ايماقتار • 12 قاراشا، 2019

وڭالتۋ ورتالىقتارى سالىنادى

18 رەتكورسەتىلدى

مەملەكەت باسشىسى قاسىم-جومارت توقاەۆتىڭ قازاقستان حالقىنا ارناعان جولداۋىنىڭ باسىم باعىتتارىن ءتۇسىندىرۋ، جەرگىلىكتى جەردەگى تىنىس-تىرشىلىكپەن ەتەنە جاقىن تانىسۋ ماقساتىندا اقمولا وبلىسىنا جۇمىس ساپارىمەن كەلگەن پرەمەر-ءمينيستردىڭ ورىنباسارى بەردىبەك ساپارباەۆ باستاعان ۇكىمەتتىڭ جۇمىس توبى ءوڭىردى ارالادى.

ۇكىمەت مۇشەلەرى جۇمىس  ساپارىن زەرەندى اۋدانىنا قاراستى ۆيكتوروۆكا اۋىلىنداعى ورتا مەكتەپتەن باستادى. مەكتەپ ديرەكتورى ءجاميلا قاسەنوۆانىڭ ايتۋىنشا، بۇگىندە ءبىلىم وشاعىندا 204 وقۋشى ءتالىم-تاربيە الۋدا. بوگەنباي بي اۋىلىنان 13 وقۋشى  اۆتوبۋسپەن تاسىمالدانادى. كوپ بالالى جانە تۇرمىسى تومەن وتباسىلاردىڭ 59 وقۋشىسى تەگىن تاماقپەن قامتىلعان. اۋىلدىق مادەنيەت ۇيىندە تۇرعىندارمەن جۇزدەسكەن بەردىبەك ساپارباەۆ مەملەكەت باسشىسى جولداۋىنىڭ باستى باعىتتارىن ءتۇسىندىردى. ۆيتسە-پرەمەر كەلەسى جىلدىڭ 1 قاڭتارىنان باستاپ ەنگىزىلەتىن كوپ بالالى جانە مۇقتاج وتباسىلارعا ارنالعان كومەكتىڭ جاڭا ءادىسى تۋرالى جان-جاقتى ايتىپ بەردى.

ەتەك-جەڭى كەڭ پىشىلگەن ۆيكتوروۆكا اۋىلىندا 1247 ادام تۇرادى. نەگىزىنەن وسىنداعى سەرىكتەستىكتە جۇمىس ىستەيتىن جانە مال سۇمەسىمەن كۇن كورىپ وتىرعان جەرگىلىكتى جۇرتتىڭ ءتورت ت ۇلىكتىڭ باسىن كوبەيتۋگە مۇمكىندىگى مول. مەملەكەت تاراپىنان كورسەتىلىپ جاتقان قوماقتى كومەكتى پايدالانعان ءلازىم. اسىرەسە، «التىن اسىق»، «سىباعا» ءتارىزدى باعدارلامالاردىڭ شاراپاتىن كورۋگە ابدەن بولار ەدى. اتاۋلى الەۋمەتتىك كومەككە قول سوزۋدىڭ ءتۇبى كەي رەتتە ماسىلدىققا ۇرىندىرۋى مۇمكىن. سوندىقتان بويىندا كۇش-قۋاتى بار ادامداردىڭ جۇمىس ىستەپ، وزدەرىنىڭ وتباسىلارىن قامتاماسىز ەتكەنى دۇرىس. كەزدەسۋ بارىسىندا وسىنداي كەلەلى ويلار ايتىلدى. اۋىل تۇرعىندارى ءۇشىن كوپتەن بەرى شەشىلمەي كەلە جاتقان ەڭ وتكىر ماسەلە دە كوتەرىلدى. بۇل ورتالىقتاندىرىلعان سۋ جۇيەسىنىڭ ابدەن توزىعىنىڭ جەتۋى. قازىر سەرىكتەستىك اۋىلعا اۋىز سۋدى ارنايى كولىكپەن تاسىمالداۋدا. بىراق سونىڭ وزىندە ۇلگەرە المايدى. كوپشىلىك وتىنىشىنە بەردىبەك ساپارباەۆ الداعى ۋاقىتتا بۇل ماسەلەنى قاراستىرىپ، كومەك كورسەتىلەتىنىن ايتتى.

