م.جامانبالينوۆ وڭىرىمىزدەگى ءۇرلىتۇپ دەگەن جەردىڭ تاتتىمبەت اۋىلىندا تۋعان. ومبى پەداگوگيكالىق ۋچيليششەسىن بىتىرگەن سوڭ, مەكتەپتە ۇستازدىق ەتكەن. كەيىن وبلىستىق «سارىارقا سامالى» (بۇرىنعى «قىزىل تۋ») گازەتىنىڭ رەداكتسياسىندا قىزمەت ەتتى.
العاشقى ولەڭدەر جيناعى «اينابۇلاق» دەگەن اتپەن 1956 جىلى جارىق كورگەن. جاس ۇرپاقتى تاپقىرلىققا, باتىلدىققا, جىگەرلىلىككە, ەرلىككە تاربيەلەيتىن «سالەم», «كىشكەنە دوستارعا», «مەنىڭ ءىنىم», «باتىر ۇستاز», «اقىن بالا» سياقتى پوەما, ولەڭ, جاڭىلتپاش, ەرتەگى, جۇمباق توپتامالارى جيناقتاپ بەرىلگەن كىتاپتارى بار.
م.جامانبالينوۆ – قازاق بالالار ادەبيەتىنە ۇلەس قوسقان قالامگەر. جازۋشى عالىمبەك جۇماتوۆ مۇباراك اتامىزدى ەسكە الۋ كەشىندە قازاق رۋحانياتىنا ەلەۋلى ۇلەس قوسقانىن ايتىپ ءوتتى. وتكەن عاسىردىڭ 90-جىلدارى وڭىرىمىزدەگى اقىندار ايتىسىنىڭ بەلسەندى ۇيىمداستىرۋشىلارىنىڭ ءبىرى بولعان.
– مۇكەڭ سىرشىل اقىن عانا ەمەس, ۇلاعاتتى ۇستاز ءارى جۋرناليست بولدى. ولەڭدەرىن بالا كەزىمىزدە جاتتاپ وستىك. ءوڭىرىمىزدىڭ ولكەتانۋ باعىتىندا, سونداي-اق ەرتىس اۋدانىنىڭ شەجىرەلى تاريحىنا قاتىستى بىرنەشە كىتاپ جازدى. اقىن الماتىداعى ادەبي ورتادان شالعاي ءجۇرىپ-اق قازاق بالالارىنا مول ادەبي مۇرا قالدىردى. اۋداندىق «ەرتىس نۇرى» گازەتىنىڭ نەگىزىن قالاپ, سول باسىلىمدا كوپ جىل قىزمەت اتقاردى جانە وبلىستىق «سارىارقا سامالى» گازەتىنىڭ ەرتىس اۋدانىنداعى مەنشىكتى ءتىلشىسى بولدى, – دەدى ع.جۇماتوۆ.
ال ارداگەر ۇستاز, ۇلت جاناشىرى نۇربولات ءاۋتالىپوۆتىڭ ايتۋىنشا, ەرتىس اۋدانىندا «مۇباراكتانۋ» وقۋلىعى 2004 جىلى №2 ورتا مەكتەپتە وقىتىلا باستاعان.
– ول كەزدە مەن مەكتەپ ديرەكتورى ەدىم. وقۋشىلاردى انا تىلىندە سويلەتىپ, قازاقشا ويلاۋ جۇيەسىن قالاي قالىپتاستىرۋ كەرەك دەگەن ۋاقىت ەدى. مۇعالىمدەرمەن بىرلەسە وتىرىپ, مۇباراك اقىننىڭ بالالارعا ارنالعان ولەڭدەرىنەن وقۋلىق ازىرلەۋدى باستادىق. س.تورايعىروۆ اتىنداعى ۋنيۆەرسيتەتتىڭ سول كەزدەگى رەكتورى ەرلان ارىن قولداپ, 100 دانا شىعارىپ بەردى. مەكتەپتەگى «مۇباراك وقۋلارى» بايقاۋىنا كوزى تىرىسىندە ونىڭ ءوزى كەلىپ قاتىسىپ جۇرەتىن ەدى, – دەپ ەسكە الادى نۇربولات ءاۋتالىپوۆ.
قالالىق مادەنيەت جانە تىلدەردى دامىتۋ ءبولىمىنىڭ ۇيىمداستىرۋىمەن وتكەن رۋحاني ءىس-شاراعا اقىننىڭ بالالارى, نەمەرە-شوبەرەلەرى, زيالى قاۋىم وكىلدەرى مەن زامانداستارى قاتىستى.
پاۆلودار
