جوبانىڭ ماقساتى ەلىمىزدەگى جاس كوشباسشىلار مەن بەلگىلى قوعام, مەملەكەت بەلسەندىلەرىن جاستار ماسەلەسىنە بەيجاي قاراماي, ولاردىڭ قوعاممەن بايلانىسىن ارتتىرىپ, قولداۋ كورسەتۋ بولىپ وتىر. جالپى, تالىمگەرلىك دەگەنىمىز ۇستازدىق ەتۋ, ۇيرەتۋ دەگەندى بىلدىرەدى. سونىمەن بىرگە تاجىريبەلى مامان نەمەسە كاسىپكەر ءوزىنىڭ كاسىبي ءبىلىمى مەن شەبەرلىگىن ءتيىمدى ءارى تانىمال ءادىس ارقىلى تاجىريبەسى از مامانعا نەمەسە شاكىرتىنە بەرۋدى ايتادى. ياعني, كەرى بايلانىس ارقىلى ءارتۇرلى ادىستەر مەن ۇيرەنۋ مودەلدەرىنىڭ ءىس-قيمىلدارى مەن ولاردى تۇزەتۋ ارقىلى تالىمگەردىڭ شاكىرتتى ۇيرەتۋى. قازىرگى تاڭدا كەيبىر مەكەمەلەر مەن كومپانيالاردا جوعارى تاجىريبەلى قىزمەتكەر ءوزىنىڭ ءبىلىپ-تۇيگەنىن جاڭادان كەلگەن قىزمەتكەرگە ۇيرەتۋ ارقىلى ونىڭ بويىنا بەلگىلى ءبىر ۋاقىتتا ءوزىنىڭ ىسىنە دەگەن سەنىمدىلىك پەن جاۋاپتىلىقتى ماشىقتاپ, سول ىسكە يكەمدەيدى. بۇل, ءبىر جاعىنان, تاجىريبەلى مامانداردىڭ ءوزىنىڭ ءىسىن جاستارعا ساباقتاستىققا قالدىرا وتىرىپ, سول كومپانيانىڭ ىشكى ەرەجەلەرى مەن جيناقتالعان ءبىلىمدى ولاردىڭ بويىنا ءسىڭىرىپ, قابىلەتىن اشۋ.
جالپى, تالىمگەرلىك بۇل جەكە, توپتىق جانە ۇجىمدىق بولىپ بولىنەدى. كوبىنە ءبىز جەكە تالىمگەرلىكتى كەزدەستىرەمىز, ياعني ءبىر ۇستاز-تالىمگەر ءبىر مامانعا ۇيرەتەدى. بۇرىندارى توپتىق جانە ۇجىمدىق سيرەك كەزدەسسە, قازىرگى تاڭدا وسى توپتىق جانە ۇجىمدىق تا جەكە تالىمگەرلىكپەن ءبىر دەڭگەيدە كەلە جاتىر.
وسى ورايدا «KAZBRANDS» قوعامدىق قورى اتالعان جايتتاردى ەسكەرە وتىرىپ, «وڭىرلەردە جاستاردى ىنتالاندىرۋ جۇمىسىن جۇرگىزۋ ءۇشىن مەنتورلاردىڭ 4 توبىن بارىپ وقىتۋدى ۇيىمداستىرۋ» اتتى جوباسى اياسىندا ەلىمىزگە 80 تالىمگەردى دايارلاپ شىعاردى. ولار ارنايى كۋرستاردان ءوتىپ, تالىمگەرلىك سەرتيفيكاتتار تابىستالدى. قازىرگى تاڭدا رەسپۋبليكانىڭ بارلىق وڭىرىندە 14-29 جاس ارالىعىنداعى جاستارمەن كەزدەسۋلەر, سەمينار-ترەنينگتەر, دوڭگەلەك ۇستەلدەر, تالىمگەرلىك ساباقتارىن ۇيىمداستىرۋدا. قازىردىڭ وزىندە جوبا اياسىندا 560 جەتىستىككە جەتكەن مەنتي/شاكىرت بار. ولار قازىردىڭ وزىندە كوپتەگەن گرانت پەن كونكۋرستارعا قاتىسىپ, جۇلدەلى ورىندار يەلەنۋدە. وسىنداي اۋقىمدى جاستارمەن جۇمىستاردىڭ بىرنەشەۋىنە توقتالار بولساق, بيىل 17 قازاندا تالىمگەرلەر بايان احمەتجانوۆا مەن نۇرلان كۇنتۋوۆ نۇر-سۇلتان قالاسىندا «و’ازامات» بيزنەس ورتالىعىندا «مەنتورلىق (تالىمگەرلىك): جاستاردىڭ مۇمكىندىكتەرى مەن بولاشاعى» اتتى تاقىرىپتا جاستارمەن دوڭگەلەك ۇستەل وتكىزدى. دوڭگەلەك ۇستەلدىڭ ماقساتى – جاستار اراسىندا كوشباسشىلىق قابىلەتتەرىن دامىتۋ, پاتريوتتىق تاربيە بەرۋ, بوس ۋاقىتتى ءتيىمدى پايدالانۋعا ۇندەۋ.
