«قازاقستان ۆاگون جاساۋ كومپانياسى» جشس جۇمىسىن ۇدەتتى
وسىدان تۇپ-تۋرا بەس جىل بۇرىن, ياعني 2008 جىلى ەكىباستۇز قالاسىنداعى «تامان» جاۋاپكەرشىلىگى شەكتەۋلى سەرىكتەستىگى ۆاگون جوندەۋ دەپوسىنىڭ نەگىزىندە «قازاقستان ۆاگون جاساۋ كومپانياسى» (قۆك) قۇرىلدى. وسىلايشا, ۆاگون جاساۋ سالاسىنداعى وتاندىق زاماناۋي كاسىپورىننىڭ تۇساۋى كەسىلىپ, العاشقى قادامىن اتتادى.
ال 2010 جىلدىڭ مامىرىنان باستاپ ۇدەمەلى يندۋستريالىق-يننوۆاتسيالىق دامۋدىڭ مەملەكەتتىك باعدارلاماسى شەڭبەرىندە كاسىپورىندا قۇرىلىس-مونتاج جۇمىستارى جۇرگىزىلدى. قاجەتتى جاڭا قوندىرعىلار مەن جابدىقتار اكەلىنىپ ورناتىلدى. ءوندىرىس وشاعىنىڭ كەسكىن-كەلبەتى مۇلدەم وزگەرىپ, وزگەلەردىڭ نازارىن وزىنە اۋدارتتى. كەلەسى جىلدىڭ ماۋسىم ايىندا مۇندا وندىرىستىك كەشەن پايدالانۋعا قوسىلدى. سودان ءونىم وندىرۋگە قۇلشىنا كىرىسكەن كاسىپورىن شابىسىنان جاڭىلمادى. اراعا جىل سالىپ «قازاقستان تەمىر جولى» ۇك» اق-قا جالپى سانى 1 مىڭ 700 بىرلىك بولاتىن جىلجىمالى قۇرامنىڭ لەگىن جەتكىزىپ, ايدارىنان جەل ەستى. ءيا, ءىستىڭ كوزىن تابۋ دەگەن مىنە وسى.
بيىل زاۋىتتىڭ تاڭباسى باسىلعان 1 مىڭ 750 جارتىلاي ۆاگون قتج-نىڭ پاركىن تولىقتىرىپ, شويىن جولدىڭ ءارىن كىرگىزەدى. الداعى جىلى ونىڭ قاتارى تاعى دا 2 مىڭ جارتىلاي ۆاگونعا جانە 500 جابىق ۆاگونعا ارتادى ەكەن. ءسويتىپ, كاسىپورىن بۇيىرتسا جوسپارلانعان جوبالىق قۋاتىنا شىعايىن دەپ وتىر.
ازعانا ۋاقىت ىشىندە ۆاگون شىعارۋدى وڭىنان كەلتىرۋ روبوتتىق جانە ميكروپروتسەسسورلىق تەحنيكالاردى, ستەند-ترانسفورمەرلەردى قولدانۋعا نەگىزدەلگەن ءوندىرىس تەحنولوگياسىن اۆتوماتتاندىرۋ ارقاسىندا مۇمكىن بولدى. بولاشاقتا مۇندا نارىق كونيۋنكتۋراسىنا قاراي, جۇك ۆاگوندارىنىڭ سانالۋان تۇرلەرى مەن ۇلگىلەرىن شىعارۋ دا جولعا قويىلماق.
بۇدان بۇرىن, وتاندىق ۆاگون جاساۋ سالاسىن دامىتۋ ماقساتىندا ىنتىماقتاستىقتىڭ ءتۇرلى نۇسقالارى قاراستىرىلعان ەدى. سونىڭ ىشىندە رەسەيلىك كاسىپورىن – «ۋرالۆاگونزاۆود» عوك» ااق-پەن دە بايلانىس ورناتىلدى. بۇل الىپ زاۋىتپەن «قتج» ۇك» اق 2011 جىلى قازاقستان ۆاگون جاساۋ كومپانياسىنىڭ ارقاۋىندا بىرلەسكەن كاسىپورىن قۇرۋ تۋرالى نيەت مەموراندۋمىنا قول قويىپ, باتۋالاسقان بولاتىن. الايدا, «ۇيدەگى كوڭىلدى بازارداعى نارىق بۇزادى» دەمەكشى, قۇبىلمالى مىنا زاماندا قاتىپ قالعان ەشنارسە جوق ەكەن. ۋاقىت تالابىنا ساي, اتالعان ىنتىماقتاستىقتى ودان ءارى جالعاستىرۋدىڭ قاجەتتىلىگى كۇن تارتىبىنەن ءتۇسىپ قالدى. قازىرگى كەزدە قۆك ءوز مۇمكىندىگىن مەيلىنشە شەبەرلىكپەن پايدالانىپ, ۆاگون شىعارۋدا شوقتىعى بيىك تابىسقا قول جەتكىزدى.
ۆاگون جاساۋ ءوندىرىسىنىڭ باسەكەلەستىككە قابىلەتتىلىگى ەڭ الدىمەن كاسىپورىننىڭ تەحنيكالىق رەسۋرستارىنا تىكەلەي نەگىزدەلگەن. زاۋىتتىڭ وندىرىستىك الاڭدارى 17 گەكتاردان استام اۋماقتى الىپ جاتىر. ۆاگون جاسايتىن ءوندىرىس ورىندارى گەرمانيا, يتاليا, اۆستريا, شۆەتسيا, شۆەيتساريا, سلوۆاكيا, رەسەي جانە ۋكراينا ءتارىزدى تەحنولوگياسى بارىنشا دامىعان الەمدىك جەتەكشى وندىرۋشىلەردىڭ ەڭ وزىق ءونىمدى تەحنيكالارىمەن جاراقتاندىرىلعان.
