كەيدە جەك كورگەن دە جاقسىعا جورىلادى
جۇما, 20 شىلدە 2012 7:30
قازىر اقش-تىڭ مەملەكەتتىك حاتشىسى حيللاري كلينتوننىڭ ەگيپەتكە ساپارى ساياسي اڭگىمەگە ارقاۋ بولىپ وتىر. بىرقاتار اقپارات قۇرالدارى وسى ساپار كەزىندە بىرەۋلەردىڭ ۇلكەن لاۋازىمدى قوناققا قاراي قىزاناق, باتەڭكە لاقتىرعانىن مىسىر حالقىنىڭ اقش-قا دەگەن ۇلكەن قارسىلىعىنداي ەتىپ كورسەتكىسى كەلەدى.
جۇما, 20 شىلدە 2012 7:30
قازىر اقش-تىڭ مەملەكەتتىك حاتشىسى حيللاري كلينتوننىڭ ەگيپەتكە ساپارى ساياسي اڭگىمەگە ارقاۋ بولىپ وتىر. بىرقاتار اقپارات قۇرالدارى وسى ساپار كەزىندە بىرەۋلەردىڭ ۇلكەن لاۋازىمدى قوناققا قاراي قىزاناق, باتەڭكە لاقتىرعانىن مىسىر حالقىنىڭ اقش-قا دەگەن ۇلكەن قارسىلىعىنداي ەتىپ كورسەتكىسى كەلەدى.
بۇل جەردە, اسىرەسە, رەسەي اقپارات قۇرالدارى بەلسەندىلىك كورسەتىپ جاتىر. ولاردىڭ ماقساتى بىرەۋ عانا – اقش-تى اراب ەلدەرىنە قارسى قويۋ, ونى جوسىقسىز ەتىپ كورسەتۋ. اقش مەملەكەتتىك حاتشىسى قىزاناق اتۋدان ەشقانداي زارداپ شەككەن جوق, ال اقپارات قۇرالدارى ونىڭ قاسىنا ەرگەن ءبىر ەگيپەتتىك شەنەۋنىككە ءبىر قىزاناق تيگەنى ءۇشىن قۋانىشتارىن جاسىرا المايدى.
وسى ساپاردىڭ ماقساتى نە, ونىڭ ماڭىزى قانداي دەگەن ءماسەلە كوپ اقپارات قۇرالدارىن ونشا قىزىقتىرا قويمايتىنداي. شىن مانىندە بۇل تاريحي ماڭىزى بار ساپار دەسەك ءجون. ەگيپەت – اراب دۇنيەسىندەگى جەتەكشى ەل. وندا بولىپ جاتقان جاعداي جۇرتقا بەلگىلى. وسىناۋ وتپەلى كەزەڭدە تۇرعان ەلدەگى جاعدايدىڭ جاقسارۋىنا سەپتىگىن تيگىزۋدى كوزدەگەن قادامنىڭ بارلىعىن قۇپتاعان ءجون-اق. اقش مەملەكەتتىك حاتشىسىنىڭ بۇل ەلگە ساپارى – سونداي قادام.
بۇل ساپاردىڭ ءمانىن ۇعۋ ءۇشىن تاريحقا جۇگىنەيىك. اقش مەملەكەتى كۇنى كەشە حالىق تاقتان تايدىرعان حۋسني مۇباراكتى قولدادى. سول قولداۋعا سايكەس ەندى ەلدەگى جەتەكشى ساياسي كۇشكە اينالىپ وتىرعان «مۇسىلمان باۋىرلار» قوزعالىسىن ايىپتادى. قازىر جاعداي مۇلدە وزگەردى. قولداعان ادامى قۇلاپ, قارسىلاستارى بيلىكككە كەلدى. ەندى نە ىستەۋ كەرەك؟ بيلىك تىزگىنىن قارسىلاستارى ۇستادى ەكەن دەپ, ەگيپەتتەي ستراتەگيالىق ماڭىزدى ەلدەن باس تارتۋ كەرەك پە؟ اقش پاراساتتىلىق جولدى تاڭدادى – حالىقتىڭ باسىم كوپشىلىگىنىڭ قولداۋىنا يە بولعان بيلىكپەن ءتىل تابىسۋدى ءجون سانادى.
حيللاري كلينتون ءوز ساپارىن ەلدىڭ باستى پورتتى قالاسى الەكساندريادا اقش كونسۋلدىعىن اشۋدان باستادى. قارجى تاپشىلىعىنان ول 1993 جىلى جابىلىپ قالعان ەكەن, ەندى ونى قايتادان اشۋعا تۋرا كەلگەن. بۇل ەكى ەل اراسىنداعى قارىم-قاتىناستى دامىتۋعا جاعداي جاسايدى. سول شارا كەزىندەگى سوزىندە مەملەكەتتىك حاتشى ءوز ەلىنىڭ ەگيپەتتىڭ ىشكى ىسىنە ارالاسپاعانىن, كەشەگى وتكەن سايلاۋعا ىقپال جاساماعانىن مالىمدەدى. كىمدى سايلاۋ كەرەكتىگىن مىسىر حالقى ءوزى شەشكەنىن ايتتى.
وعان قىزاناق, باتەڭكە لاقتىرۋ ح.كلينتوننىڭ سول كونسۋلدىقتى اشىپ, سويلەر ءسوزىن ءسويلەپ بولىپ, كولىكتەرىنە كەتىپ بارا جاتقاندا باستالىپتى. بىراق سول لاقتىرعىشتاردىڭ مەملەكەتتىك حاتشىنى كوزدەۋگە جۇرەكتەرى داۋالاماي, ونىڭ كۇيەۋىنىڭ اشىناسى بولعان-مىس لەۆينسكايانىڭ اتىن اتاپ, ايقايلاعاننان ارىعا شامالارى كەلمەگەن سىڭايلى. جالپى, بۇلار كىمدەر دەگەندە, ولاردىڭ كەشەگى پرەزيدەنت سايلاۋىندا جەڭىسكە جەتكەن موحامماد مۋرسيگە قارسىلاستار ەكەنى انىق بولىپ وتىر. جانە ولار اقش-تىڭ جاڭا پرەزيدەنتتى قولداعانىنا دا قارسى. ال ەندى ونداي پىكىردەگىلەردىڭ وزدەرىن جەك كورگەندەرىن حيللاري حانىمنىڭ جاقسىلىققا جورۋىنا بولار.
اقش مەملەكەتتىك حاتشىسىنىڭ ەگيپەتتىڭ جاڭا پرەزيدەنتى موحامماد مۋرسيمەن كەزدەسۋى دە بۇل ەلدەگى جاعدايدىڭ ساۋىعۋىنا ىقپال ەتەدى دەپ تۇجىرىم جاساۋعا بولار. ۆاشينگتوننىڭ «ەگيپەتتە تولىقتاي ازاماتتىق بيلىككە كوشۋدى» قولدايتىنىن ءمالىمدەۋى دە ماڭىزدى.
ماماديار جاقىپ, «ەگەمەن قازاقستان».
