وبلىستىق ءماسليحاتتىڭ كەزەكتى ون ءتورتىنشى سەسسياسىندا وبلىس اكىمى ارحيمەد مۇحامبەتوۆتىڭ وزىنە جۇكتەلگەن فۋنكتسيالار مەن مىندەتتەردىڭ ورىندالۋى تۋرالى ەسەبى تىڭدالدى. ول وبلىستىق ءماسليحات دەپۋتاتتارىنىڭ الدىندا ۇستىمىزدەگى جىلعى العاشقى جارتىجىلدىقتا اتقارىلعان جۇمىستاردىڭ ءتىنىن تارقاتا باياندادى.
ءوڭىر باسشىسى ەلباسى نۇرسۇلتان نازارباەۆتىڭ «قازاقستان-2050» ستراتەگياسى – قالىپتاسقان مەملەكەتتىڭ جاڭا ساياسي باعىتى» اتتى جولداۋىنان تۋىندايتىن ءمىندەتتەردى جۇزەگە اسىرۋدا وڭىردە ىلگەرىلەۋشىلىك بار ەكەنىنە توقتالا كەلىپ, ءبىرىنشى جارتىجىلدىقتا ەكونوميكانىڭ بازالىق سەكتورىندا وڭ ناتيجەلەرگە قول جەتكىزىلگەنىن اتاپ كورسەتتى. ونىڭ ايتۋىنشا, ۇدەمەلى يندۋستريالىق-يننوۆاتسيالىق دامۋ مەملەكەتتىك باعدارلاماسىنىڭ ءتيىمدى جۇزەگە اسىرىلۋى ونەركاسىپ ءونىمىنىڭ ارتۋىنا سەپتىگىن تيگىزىپ وتىر, وبلىستىڭ ونەركاسىپ ءونىمىنىڭ جالپى كولەمىنىڭ 18 پايىزى – يندۋستريالاندىرۋ كارتاسىنا ەنگىزىلگەن جاڭا وندىرىستەردىڭ ۇلەسىنە تيەسىلى. ءبىرىنشى جارتىجىلدىقتا جالپى سوماسى 1,1 ميلليارد تەڭگە بولاتىن 3 جاڭا نىسان ىسكە قوسىلىپ, 150 جاڭا جۇمىس ورنى اشىلعان. ال جىلدىڭ اياعىنا دەيىن 1 مىڭنان استام جۇمىس ورنىن اشاتىن, جالپى سوماسى 120,1 ملرد. تەڭگە بولاتىن 10 جاڭا جوبانى ءجۇزەگە اسىرۋ جوسپارلانىپ وتىر.
وبلىس اكىمى جىل باسىنان بەرى بەلسەندى شاعىن جانە ورتا بيزنەس سۋبەكتىلەرىنىڭ سانى 1,5 پايىزعا ارتىپ, 32,9 مىڭعا جەتكەنىن مالىمدەدى. اتالعان سالادا قازىر 118,4 مىڭ ادام جۇمىس ىستەيدى, بۇل بىلتىرعى كورسەتكىشپەن سالىستىرعاندا, 7 پايىزعا كوپ دەگەن ءسوز. جەرگىلىكتى بيۋدجەت تۇسىمدەرىنىڭ ۇشتەن ءبىرىن قامتاماسىز ەتىپ وتىرعان كاسىپكەرلەردىڭ بەلسەندى جۇمىس جاساۋىنا «جول كارتاسى-2020» باعدارلاماسى وڭ ىقپال ەتۋدە. بۇل باعدارلاما بويىنشا وبلىستا 784 كاسىپكەر مەملەكەتتىك قولداۋعا يە بولعان. بيىل رەسپۋبليكالىق بيۋدجەتتەن «جول كارتاسى-2020»-نىڭ جۇزەگە اسىرىلۋىنا 3187,6 ميلليون تەڭگە ءبولىنىپتى.