جۇمىس توبى بۇدان ءارى زەرەندى اۋىلىنداعى مالىك عابدۋللين اتىنداعى ورتا مەكتەپتە بولدى. ەل ەڭسەسىن كوتەرۋگە باعىتتالعان مەملەكەتتىك باعدارلامالار قالاي جۇزەگە اسىرىلىپ جاتىر دەگەن ساۋالعا الەۋمەتتىك قىزمەتكەر ۆيكتوريا كوح جاۋاپ بەردى

– ءبىز جالعىزىلىكتى ادامدارعا كومەك كورسەتەمىز. توبىمىزدا سەگىز ادام بار، – دەدى ول، – ءار ادامعا ەكى ساعاتقا جۋىق ۋاقىتىمىز كەتەدى. تۇرمىستىق-مەديتسينالىق كومەك كورسەتەمىز. قارتتاردىڭ تىنىس-تىرشىلىگى ءار ۋاقىتتا نازارىمىزدا. 

اۋىل تۇرعىنى رايحان سارسەنباەۆا شاراپاتى ءتيىپ جاتقان باعدارلامالار تۋرالى ايتا كەلىپ، تيىمدىلىگىنىڭ از ەمەستىگىنە توقتالدى. ماسەلەن، ءوزى بيىل 250 مىڭ تەڭگە گرانت الىپ، قۇس وسىرۋمەن اينالىسۋدا ەكەن. تابىسىنىڭ تولىمدى بولارىنا سەنىمدى.

ۆيتسە-پرەمەر باستاعان جۇمىس توبى وبلىس ورتالىعىنداعى كوپسالالى وبلىستىق اۋرۋحانادا بولىپ، جاڭادان سالىنىپ جاتقان ونكولوگيالىق ەمحانانىڭ قۇرىلىسىمەن تانىستى. بۇل ەمحانا ءبىر اۋىسىمدا 150 ادامعا دەيىن قابىلدايتىن بولادى. جاڭا ەمحانا وسى زامانعى مەديتسينالىق قۇرال-جابدىقتارمەن قامتاماسىز ەتىلمەك. وندا 70 مەديتسينا قىزمەتكەرى جۇمىس ىستەيتىن بولسا، ونىڭ 23-ءى جوعارى ءبىلىمدى دارىگەرلەر بولادى. قازىر قۇرىلىس جۇمىستارى قارقىندى جۇرگىزىلۋدە. جاڭا نىسان 2020 جىلدىڭ ءۇشىنشى توقسانىندا پايدالانۋعا بەرىلمەك. پرەمەر-ءمينيستردىڭ ورىنباسارى قۇرىلىس جۇمىستارىن شيراتا ءتۇسۋدى تاپسىردى. ونىڭ ۇستىنە مامانداردى وسى باستان تاۋىپ، جۇمىسقا تارتقان ءلازىم. وبلىستىق اۋرۋحانادا ايماقتاعى مەديتسينا سالاسىنىڭ قىزمەتكەرلەرىمەن كەزدەسۋ وتكىزىلدى. ۆيتسە-پرەمەر جۇزدەسۋ بارىسىندا  ەلىمىزدىڭ ءار ادامى ءوزىنىڭ باستى بايلىعى – دەنساۋلىعىن ساقتاۋى كەرەكتىگىن، ءوزىن-ءوزى قامتاماسىز ەتكەندەر مەن جۇمىسسىزداردىڭ دا جايىنا كوڭىل اۋدارىلۋى قاجەتتىگىن ايتتى. جۇيەدەن ەشكىم دە سىرت قالماۋعا ءتيىستى. ءسوز سوڭىندا الداعى ءۇش جىلدا دەنساۋلىق ساقتاۋ سالاسىنىڭ بيۋدجەتى ەكى ەسە ارتاتىنىن، مەديتسينالىق قۇرال-جابدىقتاردىڭ مۇمكىندىگىنشە جاڭارتىلاتىنىن، مەديتسينا كادرلارىمەن تولىقتىرۋ «ديپلوممەن – اۋىلعا!» باعدار­لاماسى ارقىلى جۇزەگە اساتىنىن ايتىپ ءوتتى. سونداي-اق وڭىردەگى وزەكتى ماسەلەلەرگە توقتالدى. سابيلەردىڭ شەتىنەۋى 18 پايىزعا كوبەيگەن. مىندەتتى مەديتسينالىق ساقتاندىرۋعا جارنا تولەۋ ماردىمسىز.

وبلىس ورتالىعىنداعى ءىت-مەكتەپتە بولعان ساتىندە جۇمىس توبى اقمولا وبلىسىنىڭ مۇعا­لىم­دەر قاۋىمىمەن كەزدەستى.

