ۇكىمەت • 18 قاراشا، 2019

مەديتسينالىق قىزمەتتەردىڭ قولجەتىمدىلىگى ارتادى

13 رەتكورسەتىلدى

ۇكىمەت وتىرىسىندا دەنساۋلىق ساقتاۋ ءمينيسترى ەلجان ءبىرتانوۆ مىندەتتى الەۋمەتتىك مەديتسينالىق ساقتاندىرۋدى ء(مامس) ەنگىزۋ بويىنشا قاراعاندى وبلىسىندا پيلوتتىق جوبانى ىسكە اسىرۋ بارىسى تۋرالى بايانداپ بەردى. بۇل تۋرالى primeminister.kz حابارلادى. 

بيىل 1 قىركۇيەكتە باستالعان قاراعاندى وبلىسىنداعى ءمامس پيلوتتىڭ نەگىزگى ماقساتتارى – مەديتسينالىق قىزمەتتى الۋشىلاردىڭ «ساقتاندىرىلۋ» ستاتۋسىن سايكەستەندىرۋ، تەگىن مەديتسينالىق كومەكتىڭ كولەمىندەگى جانە مەديتسينالىق ساقتاندىرۋ جۇيەسىندەگى قىزمەتتەردى جەكە-جەكە ەسەپكە الۋ، 2020 جىلدان باستاپ ءمامس جۇيەسىن تولىعىمەن ەنگىزۋ ماقساتىندا دايىندىق جۇمىستارىن جۇرگىزۋ. 

پيلوتتى ىسكە اسىرۋ ءۇشىن بيۋدجەتتەن قوسىمشا 2،3 ملرد تەڭگە ءبولىندى، سونىڭ ىشىندە پروفيلاكتيكالىق قاراپ-تەكسەرۋمەن كونسۋلتاتسيالىق-دياگنوستيكالىق قىزمەتتەردىڭ قولجەتىمدىلىگىن جوعارىلاتۋعا 1،7 ملرد تەڭگە جانە مەديتسينالىق وڭالتۋدى كەڭەيتۋگە 600 ملن تەڭگەگە جۋىق قاراجات ءبولىندى. 

پيلوت شەڭبەرىندە 5 نەگىزگى باعىت بويىنشا جوبالىق توپتار قۇرىلدى: نورماتيۆتىك-قۇقىقتىق اكتىلەردى ازىرلەۋ، تسيفرلاندىرۋ، مەديتسينالىق قىزمەتتەردى ساتىپ الۋ جانە وعان تولەم جۇرگىزۋ، تولەمدەردىڭ تۇراقتى جۇرگىزىلۋىن قامتاماسىز ەتۋ، اقپاراتتىق-ءتۇسىندىرۋ جۇمىستارى.

ء«مامس جۇيەسىن ءتيىمدى ەنگىزۋدىڭ نەگىزگى ماسەلەلەرىنىڭ ءبىرى – جۇيەگە ەل تۇرعىندارىنىڭ بارلىعىن تارتۋ. بۇگىندە ەلىمىز بويىنشا تۇرعىنداردىڭ 97%-نىڭ الەۋمەتتىك ستاتۋسى انىقتالدى، قاراعاندى وبلىسىندا – 98%. قاراعاندى وبلىسىندا تاعى 32 مىڭ ادامنىڭ ستاستۋسىن جاڭارتۋ كەرەك. جالپى، ەلىمىز بويىنشا 593 مىڭ ادامنىڭ ستاتۋسى جاڭارتىلۋى ءتيىس»، — دەدى ە. ءبىرتانوۆ.

بۇگىندە بولجامدى ساقتاندىرىلماعان ازاماتتار دەربەس تولەۋشى رەتىندە جۇيەگە قاتىسا الادى. 

اقپاراتتىق جۇيەلەردىڭ ازىرلىگى بويىنشا، قاراعاندى وبلىسىندا دايىندىق جۇمىستارى تولىق اياقتالدى. قاراعاندى وبلىسىندا ەكى اقپاراتتىق جۇيە جۇمىس ىستەيدى. ونىڭ ءبىرى اۋرۋحانالار مەن ەمحانالارعا ارنالسا، ەكىنشىسى جەدەل مەديتسينالىق جاردەم قىزمەتىنە ارنالعان.

