جاستار جىلىنا وراي جاس مۇعالىمدەرگە قولداۋ كورسەتۋ ماقساتىندا ۇيىمداستىرىلعان ءىس-شارانىڭ اشىلۋ سالتاناتىمەن ينستيتۋت ديرەكتورى رايسا سادۆاكاسوۆا قۇتتىقتاپ, اعىلشىن ءتىلى ءپانى مۇعالىمدەرى ءۇشىن ۇيىمداستىرىلعان ترەنينگتەر توپتاماسىنىڭ ماڭىزدىلىعىن اتاپ ءوتتى. سونىمەن قاتار اعىلشىن ءتىلى باعدارلاماسى بويىنشا وڭىرلىك وفيس ديرەكتورى دجون سيلۆەر, اعىلشىن ءتىلى باعدارلاماسىنىڭ كوورديناتورى ولگا پاتەروۆا ترەنينگتەردىڭ ءساتتى وتۋىنە ىزگى تىلەكتەرىن ءبىلدىرىپ, ترەنينگكە قاتىسۋشى مۇعالىمدەرمەن ارنايى كەزدەسۋگە اقش-تىڭ الماتى قالاسىنداعى باس كونسۋلى ەريك مايەر كەلەتىندىگىن حابارلادى.
سونىمەن, «ۇستازدار ۇيىندە» اقش-تىڭ مەملەكەتتىك ءبىلىم دەپارتامەنتىنىڭ اعىلشىن ءتىلى بويىنشا «English Language Fellow» ستيپەندياتتارى, شەتەلدىك ون بەس ادىسكەر بەس سەكتسيا بويىنشا 150-دەن استام قالا مۇعالىمىنە ترەنينگتەرىن باستاپ كەتتى. «English Language Fellow» باعدارلاماسىنىڭ 50 جىلدىعىنا سايكەس, شەتەلدىك وقىتۋشىلار شەبەرلىك سىنىبىن وتكىزىپ, اعىلشىن ءتىلى ادىستەمەسىن وقىتۋ بارىسىنداعى ەڭ جوعارى ناتيجەگە قول جەتكىزۋ ەرەكشەلىكتەرىمەن جان-جاقتى تانىستىردى. 8 ساعاتتىق ترەنينگتەن سوڭ مۇعالىمدەر ينستيتۋتتىڭ ءماجىلىس زالىندا اقش-تىڭ الماتى قالاسىنداعى باس كونسۋلى ەريك مايەر مىرزامەن كەزدەستى. باس كونسۋل وسىنداي ماڭىزدى ءىس-شارانى ۇيىمداستىرۋعا ۇيىتقى بولعان الماتى قالاسى بويىنشا «ورلەۋ» باۇو» اق فيليالى باسشىلىعىنا العىس ءبىلدىرىپ, «English Language Fellow» باعدارلاماسىنىڭ قىسقاشا تاريحىنا توقتالدى.
اعىلشىن مادەنيەتىمەن تانىستىرۋ, اعىلشىن ءتىلىن الەم حالقىنا ۇيرەتۋ ماقساتىن كوزدەگەن باعدارلامانىڭ ىرگەتاسى 1969 جىلى قالاندى. قازىرگى تاڭدا 200-دەن استام اعىلشىن ءتىلىن تاراتۋشى مامان ايتۋلى باعدارلاما اياسىندا الەمنىڭ 80-نەن استام ەلىندە تاباندىلىقپەن ەڭبەك ەتۋدە. ەلۋ جىلدىعىنا وراي الماتى قالاسىنىڭ مۇعالىمدەرىنە ورتا ازيا وڭىرىندەگى باعدارلامانىڭ ۇزدىك وقىتۋشىلارى ساباق وتكىزىپ, ءوز تاجىريبەلەرىمەن ءبولىستى. وسىنداي باعدارلاما اياسىندا وتكىزىلگەن ترەنينگتەر توپتاماسىنىڭ اعىلشىن ءتىلى ءپانى مۇعالىمدەرىنىڭ تاجىريبەسىن شىڭداپ, ساباق ءوتۋ ادىستەرىن بايىتۋعا مۇمكىندىك جاسايتىندىعىنا ەريك مايەر مىرزا سەنىم ءبىلدىردى.
الماتى
