بوكستان ازيا چەمپيوناتى مەن ۋنيۆەرسيادا ءتۋرنيرى اياقتالعاننان كەيىن كوپ ۇزاماي ەلىمىزدە قازاقستان بوكس فەدەراتسياسى كۋبوگىنىڭ سايىستارى دا باستالدى.
شىلدەنىڭ 19-21-ءى ارالىعىندا استاناداعى «داۋلەت» سپورت كەشەنىندە سولتۇستىك ايماق قۇرامالارى ءوزارا كۇش سىناستى. مۇندا پاۆلودار, شىعىس قازاقستان جانە الماتى وبلىستارىنىڭ كوماندالارى باس قوستى. ءبىر ايتا كەتەتىن جايت, بيىل ءتورتىنشى مارتە وتكىزىلىپ وتىرعان كۋبوك جولىنداعى جارىستىڭ ەرەجەسى وزگەردى. ەندى ونىڭ رەگلامەنتى بويىنشا ءبىر كەزەڭ قىسقارىپ, ول ءۇش لەكتە وتەتىن بولدى.
ەلوردانىڭ تورىندە وتكەن سايىستا الاڭ يەلەرى ءۇش قارسىلاسىنان دا ارتىق كورىندى. ولار ءبىرىنشى جەكپە-جەكتە پاۆلودار وبلىسىنىڭ كومانداسىن 8:2 ەتىپ ۇتتى. وسى كۇنى الماتى وبلىسىنىڭ وكىلدەرى شىعىس قازاقستان جاساعىنان باسىم ءتۇستى – 7:3. ءتۋرنيردىڭ ەكىنشى كۇنىندەگى ەكى كەزدەسۋدە دە 9:1 دەگەن ەسەپ تىركەلدى. استانا بىلعارى قولعاپ شەبەرلەرى التايدىڭ اياسىنان كەلگەن قارسىلاستارىن, ال الماتى وبلىسىنىڭ قۇراماسى پاۆلوداردىڭ ساربازدارىن وسىنداي ەسەپپەن تىزە بۇكتىردى.
جارىستىڭ سوڭعى كۇنى جارتىلاي فينالعا بەرىلەتىن جالعىز جولدامانى استانا قالاسى مەن الماتى وبلىسىنىڭ ۇجىمدارى ساراپقا سالدى. العاشقى ءۇش ۇرىستا ازات كامزيننىڭ – ماردان بەرىكباەۆتى, ءىلياس سۇلەيمەنوۆتىڭ – ەرنار وركەندى, مەيىربولات تويىتوۆتىڭ ديدار وتەلباەۆتى ۇتۋلارى ارقىلى ەلوردالىقتار بىردەن العا شىقتى. مۇندا ءىلياس ءوزىنىڭ قارسىلاسىن 2-راۋاندتا نوكاۋتقا جىبەردى. بۇدان كەيىن الماتىلىقتار بەكمان سويلىباەۆ پەن بەكبولات قۇرامىسوۆ تيىسىنشە دارحان جۇمساقباەۆ پەن داۋلەت داۋكەنوۆتى ۇتىپ, ەسەپتى ەكەۋگە قىسقارتتى. بۇدان كەيىن مەيىرىم نۇرسۇلتانوۆ باعدات ناۋقانوۆتان مىقتى شىعىپ, ەسىل بويى جىگىتتەرىنىڭ ەڭسەسىن كوتەرە ءتۇستى. الايدا, وسى تۇستا استانالىق باقىتجان قوجابەكوۆ كۇتپەگەن جەردەن ايدوس ەربولسىن ۇلىنان جەڭىلىپ قالدى. ەسەسىنە, تاعى ەكى استانالىق شەبەر كومانداعا جەڭىس سىيلاپ, جارتىلاي فينالدىڭ دا تاعدىرىن شەشىپ بەردى. ولار –داۋرەن ەلەۋسىنوۆ پەن ۆاسيلي لەۆيت كەزەكتەرىندە ارمان رىسبەك پەن اربەك ابدۋعانيەۆتى جەڭدى. سوندىقتان سوڭعى جەكپە-جەكتە الماتىلىق داۋلەت مۇساباەۆتىڭ ەرمەك ۇسەنوۆتى ۇتۋى جالپى جەڭىسكە وزگەرىس ەنگىزە المادى.
وسىلايشا, باستى باسەكەلەستەرىن 6:4 ەتىپ سۇرىندىرگەن استانا كومانداسى قازاقستان بوكس فەدەراتسياسىنىڭ جارتىلاي فينالىنا ءبىرىنشى بولىپ شىقتى. ءبىرىنشى كەزەڭدە كۇش سىناساتىن تاعى ەكى كوماندا 24 شىلدەدە شىمكەنتكە مارەگە جەتەتىن «وڭتۇستىك» ديۆيزيون, 29 شىلدەدە اقتوبە مەن قاراعاندىدا اياقتالاتىن «باتىس» جانە «سولتۇستىك» ديۆيزيوندار شايقاستارىندا انىقتالادى.
جارتىلاي فينال مەن اقتىق كەزدەسۋلەر جەلتوقسان ايىندا استانادا وتەدى.
رۋسلان يگىلىك.
