الەمدە اينالدىرعان ون بەس جىل ىشىندە تورتكۇل دۇنيە تاڭعالاتىن استانا تۇرعىزعان ەل جوق دەسەك قاتەلەسپەسپىز. ارىدەگى اقمولا, كۇنى كەشەگى تسەلينوگرادتىڭ قانداي قالا بولعانىن حالىق بىلەدى. مىنە, وسىنداي جۇدەۋ قالا ورنىنا اجارلى استانانىڭ بوي كوتەرۋى ەلباسى نۇرسۇلتان نازارباەۆتىڭ سارابدال ساياساتى مەن كوسەمدىك كورەگەندىگىنىڭ جەمىسى ەكەنى ءسوزسىز. بۇل – ايقىن اقيقات, تاريحي شىندىق.
ساۋلەتتى دە كورىكتى عيماراتتار سالۋمەن بىرگە, استانانى رۋحاني دامۋدىڭ ورتالىعىنا اينالدىرۋداعى قادامدار ارقىلى ىلگەرىلەۋشىلىكتىڭ دە ىرگەتاستارى وسى ەلوردادا قالانىپ جاتقانى شىندىق. جالپى, استانا قاي جاعىنان وڭىرلەرگە ونەگە ورداسى بولىپ وتىر. ەلورداداعى كوركى كوز تارتاتىن مادەني جانە الەۋمەتتىك عيماراتتار قاتارى جىل ساناپ تولىعا تۇسۋدە. باسقاسىن بىلاي قويعاندا, جاقىندا عانا پايدالانۋعا بەرىلگەن 3000 ورىندىق «استانا وپەرا» وپەرا جانە بالەت تەاترىنىڭ ءوزى نەگە تۇرادى.
باتىس پەن شىعىستىڭ وزىق ساۋلەت ونەرىن بويىنا جيناعان ارقاداعى ارۋ قالانىڭ كەلەشەگى كەمەل ەكەنىنە قازىردىڭ وزىندە كوز جەتىپ, كوڭىل قۋانادى. ءار بارعان سايىن اجارى ايشىقتالا تۇسەتىن ەلوردانىڭ بۇگىنگى دامۋ قارقىنى وڭىرلەردى دە ىزىنەن ىلەستىرۋدە دەۋ ورىندى بولماق. وڭىرلەر استاناعا قاراپ بوي تۇزەيدى, ۇلگى الادى. ەلوردا تەك ساۋلەتىمەن عانا ەمەس, ەلىمىزدىڭ يننوۆاتسيالىق جۇرەگىنە اينالۋىمەن دە ونەگە بولۋدا. عىلىم مەن ءبىلىمنىڭ يگى باستامالارى دا وسىنان ارنا تارتۋدا. استاناداعى نازارباەۆ ۋنيۆەرسيتەتى, نازارباەۆ زياتكەرلىك مەكتەبى عىلىمي ىزدەنىستەرگە ءىزاشار جاساپ وتىرعان ىرگەلى وقۋ ورنى رەتىندە قالىپتاسقانى بەلگىلى. وبلىستىڭ ورتالىعىندا نازارباەۆ زياتكەرلىك مەكتەبى اشىلىپ جۇمىس ىستەۋدە. بۇل جاستاردىڭ تەرەڭ ءبىلىم الىپ, ەلىمىزدىڭ ەكونوميكالىق دامۋ مۇمكىندىكتەرىن جاڭا ساتىعا كوتەرۋگە قىزمەت ەتەتىن بولادى.
تۇڭعىش پرەزيدەنتىمىز ن.ءا.نازارباەۆتىڭ «استانا – قازاقستاننىڭ ۇلى ءداۋىرى جانە ستراتەگيالىق ۆەكتورى» اتتى ماقالاسىندا الەمدە عىلىم مەن ءبىلىم باسەكەلەستىگى العى كەزەككە شىققان قازىرگى كەزدە يننوۆاتسيالىق دامۋدىڭ قاجەتتىگى اتاپ ءوتىلۋى تەگىن ەمەس. وسى باعىتتاعى استاناداعى يگى قادامدار وڭىرلەرگە ۇلگى-ونەگە بولادى. ءبىزدىڭ مارات وسپانوۆ اتىنداعى مەملەكەتتىك مەديتسينا ۋنيۆەرسيتەتى استانالىق ءارىپتەستەرىمەن قويان-قولتىق جۇمىس ىستەيدى. سونىڭ ناتيجەسىندە وقۋ ورنىنا قاراستى ەمدەۋ ورىندارىندا وسى زامانعى مەديتسينالىق قوندىرعىلار ورناتىلىپ, كۇردەلى وپەراتسيالار جاساۋعا قول جەتكىزىلىپ وتىر. بۇرىندارى استانادا عانا جاسالاتىن ەڭ ءبىر كۇردەلى وپەراتسيالاردى وزىمىزدە جاساۋعا استانا عالىمدارىنىڭ دا قولداۋ-كومەگى بولعانىن ايتۋ ورىندى. بولاشاق دارىگەرلەرگە ساپالى ءبىلىم, سانالى تاربيە بەرۋدىڭ زاماناۋي تاسىلدەرىن ەنگىزىپ, قولدانۋعا باعىت ۇستاۋدامىز
قازىر ءبىزدىڭ ۋنيۆەرسيتەتتە ەڭبەك ەتەتىن 450-دەن استام ۇستازدىڭ 40-تان استامى مەديتسينا عىلىمدارىنىڭ دوكتورى, 180-نەن استامى عىلىم كانديداتتارى بولىپ تابىلادى. بيىل العاشقى تۇلەكتەرىن ۇشىرعانىنا 50 جىل تولاتىن جوعارى وقۋ ورنىندا 5 مىڭنان استام بولاشاق دارىگەر وقيدى. سوڭعى جىلدارى ۋنيۆەرسيتەت تۇلەكتەرى اۋىلدىق جەرلەرگە بارىپ, حالىقتىڭ دەنساۋلىعىن ساقتاۋعا ۇلەس قوسۋعا ىقىلاستى بولا تۇسۋدە.
قازاقستان قوعامىنىڭ بىرلىگىن نىعايتۋدا, بارلىق ەتنوستار مەن كونفەسسيالار اراسىنداعى دوستىقتى ورنىقتىرۋدا استانا وڭىرلەرگە ساۋلە شاشادى, نۇرىن توگەدى. ونى ءوزىم ەڭبەك ەتەتىن جوعارى وقۋ ورنىنداعى ىزدەنىستى قادامداردان, وبلىستاعى جۇزەگە اسىرىلىپ جاتقان ءىرى جوبالاردان كورەمىن. مىنە, بۇل استانادان ارنا تارتاتىن ىرگەلى ىستەردىڭ, مادەني دامۋدىڭ وڭىرلەردە جالعاسىن تاباتىنىنا سەندىرە تۇسەدى. ەلوردانى ونەگە ورداسى دەۋىم دە سوندىقتان.
سۇيەش جارماعامبەتوۆ,
مارات وسپانوۆ اتىنداعى مەملەكەتتىك
مەديتسينا ۋنيۆەرسيتەتىنىڭ دوتسەنتى, مەديتسينا عىلىمدارىنىڭ كانديداتى.
اقتوبە.
