگرەسى بولسا, سيريالىق وپپوزيتسيانى قارۋلاندىرۋعا سالىنعان تىيىمنىڭ كۇشىن جويدى, بىراق سيرياعا قارۋ-جاراق جەتكىزۋدە قاتاڭ ەسەپتىلىك تالاپ ەتىپ وتىر.
ءوز كەزەگىندە امەريكالىق اسكەريلەر زاڭ شىعارۋشىلارعا سيرياعا قاشىقتىقتان شابۋىل جاساۋ جوسپارىنىڭ قىر-سىرىن بايانداپ بەردى. ال ول ەل ءۇشىن ميللياردتاعان دوللارعا تۇسپەكشى جانە وپەراتسيانىڭ تابىستى بولارىنا ەشقانداي كەپىلدىك جوق. كونگرەستەگى سيريالىق وپپوزيتسيانى جاقتاۋشىلار اقش-تان قارۋ-جاراق جەتكىزۋ الداعى تامىز ايىندا باستالادى دەپ ۇمىتتەنىپ وتىر.
وتاعا... بۇرعىنى پايدالانعان
مولداۆيانىڭ دەنساۋلىق ساقتاۋ ءمينيسترى اندرەي ۋساتىي كيشينەۆتەگى ۆالەنتين يگناتەنكو اتىنداعى بالالار اۋرۋحاناسىندا قۇرىلىس بۇرعىسىن پايدالانىپ وتا جاساعان حيرۋرگتى جازالاۋدى تالاپ ەتتى.
بورماشينانى وسىلايشا وپەراتسياعا جاساۋعا بولادى دەپ تۇسىنگەن ديلەتانت پايدالانعان, اۋرۋحانانىڭ قۇرال-سايماندارىنىڭ ىشىندە ونداي ماشينا جوق, دەپ مالىمدەگەن مينيستر. جاعدايدىڭ بۇلايشا وربۋىنە تاياۋدا باق-تاردا پايدا بولعان اۋرۋحانانىڭ تراۆماتولوگيا ءبولىمىنىڭ دارىگەرلەرى تۇسىرگەن بەينەكورىنىس سەبەپكەر بولىپ وتىر. وندا مەديكتەردىڭ قۇرىلىس بۇرعىسىن, تىستەۋىكتەر مەن بالعانى پايدالانىپ, وپەراتسيا جاساپ جاتقاندارى كورسەتىلگەن بولاتىن.
ءبىر تاۋلىكتە 22 ادام قازا تاپتى
مەكسيكانىڭ ميچواكان شتاتىندا س وڭعى تاۋلىكتە بولعان اتىستار سالدارىنان كەم دەگەندە ناركوكارتەلدىڭ 20 سودىرى جانە 2 پوليتسيا قىزمەتكەرى قازا تاپقان.
بي-بي-سي-ءدىڭ مەكسيكاداعى ءتىلشىسى ۋيلل گرانتتىڭ ايتۋىنا قاراعاندا, تاۋلىك ىشىندە وسىنشا ادامنىڭ قازا تابۋى ءتىپتى ميچواكان ولشەمى بويىنشا دا وتە كوپ. ءتىلشىنىڭ حابارلاۋىنشا, اتىس اۆتوماتتارمەن قارۋلانعان ناركوكارتەل سودىرلارى پوليتسەيلەردىڭ جولىن توسپاق بولعان كەزدە تۋىنداعان. ءسوز ورايىندا ميچواكان شتاتى اۋماعىنىڭ باسىم بولىگىنىڭ «تامپليەر-رىتسارلار» اتتى ناركوكارتەلدىڭ باقىلاۋىندا ەكەنىن ايتا كەتۋ قاجەت.
ناۋبايحاناداعى جارىلىس
پەكيندە ناۋبايحانالاردىڭ بىرىندە بولعان جارىلىستان ەكى ادام قازا تاپقان. الدىن الا مالىمەتتەر بويىنشا, تاعى 9 ادام ءتۇرلى دەنە جاراقاتتارىن العان كورىنەدى.
زارداپ شەككەندەردىڭ تورتەۋىنىڭ جاعدايى وتە اۋىر. جارىلىس جەرگىلىكتى ۋاقىت بويىنشا 7 ساعات 33 مينۋتتا ورىن العان. ءورت سوندىرۋشىلەر جالىندى اۋىزدىقتاپ, ارقايسىسى 50 ليتر بولاتىن سۇيىتىلعان گاز قۇيىلعان 2 باللوندى سىرتقا شىعارعان. قۇتقارۋشىلاردىڭ ايتۋلارىنشا, ەگەر ول باللوندار جارىلعاندا ونىڭ زاردابى الدەقايدا اۋقىمدى بولماق ەكەن.
ينتەرنەت ماتەريالدارى نەگىزىندە ازىرلەندى.