«پيلوت اياسىندا قاراعاندى وبلىسىندا كونسۋلتاتسيالىق-دياگنوستيكالىق قىزمەتتەردىڭ قولجەتىمدىلىگى ەداۋىر ارتتى. مىسالى، كومپيۋتەرلىك توموگرافيا قىزمەتتەرىنىڭ قولجەتىمدىلىگى 78%-عا، مەديتسينالىق وڭالتۋ قىزمەتتەرىنىڭ قولجەتىمدىلىگى 73%-عا جانە كونسۋلتاتسيالىق-دياگنوستيكالىق كومەك قىزمەتتەرىنىڭ قولجەتىمدىلىگى 42%-عا ۇلعايدى. جالپى، تۇرعىندار ءۇشىن مەديتسينالىق قىزمەتتەردىڭ قولجەتىمدىلىگى ارتۋدا»، — دەدى ە. ءبىرتانوۆ.

قاراعاندى وبلىسىندا جۇرگىزىلىپ جاتقان پيلوت كورسەتكىشتەرى بويىنشا نورماتيۆتىك-قۇقىقتىق اكتىلەر ەنگىزىلدى. تسيفرلاندىرۋ بويىنشا 100% كىرىكتىرىلدى. مەديتسينالىق قىزمەتتەردى ساتىپ الۋ بويىنشا مەديتسينالىق ساقتاندىرۋ قورى بۇل باعىتتاعى جۇمىستاردى اياقتاۋدا. 1-31 جەلتوقسان ارالىعىندا قور ىرىكتەۋ جانە تەگىن مەديتسينالىق كومەكتىڭ كەپىلدەندىرىلگەن كولەمى جانە ءمامس پاكەتتەرى بويىنشا مەديتسينالىق قىزمەتتەرگە كەلىسىمشارت جاساۋ راسىمدەرىن وتكىزەدى. سونىمەن قاتار تولەمدەردىڭ تۇراقتىلىعىن قامتاماسىز ەتۋ جۇمىستارى جۇرگىزىلۋدە. 

سونىمەن قاتار تۇرعىندار اراسىندا اقپاراتتىق-ءتۇسىندىرۋ جۇمىستارىن كۇشەيتۋ جۇمىستارى جۇرگىزىلۋدە، جىل سوڭىنا دەيىن جوسپاردىڭ 100% ورىندالۋى قامتاماسىز ەتىلەدى.

«جالپى، قاراعاندى وبلىسىندا پيلوتتىق جوبا جوعارى دەڭگەيدە جۇرگىزىلدى دەپ ايتۋعا بولادى. ەلىمىزدە ءمامس ەنگىزۋگە دايىندىق جۇمىستارى جالعاسۋدا»، — دەدى دەنساۋلىق ساقتاۋ ءمينيسترى.

قاراعاندى وبلىسىنىڭ اكىمى جەڭىس قاسىمبەك وڭىردە پيلوتتى جۇرگىزۋ اياسىندا تسيفرلىق ينفراقۇرىلىم بويىنشا اۋقىمدى جۇمىستار اتقارىلعانىن اتاپ ءوتتى. وڭىردەگى بارلىق مەديتسينا ۇيىمدارى ءبىر تسيفرلىق الاڭعا بىرىكتى جانە رەسپۋبليكالىق اقپاراتتىق جۇيەلەرمەن كىرىكتىرىلدى. ەمحاناعا بەكىتىلگەن ءاربىر ازامات ءۇشىن ەلەكتروندى دەنساۋلىق پاسپورتى جاسالدى. اۋىلدىق ەلدى مەكەندەردە مەديتسينا ۇيىمدارىن مەملەكەتتىك-جەكەشەلىك ارىپتەستىك ەسەبىنەن ينتەرنەت جەلىسىنە 100% قوسۋ جۇمىستارى جۇرگىزىلىپ جاتىر. ج. قاسىمبەك قاراعاندى وبلىسىنىڭ اۋماعىندا ءمامس ەنگىزۋ بويىنشا پيلوتتى جۇرگىزۋدىڭ العاشقى ناتيجەلەرى تۇرعىندار ءۇشىن ساپالى ءارى ۋاقىتىلى مەديتسينالىق كومەكتىڭ باسىمدىعىن دالەلدەيتىنى ايتتى. 