جىل باسىنان بەرگى التى ايدا اۋىل شارۋاشىلىعى جالپى ءونىمىنىڭ كولەمى 38,5 ميلليارد تەڭگەنى قۇراپتى. وبلىس باسشىسى سالاداعى كورسەتكىشتەردىڭ تومەندەۋى, ەڭ الدىمەن, مال باسى مەن اۋىل شارۋاشىلىعى ءونىمدەرىنىڭ ازايۋىنا بايلانىستى بولىپ وتىرعانىن جاسىرمادى. سوندىقتان مال شارۋاشىلىعىن دامىتۋعا ايرىقشا كوڭىل ءبولۋ قاجەت, دەدى ا.مۇحامبەتوۆ. جالپى, ءبىرىنشى جارتىجىلدىقتا اۋىل شارۋاشىلىعى ءوندىرىسىن دامىتۋعا 3,2 ميلليارد تەڭگە قارجى جۇمسالعان, جىل اياعىنا دەيىن 4,0 ميلليارد تەڭگە يگەرۋ كوزدەلۋدە. سالىقتار مەن باسقا دا تولەمدەر كولەمى ارتا ءتۇسىپ وتىر, ايماق ەكونوميكاسىنىڭ قارقىندى دامۋى ناتيجەسىندە تۇرعىنداردىڭ ءال-اۋقاتى جاقسارىپ كەلەدى, ورتاشا ايلىق جالاقى 7 پايىزعا ءوسىپ, كەدەيشىلىك دەڭگەيىنەن تومەن ءومىر ءسۇرىپ جاتقان ازاماتتار سانى 31 پايىزعا تومەندەگەن.
ءوڭىر باسشىسى وبلىستا «قولجەتىمدى تۇرعىن ءۇي-2020» باعدارلاماسىنىڭ بارلىق 9 باعىتى بىردەي جۇزەگە اسىرىلىپ جاتقانىنان حاباردار ەتتى.
سونداي-اق, قازىرگى ۋاقىتتا وبلىستا گازبەن قامتۋ بويىنشا سوماسى 3,6 ميلليارد تەڭگە بولاتىن 18 جوبا جۇزەگە اسىرىلىپ جاتقانىن اتاپ كورسەتتى. 2014 جىلى رەسپۋبليكالىق بيۋدجەتتەن وبلىستاعى ەلدى مەكەندەردى گازداندىرۋ ءۇشىن 7,8 ميلليارد تەڭگە ءبولۋ قاراستىرىلعان, مۇنىڭ ءوزى 2015 جىلعا قاراي وبلىس حالقىنىڭ 90 پايىزىن گازبەن قامتۋعا مۇمكىندىك بەرەدى, دەدى ول.
ەلدى مەكەندەردى سۋمەن قامتاماسىز ەتۋدە ىلگەرىلەۋشىلىك بار. جىل اياعىنا دەيىن توعىز اۋدانداعى 16 ەلدى مەكەندە, كەلەسى جىلى 22 اۋىلدا, 2015 جىلى تاعى 31 ەلدى مەكەندە جەر استى سۋ قورىن زەرتتەۋ جۇمىستارى ءجۇرگىزىلەدى دەپ كۇتىلۋدە. 2015 جىلعا قاراي وبلىس تۇرعىندارىنىڭ 90,5 پايىزى ورتالىقتاندىرىلعان اۋىز سۋمەن قامتاماسىز ەتىلەتىن بولادى.
وبلىس اكىمى بۇدان باسقا جىلۋ بەرۋ ماۋسىمىنا دايىندىق, اۆتوكولىك جولدارىن جوندەۋ, دەنساۋلىق ساقتاۋ مەن ءبىلىم بەرۋ سالالارىنا قاتىستى بىرقاتار ماسەلەلەرگە ايرىقشا توقتالىپ, جاڭا الەۋمەتتىك نىساندار سالۋ, «بالاپان» باعدارلاماسىن جۇزەگە اسىرۋ, سپورتتى دامىتۋ باعىتتارىنداعى جۇمىستاردى جۇيەلەي اڭگىمەلەدى. ول دەپۋتاتتاردىڭ قويعان ساۋالدارىنا تولىققاندى جاۋاپ بەرىپ, تولعاقتى ماسەلەلەردىڭ قالاي شەشىلەتىنى تۋرالى وي-پايىمدارىمەن ءبولىستى.
ساتىبالدى ءساۋىرباي,
«ەگەمەندى قازاقستان».
اقتوبە وبلىسى.
