كەشە قازاقستان رەسپۋبليكاسى پرەزيدەنتى جانىنداعى ورتالىق كوممۋنيكاتسيالار قىزمەتىنىڭ رەسمي وكىلى التاي ابيبۋللاەۆ ءداستۇرلى بريفينگتە اپتانىڭ نەگىزگى شارالارىنا توقتالىپ, ولار ۇكىمەت تاراپىنان اتقارىلىپ جاتقاندىعىن ايتىپ ءوتتى.
پرەمەر-مينيستر سەرىك احمەتوۆ قارجى مينيسترلىگىنىڭ كەڭەيتىلگەن القا ماجىلىسىنە قاتىسىپ, مينيسترلىكتىڭ نەگىزگى جانە باستى مىندەتتەرى مەن ماقساتتارىنا باستى نازار اۋدارىلۋدا دەدى. سونداي-اق, بۇگىن س.احمەتوۆ ەلوردادا سالىنىپ جاتقان ۇلتتىق بيوتەحنولوگيالىق ورتالىقتا بولىپ, ونىڭ جۇمىس بارىسىمەن تانىساتىنىن جەتكىزدى. پرەزيدەنت جارلىعىمەن قۇرىلعان بۇل عىلىمي ورتالىقتىڭ باستى ماقساتى بيوتەحنولوگيالىق سالانىڭ دامۋى مەن ونى قولداۋداعى مەملەكەتتىك ساياساتتى ىسكە اسىرۋ. سونىمەن قاتار, 25 شىلدە كۇنى پرەمەر-مينيستر ەكسپو-2017 حالىقارالىق مامانداندىرىلعان كورمەسىن استانادا وتكىزۋ جانە ونىڭ دايىندىعى بويىنشا مەملەكەتتىك كوميسسيانىڭ كەزەكتى وتىرىسىن وتكىزەدى, دەدى رەسمي وكىل. بۇعان قوسا, ا.ابيبۋللاەۆ پرەمەر-ءمينيستردىڭ ورىنباسارى ەربول ورىنباەۆتىڭ وسى ماسەلەمەن بريۋسسەلگە باراتىنىن جەتكىزدى.
بۇدان كەيىن توتەنشە جاعدايلار ءمينيسترى ۆلاديمير بوجكو «مينيسترلىكتىڭ تابيعي جانە تەحنوگەندىك سيپاتتاعى توتەنشە جاعدايلار كەزىندە ازاماتتاردىڭ قاۋىپسىزدىگىن نىعايتۋ بويىنشا اتقارعان جۇمىستارى» تۋرالى جان-جاقتى ايتىپ بەردى ول ءوز سوزىندە 2013 جىلدىڭ 6 ايىندا تجم كۇشتەرى 3638 ادامدى قۇتقارىپ, تج ايماعىنان 5243 ادامدى اكەتكەنىن, 1517 زارداپ شەككەن ادامعا العاشقى مەديتسينالىق قىزمەت كورسەتىلگەنىن بايان ەتتى. جالپى, وتكەن جىلدىڭ ۇقساس كەزەڭىمەن سالىستىرعاندا تج سانى 20,2 پايىزعا, قازا بولعاندار سانى 18,1 پايىزعا, زارداپ شەككەندەر سانى 22,2 پايىزعا ازايىپتى. تج كەلتىرگەن ماتەريالدىق زالال 18,7 پايىزعا كەمىپتى.
تجم بولىمشەلەرى تۇراقتى تۇردە قاجەتتى كۇش بولىپ تابىلادى. جىل بويعى ءار تاۋلىكتە ولار ازاماتتارعا كومەك كورسەتۋگە 100-240 رەت شىعادى. 2013 جىلعى 6 ايدا ەلىمىزدىڭ سۋ ايدىندارىندا 513 ادام, ونىڭ ىشىندە 141 بالا زارداپ شەكتى, سونىڭ ىشىندە مينيسترلىكتىڭ سۋدا قۇتقارۋ قىزمەتى 349 ادامدى, ونىڭ ىشىندە 112 بالانى قۇتقاردى. جۇرگىزىلگەن ساپالى الدىن الۋ-پروفيلاكتيكالىق جۇمىستىڭ ارقاسىندا 2012 جىلدىڭ ۇقساس كەزەڭىمەن سالىستىرعاندا ەلىمىزدىڭ سۋ ايدىندارىندا زارداپ شەككەندەردىڭ سانى 48 پايىزعا, ال سۋعا كەتكەندەردىڭ سانى 32 پايىزعا ازايدى. ستاتيستيكا وقىس وقيعالاردىڭ 99,9 پايىزى ەلىمىزدىڭ جابدىقتالماعان سۋ ايدىندارىندا بولاتىنىن كورسەتەدى. قازىرگى ۋاقىتتا ەلىمىزدە 348 رەسمي سۋعا ءتۇسۋ ورنى (ونىڭ ىشىندە 116 بالالار جاعاجايلارى) جۇمىس ىستەيدى, دەدى ۆ.بوجكو.