ءمامس ەنگىزىلۋىمەن 1 ساقتاندىرىلعان ادامعا جۇمسالاتىن شىعىندار 57%-عا ارتادى. 

بۇگىنگى كۇنى ءمامس جۇيەسىنە تولەمدەر ەكىنشى دەڭگەيلى 25 بانك ارقىلى، ونىڭ ىشىندە 7 ينتەرنەت بانكينگ پورتالى ارقىلى جۇزەگە اسىرىلادى. 2019 جىلدىڭ 15 جەلتوقسانىنان باستاپ بارلىق مەديتسينالىق ۇيىمداردا وزىنە-ءوزى قىزمەت كورسەتۋ تەرمينالدارى ورناتىلادى. 

«الەۋمەتتىك مەديتسينالىق ساقتاندىرۋ قورى» كەاق باسقارما توراعاسى ايباتىر جۇماعۇلوۆ قوردىڭ ءمامس ەنگىزۋگە ازىرلىگى تۋرالى بايانداي وتىرىپ، جۇيەنىڭ ينستيتۋتسيونالدىق نەگىزدەرى مەن قاعيدالارىن قالىپتاستىرۋ جۇمىستارى 2015 جىلى باستالعانىن اتاپ ءوتتى. بۇگىندە مەديتسينالىق قىزمەتتەردىڭ الەۋەتتى جەتكىزۋشىلەرىنىڭ بازاسى جاسالعان. بۇل تىزىمگە 1940 مەديتسينا ۇيىمى كىردى. ونىڭ ىشىندە 60% — جەكەمەنشىك. سونىمەن قاتار، قور تەگىن مەديتسينالىق كومەك پەن مىندەتتى مەديتسينالىق ساقتاندىرۋ اياسىندا 2020 جىلعا ارنالعان مەديتسينالىق قىزمەتتەردى ساتىپ الۋ جوسپارىن جاساۋ جۇمىستارىن اياقتادى.

پرەمەر-ءمينيستردىڭ ورىنباسارى ب. ساپارباەۆ ءوز كەزەگىندە مىندەتتى الەۋمەتتىك مەديتسينالىق ساقتاندىرۋدى ەنگىزۋ ماسەلەسىندە جۇمىس بەرۋشىلەردىڭ قاراجاتتى ۋاقىتىلى اۋدارۋىنا ەرەكشە كوڭىل ءبولۋ كەرەكتىگىن ايتتى. 

ە.ءبىرتانوۆ ءمامس جۇيەسىن ەنگىزۋ كەيبىر مەديتسينالىق قىزمەتتەردىڭ قولجەتىمدىلىگىن 7 ەسەگە ارتتىراتىنىن اتاپ ءوتتى. 

تاريفتەردىڭ ءوسۋى 10%-دان 20%-عا دەيىن قۇرايدى. بۇل مەديتسينا قىزمەتكەرلەرىنىڭ جالاقىسىن 30%-عا ارتتىرۋعا مۇمكىندىك بەرەدى. مەديتسينالىق تەحنيكامەن جاراقتاندىرىلۋ دەڭگەيى 70%-دان 73%-عا دەيىن ارتادى. ءمامس ەنگىزۋ قازىرگى كەزدەگى «قالتا» شىعىندارىن 2020 جىلى 30%-عا، ال 2025 جىلعا قاراي شامامەن 2 ەسەگە تومەندەتۋگە مۇمكىندىك بەرەدى. 

جالپى، ءمامس ەنگىزۋگە ازىرلىكتىڭ جوعارى دەڭگەيىن اتاپ وتكەن ءجون. 

سوڭعى جاڭالىقتار

كۇلكى كەرۋەنى № 20

رۋحانيات • 06 جەلتوقسان، 2019

ورالدا جاستار باستامالارىن قولداۋ جاقسى

ايماقتار • 06 جەلتوقسان، 2019

قونىس اۋدارۋشىلاردى قولداۋ قانداي؟

قوعام • 06 جەلتوقسان، 2019

تاۋلىگىنە 15-16 توننا ءسۇت الىنادى

ايماقتار • 06 جەلتوقسان، 2019

ۇقساس جاڭالىقتار