پرەزيدەنت • 06 جەلتوقسان، 2019

قازاقستان پرەزيدەنتى نەمىس كومپانيالارى باسشىلارىنىڭ الدىندا ءسوز سويلەدى

66 رەتكورسەتىلدى

قاسىم-جومارت توقاەۆ جەتەكشى نەمىس كومپانيالارى وكىلدەرىنە ارنالعان ىسكەرلىك داستارحان باسىندا قازاقستاننىڭ ەكونوميكالىق جانە ينۆەستيتسيالىق الەۋەتى تۋرالى اڭگىمەلەدى. بۇل تۋرالى اقوردانىڭ ءباسپاسوز قىزمەتى حابارلادى.

قازاقستان پرەزيدەنتى ەۋروپا وداعىنا مۇشە مەملەكەتتەردىڭ ىشىندە گەرمانيانىڭ قازاقستان ءۇشىن نەگىزگى ساۋدا-ەكونوميكالىق سەرىكتەس ەكەنىن اتاپ ءوتىپ،  ەلىمىزدىڭ ىنتىماقتاستىقتى دامىتۋعا نيەتتى ەكەنىن جەتكىزدى.

– قازاقستان پرەزيدەنتى رەتىندە گەرمانيادان ەلىمىزگە ينۆەستيتسيا مەن كاسىپكەرلەردى تارتۋعا جانە بيزنەس وكىلدەرىنىڭ  وزدەرىن قاۋىپسىز سەزىنىپ، تابىستى دامۋى ءۇشىن بار كۇش-جىگەرىمدى جۇمسايمىن. ءبىز نەمىس كاسىپكەرلەرى ءۇشىن ەرەكشە جاعداي جاساۋعا دايىنبىز، – دەدى مەملەكەت باسشىسى.

پرەزيدەنت قازاقستاننىڭ ءوز ستاندارتتارىن جاقسارتۋعا، بولاشاقتا ەكونوميكالىق ىنتىماقتاستىق جانە دامۋ ۇيىمىنىڭ تولىققاندى مۇشەسى بولۋ ءۇشىن زاڭنامالاردى وسى ۇيىم دەڭگەيىنە دەيىن كوتەرۋگە ۇمتىلاتىنىن مالىمدەدى. سونىمەن قاتار قاسىم-جومارت توقاەۆ قازاقستاننىڭ قولايلى گەوگرافيالىق جاعدايى مەن ورنىقتى سىرتقى ەكونوميكالىق ساياساتى شەتەلدىك ينۆەستورلار ءۇشىن زور مۇمكىندىكتەرگە جول اشاتىنىنا نازار اۋداردى.

– قىتايمەن، رەسەيمەن جانە ورتالىق ازيا ەلدەرىمەن قارىم-قاتىناسىمىز وتە جاقسى. ءبىز شىعىس پەن باتىس اراسىنداعى ماڭىزدى كولىك حابى بولىپ تابىلامىز. بارلىق ترانسقۇرلىقتىق باعىتتاعى جولداردىڭ  70 پايىزى قازاقستان ارقىلى وتەدى. حالىقارالىق «باتىس ەۋروپا – باتىس قىتاي» ءدالىزى جۇك تاسىمالىنا كەتەتىن ۋاقىتتى قىسقارتۋعا مۇمكىندىك بەرەدى. بيىل قىتايدىڭ سيان قالاسىنان گەرمانياعا تاسىمالداناتىن جۇك نەبارى ون كۇندە جەتكىزىلىپ، رەكتوردتىق كورسەتكىشكە جەتتى، – دەدى پرەزيدەنت.

ونىڭ ايتۋىنشا، «Volkswagen»، «Mann»، «Siemens»، «Knauf»، «Bayer»، «METRO» سەكىلدى جەتەكشى نەمىس كونتسەرندەرى قازاقستاندا بەلسەندى جۇمىس ىستەپ جاتىر. «Heidelberg Cement» جانە «Linde Group» كورپوراتسيالارى ەل ەكونوميكاسىنا ءىرى كولەمدە قارجى قۇيىپ، تابىستى ەكونوميكالىق ىنتىماقتاستىقتىڭ جارقىن مىسالى بولىپ وتىر.