«قازاقستان ۆاگون جاساۋ كومپانياسى» جشس بۇگىنگى تاڭدا امبەباپ جۇك تاسيتىن جارتىلاي ۆاگوندار شىعارۋعا مامانداندىرىلعان. دەگەنمەن, ءوندىرىستى ءارتاراپتاندىرۋ شەڭبەرىندە 2017 جىلعا دەيىن ۆاگونداردىڭ ۇلگىلىك قاتارىن كەڭەيتۋ بويىنشا ءىس-شارا جوسپارلانىپ وتىرعان جايى بار. جانە دە ەلىمىزدە جارتىلاي ۆاگوندار جەتىسپەۋشىلىگى بۇرىنعىداي وتكىر كۇيىندە قالىپ وتىرعان جوق. وسىعان وراي نارىق تالابىنا جاۋاپ بەرەتىن جاڭا ونىمدەر – جابىق ۆاگونداردى, پلاتفورمالاردى جانە تسيستەرنالاردى قوسىمشا شىعارۋ ءىسى بىرتىندەپ قولعا الىنىپ يگەرىلە باستادى.
دامۋ باعدارلاماسىنا سايكەس 2013-2014 جىلدارى جابىق ۆاگونداردى سەرتيفيكاتتاۋدىڭ سىناعى وتەدى, ال 2014 جىلى زاۋىتتا فيتينگتىك پلاتفورمالاردى شىعارۋ ءوندىرىسىن يگەرۋ باستالادى. ال كەلەسى جىلى تۇتىنۋشى سۇرانىسىنا يە ۆاگون-تسيستەرنا تۇرپاتتى بۇيىم جاساۋ تەحنولوگياسى مەن ءوندىرىسىن ىسكە اسىرۋ جوسپاردا تۇر.
كاسىپورىن كۇندەلىكتى جۇمىسىندا ۇدەمەلى ادىستەر مەن تاسىلدەردى ۇنەمى قولدانادى. ءىس تەتىگىنە ابدەن قانىعۋدىڭ مۇنداي جولى العا قويعان جوسپار-مىندەتتى ويداعىداي جۇزەگە اسىرۋعا نەگىز قالايتىنى ءسوزسىز. بۇعان قۆك-نىڭ ISO 9001:2009 ساپا مەنەدجمەنتى جۇيەسى بويىنشا ءتيىستى حالىقارالىق ستاندارتپەن سەرتيفيكاتتالۋى ناقتى دالەل بولادى. سونداي-اق, جارتىلاي ۆاگوندار, قوس بىلىكتى تىركەمەلەر مەن دوڭعالاق جۇپتارى دا سەرتيفيكاتتارمەن اتالىپ ءوتىپتى.
تەمىر جول تەحنيكاسىن جاساۋ سالاسىن دامىتۋ – قازاقستاننىڭ يندۋستريالاندىرۋ كارتاسىنداعى باسىم باعىتتارىنىڭ بىرىنە اينالعانى قاشان. «قازاقستان تەمىر جولى» اكتسيونەرلىك قوعامى قۆك-مەن سەرىكتەسىپ, سىرتتان قوسىمشا قارجى جانە ينۆەستيتسيا ىزدەمەي-اق, وزىنە قاراستى «ۆوستوكماشزاۆود» اق-تىڭ كورىگىن قىزدىرىپ, ءونىم ءون ءدىرۋ كولەمىن ۇدەتە تۇسكەن.
زاۋىت ەلىمىزدە جۇك ۆاگوندارىن شىعارۋدى جولعا قويۋ ۇردىسىندە ءىرى ۆاگون قۇيماسىن قۇيۋ جونىندەگى جوبانى جۇزەگە اسىرۋ ۇستىندە. بۇگىنگى تاڭدا بۇل جوبا قۇيما تەحنولوگياسىن ودان ءارى جەتىلدىرۋگە جانە الداعى كەزدە الىناتىن ونىمدەردى سەرتيفيكاتتاۋمەن بىرگە پايدالانۋعا قوسىلاتىن ەكىنشى كەشەندەگى ىسكە قوسۋ-رەتتەۋ جۇمىستارىن اياقتاۋمەن قاتار ەڭسەرىلمەك.
«ۆوستوكماشزاۆود» اكتسيونەرلىك قوعامى سونداي-اق, تەمىر جولداعى جىلجىمالى قۇرام ءۇشىن وزگە دە بوسالقى بولشەكتەر ءوندىرىسىن اشۋعا كىرىسكەن. ءتۇيىپ ايتقاندا, بۇنىڭ ءبارى بولات جولدىڭ بويىنداعى جۇمىستىڭ ىرعاقتى ءارى ىركىلىسسىز اتقارىلۋىنا سەپتىگىن تيگىزەتىنى ءسوزسىز. ول ءوز كەزەگىندە ەكونوميكانىڭ ورلەپ ءوسۋىن جەدەلدەتەدى.
مارات اققۇل,
«ەگەمەن قازاقستان».
پاۆلودار وبلىسى.
