جوبالىق كەڭسە جەمقورلىققا قارسى قوعامدىق سانانى قالىپتاستىرىپ, كابينەتتىك جۇيەدەن open space, ياعني اشىق كەڭسە فورماتىنا كوشۋدىڭ ءتيىمدى تەتىگى رەتىندە قاراستىرىلىپ وتىر. بۇل مەملەكەتتىك قىزمەتشىلەردىڭ جاڭا بۋىنىن جاساقتاۋدا ۇلكەن قادام دەدى ەكولوگيا, گەولوگيا جانە تابيعي رەسۋرستار ءمينيسترى ماعزۇم مىرزاعاليەۆ. وسى ارقىلى جاۋاپتى ورگان حالىقتى قاجەتتى اقپاراتپەن قامتىپ, اشىق پىكىر الماسۋدى كوزدەيدى. سونىمەن قاتار الەۋمەتتىك ماڭىزى بار جوبالاردى جۇزەگە اسىرۋ جولدارىن جىلدام ءارى ساپالى پىسىقتاۋعا مۇمكىندىك بەرەدى.
– جوبا قوعاممەن اشىق ديالوگ قۇرۋعا, مەملەكەتتىك قىزمەتتە جەمقورلىقتىڭ الدىن الاتىن زاماناۋي ستاندارتتاردى ەنگىزۋگە, سول سەكىلدى ىقتيمال تاۋەكەلدەردى انىقتاپ, جويۋعا سەپتىگىن تيگىزۋگە ءتيىس. ازاماتتارمەن اقپاراتتىق بايلانىس مينيسترلىكتىڭ رەسمي سايتىندا جانە كەڭىنەن تانىمال الەۋمەتتىك جەلىلەردە ىسكە اسىرىلادى. وسى ارقىلى جەمقورلىقپەن كۇرەستى ءتيىمدى جۇرگىزىپ, حالىقتىڭ مينيسترلىكتىڭ جۇمىسىنا تىكەلەي ىقپال ەتۋىنە جاعداي جاسالماق. وسى رەتتە مينيسترلىك قانداي دا ءبىر تۋىنداعان ماسەلەلەر بويىنشا جەدەل ارەكەت ەتۋگە دايىن بولادى, – دەدى م.مىرزاعاليەۆ.
اتالعان جوبانى جۇزەگە اسىرۋعا سىبايلاس جەمقورلىققا قارسى ءىس-قيمىل اگەنتتىگى دە قولعابىس ەتكەن.
– بۇل كەڭسەدە سىبايلاس جەمقورلىقتىڭ تاۋەكەلدەرىن الدىن الۋدىڭ تەتىكتەرى پىسىقتالىپ, ءوزارا ءىس-قيمىل جولدارىن قاراستىرامىز. سول سياقتى وسى جەردە حالىق ۇسىنىستارىن بىلدىرە الادى. وسىندا تالقىلاناتىن ءار ماسەلە بويىنشا ساراپتاما جاسالادى. ەڭ باستىسى, ورىندالعان جۇمىستار اشىق ءارى بارشاعا ءمالىم بولۋى ءتيىس. سوندا عانا كەز كەلگەن تاۋەكەلدى تومەندەتۋگە بولادى, – دەدى «ادالدىق الاڭى» جوبالىق كەڭسەسىنىڭ جەتەكشىسى ايگۇل سولوۆەۆا.
«ادالدىق الاڭىنىڭ» ساراپتامالىق كەڭەسىنە ۇكىمەتتىك ەمەس ۇيىمدار مەن بيزنەس قاۋىمداستىقتاردىڭ وكىلدەرى كىرەدى. بۇل سىبايلاس جەمقورلىققا قارسى ءىس-قيمىلدى ءتيىمدى ۇيىمداستىرۋدا, مەملەكەتتىك ورگاندار مەن ۇيىمدار تاراپىنان كورسەتىلەتىن اكىمشىلىك كەدەرگىلەردى جويۋعا, سونداي-اق بيزنەستى زاڭسىز تەكسەرۋدەن قورعاۋعا جانە ولاردىڭ مۇددەلەرىن قورعاۋعا تىڭ سەرپىن بەرەدى دەگەن ۇمىتتە جوبا اۆتورلارى.
