«قازاقتانۋ» مادەني-اعارتۋشىلىق جوباسى اياسىنداعى شاراعا وبلىس اكىمىنىڭ ورىنباسارى ناۋرىزباي بايقاداموۆ, ايماقتاعى زيالى قاۋىم وكىلدەرى, وبلىستىق قحا قۇرىلىمدارى مەن ەتنومادەني بىرلەستىكتەر مۇشەلەرى قاتىستى.
شاراعا كەلگەندەردى قازانعاپ اتىنداعى مۋزىكالىق كوللەدجىنىڭ ونەرپازدارى قوبىز كۇيىمەن قارسى الدى. دوستىق ءۇيىن س.ايتباەۆ اتىنداعى كوركەمسۋرەت گالەرەياسى قورىنداعى تۋىندىلاردان «كەنەپ بەتىندەگى اۋىل كورىنىسى» اتتى سۋرەت كورمەسى ۇيىمداستىرىلدى.
بۇگىندە قازاقستان حالقى اسسامبلەياسىنىڭ «قازاقتانۋ» جوباسى بويىنشا ەلىمىزدىڭ بارلىق ايماقتارىندا شارالار جۇيەلى ۇيىمداستىرىلىپ كەلەدى. ءبىرتۇتاس ورتاق قۇندىلىقتاردى قالىپتاستىرۋدىڭ نەگىزى رەتىندە قازاق حالقىنىڭ تاريحىن, مادەنيەتىن دارىپتەۋدى كوزدەگەن باستاماعا ەل تۇرعىندارىنىڭ قىزىعۋشىلىعى ەرەكشە.
– ءبىزدىڭ باستى قۇندىلىعىمىز ەلىمىزدەگى ىنتىماق پەن بىرلىك ەكەندىگىنە تالاس جوق. ەلدەگى ەتنوستاردىڭ اراسىنا جىك تۇسپەي, ءبىر ماقساتقا جۇمىلا بىلگەندىگىمىزدىڭ ارقاسىندا بۇگىنگى بەرەكەگە جەتتىك, – دەپ ءسوز باستاعان وبلىس اكىمىنىڭ ورىنباسارى ن.بايقاداموۆ «قازاقتانۋ» جوباسىنىڭ ءمان-ماقساتىن ايتىپ ءوتتى. وسى باعىتتا اتقارىلىپ جاتقان جۇمىستاردى سارالادى. «الاشتىڭ اناسى» اتانعان وڭىردە ءوتىپ جاتقان كونفەرەنتسيا جۇمىسىنا ساتتىلىك تىلەدى.
شارادا تەمىربەك جۇرگەنوۆ اتىنداعى قوعامدىق قور توراعاسى ساپەن اڭساتوۆ «قازاقى ءدىني تانىم جانە ۇرپاق تاربيەسى» تاقىرىبىندا بايانداما جاساپ, تاقىرىپ اياسىندا پايىمدى پىكىرلەر ايتتى.
فيلولوگيا عىلىمدارىنىڭ دوكتورى, پروفەسسور, قورقىت اتا اتىنداعى قمۋ جانىنداعى «قورقىتتانۋ جانە ولكە تاريحى» عزي ديرەكتورى باعدات كارىبوز ۇلى «سىر ەلى – رۋحانياتتىڭ باستاۋ بۇلاعى» تاقىرىبىن قوزعاپ, ۇلتتانۋ باعىتىندا جۇمىستار اياسىن كەڭەيتۋ جايىندا وي ءوربىتتى.
كونفەرەنتسياعا الماتى قالاسىنان ارنايى كەلگەن ونەرتانۋ عىلىمدارىنىڭ كانديداتى, ءا.قاستەەۆ اتىنداعى مەملەكەتتىك ونەر مۋزەيىنىڭ عىلىمي حاتشىسى ەكاتەرينا رەزنيكوۆا «وبرازى كوچەۆوي تسيۆيليزاتسي ۆ جيۆوپيسي كازاحستانا» تاقىرىبىندا بايانداما جاسادى. ەلىمىزدەگى قىلقالام شەبەرلەرىنىڭ ەڭبەكتەرىن سىرت مەملەكەتتەردە ناسيحاتتاپ جۇرگەن عالىم قازاقتىڭ كوشپەلى وركەنيەتىن سۋرەت ونەرى ارقىلى تانۋدىڭ ماڭىزدىلىعى جايلى ايتتى. بەلگىلى سۋرەتشىلەر ساليحيتدين ايتباەۆ, قانافيا تەلجانوۆ, گۇلفايرۋز يسمايلوۆانىڭ وسى باعىتتاعى ەڭبەكتەرىنە توقتالدى.
فيلولوگيا عىلىمدارىنىڭ كانديداتى, قوجا احمەت ياساۋي اتىنداعى حالىقارالىق قازاق-تۇرىك ۋنيۆەرسيتەتىنىڭ قاۋىمداستىرىلعان پروفەسسورى جازيرا يساەۆا « ۇلى دالا پارەميولوگياسى جانە ۇلتتىق كود» تاقىرىبىنداعى بايانداماسىندا ۇلتتىق تانىم جاڭعىرۋى ءۇشىن ەڭ ءبىرىنشى ءتىل جەتىلۋى ءتيىس دەگەن ويىن جەتكىزدى.
كونفەرەنتسيا سوڭىندا قاتىسۋشىلار ەركىن پىكىر الماسىپ, جوبا اياسىنداعى جۇمىستار جايلى ۇسىنىس-پىكىرلەر ايتتى.
قىزىلوردا
