ديپلومات م. قوزىباەۆ اتىنداعى سقمۋ-ءنىڭ ستۋدەنتتەرىمەن, وقىتۋشىلارىمەن كەزدەسىپ, شۆەتسيانىڭ فەمينيستىك سىرتقى ساياساتى تۋرالى ءدارىس وقىدى. مەملەكەتتىڭ ايەلدەر قۇقىعىن قورعاۋ جولىندا اتقارىپ جاتقان ءىس-تاجىريبەسىمەن تانىستىردى.
«گەندەرلىك تەڭسىزدىكتىڭ سالدارىنان ايەلدەردىڭ قۇقىعى شەكتەلىپ كەلەدى. بۇگىندە الەم بويىنشا 63 ملن قىز بالا مەكتەپكە بارمايدى. ءاربىر ءۇشىنشى ايەل فيزيكالىق نەمەسە جىنىستىق زورلىقتىڭ قۇربانىنا اينالادى. وعان قوسا كۇن سايىن جاسى 18-گە تولماعان 47 مىڭ بويجەتكەن ەركىنەن تىس كۇيەۋگە شىعادى», دەدى مارتەبەلى ەلشى ءوز بايانداماسىندا.
ونىڭ ايتۋىنشا, ايەلدىڭ مىندەتى ۇيدە وتىرىپ, بالا باعۋ دەگەن قاعيدامەن شۆەدتەر كەلىسپەيتىن كورىنەدى. ەر ازاماتتار مەن ايەلدەردىڭ قۇقىقتارىن تەڭەستىرۋ ءۇشىن «شۆەد اكەسى» دەگەن مەملەكەتتىك باعدارلاما قابىلدانىپتى. وتباسىندا بالا دۇنيەگە كەلسە, دەكرەتتىك دەمالىسقا اكەسى دە شىعادى. بالا كۇتىمىمەن اينالىساتىن اكەلەرگە 3 اي بويى جالاقىسىنىڭ 80 پايىزى تولەنەدى. شۆەتسيا ۇكىمەتى ايەلدەردىڭ ساياساتتاعى ءرولى باسىمىراق بولۋى ءتيىس دەگەن ۇستانىمدا. سونداي-اق مۇراگەرلىك, جەردى جەكە مەنشىككە الۋ, تاعى باسقا ماسەلەلەر بويىنشا دا نازىكجاندىلاردىڭ قۇقىعىن قورعاۋعا ۇلكەن ءمان بەرىلگەن.
م.قوزىباەۆ اتىنداعى سقمۋ رەكتورىنىڭ مىندەتىن اتقارۋشى ەربول يساقاەۆ وقۋ ورداسىنداعى ۇجىمنىڭ 73 پايىزىن ايەلدەر قۇرايتىنىن جەتكىزدى. باسشىلىقتا 90 ادام جۇمىس ىستەسە, جارتىسىنان كوبى – ايەلدەر. كادرلىق ساياساتتا گەندەرلىك تەڭدىكتى ساقتاۋدىڭ وزگە دە جولدارى اڭگىمەلەندى.
شۆەتسيا ەلى مۇنداي تاعىلىمدى لەكتسيالاردى تورتكۇل دۇنيەدە جۇيەلى وتكىزەدى ەكەن. ونىڭ ىشىندە وڭتۇستىك امەريكا, شىعىس ەۋروپا, ورتالىق ازيا مەن افريكا باستى نازارعا الىنعان.
سولتۇستىك قازاقستان وبلىسى