قاسىم-جومارت توقاەۆ نەمىس كاسىپكەرلەرىن اگروونەركاسىپ كەشەنى، جوعارى تەحنولوگيالار مەن تسيفرلاندىرۋ سالالارىنداعى جوبالاردى جۇزەگە اسىرۋعا، سونداي-اق، «استانا» حالىقارالىق قارجى ورتالىعىنىڭ جۇمىسىنا اتسالىسۋعا شاقىردى. 

ءىس-شاراعا 20-دان استام نەمىس كومپانياسىنىڭ جەتەكشىلەرى قاتىستى. اتاپ ايتقاندا، «WILO»، «CLAAS Group»، «SMS Holding GmbH»، «Schaeffler AG»، «Airbus Defence and Space»، «Linde AG»، «Mangold Consulting GmbH»، «Herrenknecht AG»، «Knorr-Bremse AG»، «Euler Hermes»، «Siemens Healthineers»، «John Deere»، «Deutsche Bank AG»، «Tönnies Holding»، «BAUER COMP Holding» جانە ت.ب.

نەمىس ىسكەر توپتارىنىڭ وكىلدەرى قازاقستان نارىعىندا جۇمىس ىستەۋ تاجىريبەلەرىمەن ءبولىسىپ، الداعى جوسپارلارى مەن ۇسىنىس-تىلەكتەرىن ايتتى.

– ءبىز ءۇشىن سىزبەن اڭگىمەلەسۋ زور عانيبەت. ءسىزدىڭ بۇگىنگى ساپارىڭىز ساياسي قاتىناستارىمىزعا عانا ەمەس، ەكونوميكالىق بايلانىستارىمىزعا دا وڭ ىقپال ەتەتىنىنە سەنىمدىمىز. قازاقستان ءۇشىن گەرمانيا بيزنەسى سەنىمدى سەرىكتەس ەكەنىنە سەندىرەمىن. بولاشاق ىنتىماقتاستىعىمىز بەن قازاقستان ەكونوميكاسىنداعى نەمىس ينۆەستيتسياسىن ارتتىرۋ ءۇشىن بىزگە زور مۇمكىندىكتەر اشىلادى دەپ ەسەپتەيمىن، – دەدى «WILO» كومپانياسىنىڭ باسشىسى وليۆەر گەرمەس.

كەزدەسۋ  سوڭىندا قاسىم-جومارت توقاەۆ ينۆەستيتسيالىق جوبالاردى نەمىس بيزنەسىنىڭ قاتىسۋىمەن جۇزەگە اسىرۋدا ىنتىماقتاستىق ورناتۋعا قازاقستاننىڭ دايىن ەكەنىن مالىمدەدى.

– ءبىز بارلىق ماسەلەنىڭ وڭ شەشىلۋىنە كومەكتەسۋگە مۇددەلىمىز. بۇگىنگى سىزدەردىڭ باياندامالارىڭىزدا ايتىلعان جوبالار ۇكىمەتىمىزدىڭ ەرەكشە نازارىندا بولادى. قازاقستاندا سىزدەردىڭ بيزنەستەرىڭىز جۇزەگە اسىرىپ جاتقان بىرلەسكەن جوبالارعا قولداۋ كورسەتۋگە باسا ءمان بەرەمىز، – دەدى مەملەكەت باسشىسى.  

سوڭعى جاڭالىقتار

ەلباسى تۇركيا حالقىنا كوڭىل ايتتى

قازاقستان • بۇگىن، 14:17

قىزىلوردا: قازالىداعى قونىس توي

ايماقتار • بۇگىن، 09:07

ۇقساس جاڭالىقتار