اۋدانداعى جانە وبلىستاعى جەتەكشى شارۋاشىلىقتاردىڭ ءبىرى «تۇرار» جاۋاپكەرشىلىگى شەكتەۋلى سەرىكتەستىگىنىڭ ۇجىمىمەن كەزدەستى. «تۇرار» – ەگىن جانە مال شارۋاشىلىعىمەن قاتار اينالىساتىن, اۋدانداعى ەڭ ءىرى سالىق تولەيتىن كاسىپورىن. ماسەلەن, 2018 جىلى قازىناعا 118 ميلليون تەڭگە قۇيدى.
بەردىبەك ساپارباەۆ ەڭبەك ۇجىمىمەن ەمەن-جارقىن اڭگىمەدە اۋىلداعى الەۋمەتتىك جاعدايدى, اۋىز سۋمەن, وتىنمەن قامتاماسىز ەتۋ جانە مەديتسينالىق كومەكتىڭ, جالاقىنىڭ كولەمى مەن بەرىلۋ مەرزىمى قانداي ەكەنىن سۇرادى. شارۋاشىلىقتا جىل بويى جۇمىس بولادى. ونىڭ ۇستىنە اۋىل تۇرعىندارى مال ۇستايدى, ءوز وتباسىن سۇتپەن, ەتپەن قامتاماسىز ەتەدى. «تۇرار» شارۋاشىلىعى جاس ماماندارىنا ارناپ 15 كەڭ, بارلىق قولايلىلىعى ەسكەرىلگەن ۇيلەردىڭ قۇرىلىسىن جالعاستىرىپ وتىر. شارۋاشىلىقتاعى ورتاشا ايلىق جالاقى 163 مىڭ تەڭگەنى قۇرايدى.
ۆيتسە-پرەمەر قوستانايداعى ازىق-ت ۇلىكتىڭ باعاسىنا كوڭىل ءبولدى. ول وبلىس ورتالىعىنداعى «Rauzet» سۋپەرماركەت دۇكەنىنە كىرىپ, كۇندەلىكتى پايدالانىلاتىن نەگىزگى ازىق-ت ۇلىك تۇرلەرىنىڭ باعاسىن سۇرادى. وڭىرلىك يگىلىك قورى قىزمەتىنىڭ شەڭبەرىندە 8 مىڭ 700 توننا 14 ءتۇرلى الەۋمەتتىك ماڭىزعا يە ازىق-ت ۇلىك ءۇشىن 1 ميلليارد 281 ميلليون تەڭگە ءبولىندى. نان باعاسى تۇراقتى جانە ناۋبايحانالاردىڭ جۇمىسى ۇزدىكسىز ءجۇرۋى ءۇشىن «توبىل» الەۋمەتتىك-ونەركاسىپتىك كورپوراتسياسى ءبىرىنشى سۇرىپتى 3191 توننا ۇندى 300 ميلليون تەڭگەگە ساتىپ الدى.
– ناۋبايحانالارعا تۇسەتىن ۇن ىرىكتەلەدى, يگىلىك قورىنان كەلگەن ۇن 94 تەڭگەدەن الىنادى. ناۋبايحانادان الەۋمەتتىك ناننىڭ ءبىر بولكەسى 80 تەڭگەدەن بوساتىلادى, دۇكەندەردە بۇل 83 تەڭگەدەن ساتىلادى, – دەدى اۋىل شارۋاشىلىعى باسقارماسىنىڭ باسشىسى جانسۇلتان تاۋكەنوۆ.
ۆيتسە-پرەمەر بەردىبەك ساپارباەۆتىڭ قاتىسۋىمەن وتكەن الەۋمەتتىك ارىپتەستىك, الەۋمەتتىك جانە ەڭبەك قاتىناستارىن رەتتەۋ جونىندەگى رەسپۋبليكالىق ءۇش جاقتى كوميسسيانىڭ وتىرىسىندا پرەزيدەنت جولداۋىنا وراي مەملەكەتتىك الەۋمەتتىك ەڭبەك ساياساتى ماسەلەلەرى ءسوز بولدى. وندا الدىمەن وبلىس اكىمى ارحيمەد مۇحامبەتوۆ وڭىردەگى ەڭبەك قاتىناستارى, ياعني ەڭبەك تاۋەكەلدەرى كارتاسى, جالاقى قارىزى تۋرالى باياندادى.
– وبلىستاعى سالالىق كاسىپوداقتار 21 كەلىسىمگە قول قويدى. ۇجىمدىق كەلىسىمدەر ءىرى جانە ورتا كاسىپورىنداردىڭ 97 پايىزىن قامتيدى. مونيتورينگ ناتيجەسى كورسەتكەندەي, وبلىستاعى كاسىپورىندار مەن مەكەمەلەردە جالاقى قارىزى جوق. ال وڭىردەگى بانكروتقا كەتكەن 2 كاسىپورىننىڭ 77 جۇمىسشىعا بەرەشەگى 16 ميلليون تەڭگەنى قۇرايدى, – دەدى ارحيمەد بەگەجان ۇلى.
پرەمەر-ءمينيستردىڭ ورىنباسارى بەردىبەك ساپارباەۆ اتالعان كوميسسيانىڭ باستى مىندەتى كاسىپورىنداردا ەڭبەك داۋىنىڭ ورشۋىنە جول بەرمەۋ, ونىڭ الدىن الۋ بولىپ تابىلاتىنىن ەسكەرتتى.
قوستاناي