ازاماتتاردىڭ سۋ ايدىندارىندا قازا بولۋىنىڭ الدىن الۋ ماقساتىندا 2013 جىلعى سۋعا شومىلۋ ماۋسىمى كەزەڭىندە مينيسترلىك 58 سۋدا قۇتقارۋ ستانساسىنىڭ, 22 قۇتقارۋ بەكەتىنىڭ, 7 يكەمدىلىك-ىزدەستىرۋشى توبى مەن 13 سۇڭگۋىر اۆاريالىق-قۇتقارۋشى جاساقتىڭ جەكە قۇرامىن جوعارى ازىرلىككە كەلتىرىپتى.
سونداي-اق, ەل ۇكىمەتىنىڭ تاپسىرماسى بويىنشا مينيسترلىك سكاي ەيرلاينس ءتۇرىك اۆياكومپانياسىنىڭ بانكروتقا ۇشىراۋى سالدارىنان انتاليادا قالىپ قويعان قازاقستاندىق ازاماتتاردى ەلگە جەتكىزۋدى ۇيىمداستىرعان. 9-10 شىلدە ارالىعىندا تجم «قازاۆياقۇتقارۋ» اق تۋ-154 ۇشاعىمەن 188 ادامدى ەلگە الىپ كەلگەن.
بۇگىندە ءورت جانە ونەركاسىپتىك قاۋىپسىزدىك دەڭگەيىن ارتتىرۋ ماسەلەلەرى مينيسترلىكتىڭ تۇراقتى باقىلاۋىندا تۇرعان كورىنەدى. ماسەلەن, ونەركاسىپ سالاسىنداعى 17241 نىسان مەن 2224 كاسىپورىن تەكسەرۋدەن وتسە, ناتيجەسىندە 36232 تەحنيكالىق قاۋىپسىزدىك قاعيدالارى مەن نورمالارىن بۇزۋشىلىق انىقتالعان, سونىمەن قاتار, 1835 نىسان مەن 5 كاسىپورىننىڭ جۇمىسى توقتاتىلىپ, 1420 كاسىپورىن باسشىسىنا 60 ملن.-نان استام تەڭگە سوماسىنا ايىپپۇل سانكتسياسى سالىنىپتى. قاۋىپتى وندىرىستەردە ءبىزدىڭ ۇسىنىسىمىز بويىنشا ەسكىرگەن جابدىقتار مەن تەحنولوگيالىق جەلىلەر تۇراقتى تۇردە اۋىستىرىلىپ تۇرادى, دەدى ۆ. بوجكو.
ۇستىمىزدەگى جىلى «قازاقستان رەسپۋبليكاسىنىڭ مەملەكەتتىك باسقارۋ ورگاندارى اراسىنداعى وكىلەتتىكتەردى شەكتەۋ ماسەلەلەرى جونىندەگى كەيبىر زاڭ اكتىلەرىنە وزگەرتۋلەر مەن تولىقتىرۋلار ەنگىزۋ تۋرالى» زاڭ قابىلداندى. زاڭدا جەرگىلىكتى اتقارۋشى ورگاندار مەن تجم اۋماقتىق بولىمشەلەرىنىڭ وكىلەتتىكتەرى ناقتى ءبولىندى, اكىمدىكتەردىڭ ءرولى كۇشەيتىلدى. وسىلايشا ەندى اكىمدەر ءوز وڭىرلەرىندەگى توتەنشە جاعدايلاردىڭ الدىن الۋ جانە ولاردى جويۋ جونىندەگى كوميسسيانىڭ توراعالارى بولىپ تابىلادى. بۇل ەل باسشىلىعىنىڭ ازاماتتاردىڭ قاۋىپسىزدىگىنە قانشالىقتى كوڭىل اۋداراتىنىن ايعاقتايدى.
الەكساندر تاسبولاتوۆ,
«ەگەمەن قازاقستان».