سونىمەن بىرگە جاس تالىمگەر سەرىك اۆگۋمباەۆتىڭ دا ەڭبەگىن ەرەكشە اتاپ وتكەن ءجون. قازىرگى تاڭدا ونىڭ 7 شاكىرتى بار. ولاردىڭ بارىمەن جۇمىس ىستەپ ءجۇر. سونىڭ ىشىندە ۇشەۋى گرانت يەگەرى اتاندى, بىرەۋى: «اتامەكەن» باعىتىمەن «جاس كاسىپكەر» باعدارلاماسى بويىنشا, ال ەكەۋى ەلىمىزدىڭ اقپارات جانە قوعامدىق دامۋ مينيسترلىگى مەن ازاماتتىق باستامالاردى قولداۋ ورتالىعىنىڭ قوعامدىق جوبانى قولداۋ باعىتى بويىنشا «جاسا جوباسى» گرانتىن جەڭىپ الدى. بۇل قاراجاتقا بالالاردىڭ ويىن كلۋبىن ۇيىمداستىرۋدى قولعا الۋدا. ال ەكىنشى قاراجاتقا اقمولا وبلىسىنىڭ بۋراباي اۋىلىندا اۋىل بالالارىنا اۋلادا جاتتىعۋ (ۆوركاۋت) ءۇشىن سپورت الاڭىن سالۋدى جوسپارلاپ وتىر.
جەتىستىككە جەتكەن مەنتي/شاكىرتتەردىڭ ىشىندە ەرەكشە توقتالاتىن قىزىلجارلىق تالىمگەر – ەكاتەرينا ستاروستينا. ول سولتۇستىك قازاقستان وبلىسى ءماسليحاتىنىڭ جاس دەپۋتاتى, «قىزىلجار – ادالدىق الاڭى» اتتى ايماقتىق جوبانىڭ جەتەكشىسى. بۇگىندە وزىنەن كەيىنگى جاس تولقىن ارىپتەستەرىنە تالىمگەرلىك ءادىستى ۇيرەتىپ كەلەدى. سونىمەن بىرگە «مەنتەرستۆو كاك كليۋچ ك ۋسپەحۋ», «كولەسو بالانسا», «ليچنوستنىي روست ي ليدەرسكيە كاچەستۆا», «ناۆىكي پۋبليچنوگو ۆىستۋپلەنيا» اتتى سەمينارلار وتكىزىپ ءجۇر. ءوزىنىڭ توبىنا 5 شاكىرتتى الىپ, جۇمىس جوسپارىن, الداعى ماقساتتار مەن ناتيجەلەردى ايقىنداپ جۇمىس ىستەيدى. سونىڭ ءبىرى – سۇلتان جاقان اتتى جاس شاكىرت. بيىل زاڭگەر ماماندىعى بويىنشا ۋنيۆەرسيەتتى تامامداعان. سپورتپەن اينالىسادى. كيوكۋشينكاي-كاراتە سپورتى بويىنشا قر چەمپيونى, رەسەي چەمپيوناتىندا كۇمىس جۇلدەگەر, سيبير-ازيا تۋرنيرىندە قولا جۇلدەگەر اتانعان. بىراق ونىڭ بۇل جوباداعى ماقساتى – گرانت الىپ, ءوزىنىڭ جەكە كاسىبىن, ياعني فيتنەس-زالىن اشۋ. سول ماقساتقا جەتۋ ءۇشىن ءوزىنىڭ جەتەكشىسى ەكاتەرينا ستاروستينامەن موتيۆاتسيالىق باعىتتاعى جوبالارعا دايىندىق جۇمىستارىن جۇرگىزۋدە. الداعى ۋاقىتتا ونىڭ ماقساتى دا ورىندالادى دەپ سەنەمىز.
جوبا باستالعالى ءار وڭىردە تالىمگەرلىك جۇمىستار قارقىندى ۇيىمداستىرىلىپ, وتۋدە. ارينە, جوعارىداعى ايتىلعان مىسالدار سەكىلدى جايتتار كوپتەپ كەزدەسەدى. تالىمگەرلىك بۇل جاستاردىڭ بولاشاعىنا قولداۋ كورسەتىپ, وزدەرىنىڭ ماقساتتارىنا جەتۋىنە جول اشۋ, سونىمەن بىرگە جاستاردىڭ ءارتۇرلى گرانتتار مەن بايقاۋلارعا قاتىسۋلارىنا قولداۋ كورسەتۋ. «KAZBRANDS» قوعامدىق قورىنىڭ دا نەگىزگى باعىتى وسى. سوندىقتان دا الداعى ۋاقىتتا دا كوپتەگەن ءىس-شارا مەن كەزدەسۋلەر, سەمينار-ترەنينگتەر وتكىزۋ جوسپارلانىپ وتىر.
كەمەل راحىمجان,
ەكونوميكا عىلىمدارىنىڭ ماگيسترى
