ايتۋلى شاراعا ەلىمىزدىڭ ءار وڭىرىنەن جانە رەسەيدەن مەيماندار قاتىستى. ەسىمى ەلگە جاقسى تانىمال تۇلعانى سالتاناتتى ۇلىقتاۋ ماناش قوزىباەۆتىڭ ەسكەرتكىشىنە گۇل شوقتارىن قويۋدان باستالدى.
«ماناش قوزىباەۆ – ەلىمىز تاۋەلسىزدىك العاننان كەيىن ۇلت تاريحىن جاڭاشا پايىممەن جان-جاقتى زەردەلەگەن عالىمداردىڭ بىرەگەيى. قايراتكەردىڭ قالدىرىپ كەتكەن عىلىمي ەڭبەكتەرى وسكەلەڭ ۇرپاق ءۇشىن وتە ماڭىزدى. جاس بۋىن وكىلدەرى اكادەميكتىڭ جازعان تاريحي ەڭبەكتەرىنەن ءنار الىپ كەلەدى. ءبىلىم ورداسىندا ستۋدەنتتەردىڭ قاتىسۋىمەن كونفەرەنتسيالار ءجيى وتەدى», دەدى ۋنيۆەرسيتەت رەكتورىنىڭ مىندەتىن اتقارۋشى ەربول يساقاەۆ.
ەگەمەندىك پەن تاۋەلسىزدىك جولىندا زور ەڭبەك سىڭىرگەن ماناش قاباش ۇلىنىڭ مۇراسى جان-جاقتى زەرتتەلىپ كەلەدى. شاكىرتى, ل. گۋميلەۆ اتىنداعى ەۇۋ پروفەسسورى, تاريح عىلىمدارىنىڭ دوكتورى تىلەگەن سادىقوۆتىڭ ايتۋىنشا, مۇنداي مازمۇنداعى شارالار ۇلى عالىمنىڭ رۋحىنا كورسەتىلگەن ۇلكەن قۇرمەت بولىپ تابىلادى. ول كىسىنىڭ ارتىنا قالدىرعان مۇراسى مەن ەڭبەكتەرىن وسكەلەڭ ۇرپاق كەڭىرەك ءبىلىپ, تەرەڭىرەك يگەرگەنى دۇرىس دەيدى.
ۇلت تاريحىنىڭ تامىرىن تەرەڭنەن ىزدەگەن عالىم كوزى ءتىرى بولعاندا تالاي سىردى اشار ەدى دەيدى ءىزباسارلارى. ول كىسىنىڭ قول استىندا ەڭبەك ەتىپ, بىرلەسە عىلىمي جۇمىستار جازعان عالىمداردىڭ ءبىرى – ءزيرابۇبى تولەنوۆا. ول ش. ءۋاليحانوۆ اتىنداعى تاريح جانە ەتنولوگيا ينستيتۋتىنان ارنايى كەلىپ, جىلى لەبىزدەرىمەن ءبولىستى.
بەلگىلى عالىمنىڭ 88 جىلدىعىنا وراي ۋنيۆەرسيتەت اۋماعىندا ستۋدەنتتەر اللەياسى اشىلدى.
سولتۇستىك قازاقستان وبلىسى