– ءبىلىم بەرۋمەن قاتار مەكتەپتەردەگى تاربيە ماسەلەسىنە دە ايرىقشا نازار اۋدارعان ءجون، – دەدى بەردىبەك ساپارباەۆ، – ءار ايماقتا دەمالىس كۇندەرى جانە كەشكىلىك ۋاقىتتا بوس تۇراتىن سپورت زالدارى مەن شەبەرحانالاردى پايدالانۋ كەرەك. كاسىبي-تەحنيكالىق ءبىلىم بەرۋ ماسەلەلەرىنە دە نازار اۋدارىلدى.

كوكشەتاۋ قالاسىندا بالالاردى وڭالتۋ ورتالىعى سالىنباق. جاعىمدى جاڭا­لىق پرەمەر-ءمينيستردىڭ ورىنباسارى بەر­دى­بەك ساپارباەۆتىڭ اقمولا وبلىسىنىڭ تۇرعىن­دارىمەن كەزدەسۋى كەزىندە جاريا ەتىلدى. جۇزدەسۋ بارىسىندا ەل پرەزيدەنتىنىڭ جولداۋى­نان تۋىندايتىن مىندەتتەر جانە سول مىن­دەتتەردى جۇزەگە اسىرۋ بارىسىنداعى ۇكى­مەت­تىڭ جۇمىسى تۋرالى كەڭىنەن باياندالدى.

– بالالاردى وڭالتۋ ماسەلەسى وتە ماڭىز­دى، – دەدى ول، – قازىر كوپ جۇمىس ىستەلىپ جاتىر. بىراق سوندا دا جەتكىلىكسىز. بىزگە وڭالتۋ ورتالىقتارىنىڭ جۇمىسىن كەڭەيتە ءتۇسۋ قاجەت. وسىنداي ورتالىقتار بار جەردە ناتيجەلى جۇمىس تا بولادى. تۇڭعىش پرەزيدەنت باستاماسى اياسىندا كەلەسى جىلدان باستاپ رەسپۋبليكامىزدىڭ ءۇش قالاسىندا نۇر-سۇلتان، شىمكەنت جانە كوكشەتاۋدا بالالاردى وڭالتۋ ورتالىقتارىنىڭ قۇرىلىسىن باستايمىز.   

وبلىس اكىمى ەرمەك مارجىقپاەۆ بۇل ورتالىقتىڭ جاڭا زاماننىڭ تالابىنا تولىق جاۋاپ بەرەتىن نىسان بولاتىنىن ايتىپ ءوتتى. جوبانىڭ قۇنى 4 ميلليارد تەڭگە كولەمىندە. بەردىبەك ساپارباەۆ تۇرعىنداردىڭ  الەۋمەتتىك-تۇرمىستىق جاعدايىن جاقسارتۋ ماسەلەلەرىنە توقتالدى. ۇستىمىزدەگى جىلى مەملەكەتتىك بيۋدجەتتىڭ 45 پايىزى ءبىلىم بەرۋ، دەنساۋلىق ساقتاۋ، مادەنيەت پەن سپورت سالالارىنا ءبولىنىپ وتىر. الەۋمەتتىك جاعىنان از قامتىلعان، كوپ بالالى وتباسىلارعا جەكە قاراجات جۇيەسى قاراستىرىلعان.

– اتاۋلى الەۋمەتتىك كومەك مەملەكەت تاراپىنان تولەنەتىن جالاقى ەمەس، بۇل كوپ بالالى وتباسىلارعا ءوز كاسىپتەرىن باس­تاپ، جاعدايلارىن تۇزەتۋ ءۇشىن بەرىلەدى. سوندىقتان، مەملەكەت قازىر بۇل ماسەلەنى قاراستىرۋدا، – دەدى ۆيتسە-پرەمەر.

كەزدەسۋدىڭ ەكىنشى بولىگىندە ۆيتسە-پرەمەر اقمولالىقتاردىڭ الۋان سۇراقتارىنا جاۋاپ بەردى. بۇل ۇكىمەتتىك ەمەس ۇيىمداردىڭ جۇمىسىنا، مۇگەدەكتەردى، جەتىم بالالاردى قولداۋ ماسەلەسىنە بايلانىستى ءوربىدى. مۇگەدەك بالالارعا ارنايى الەۋمەتتىك كومەك كورسەتۋ جايى دا ايتىلدى.

 

اقمولا وبلىسى

 

سوڭعى جاڭالىقتار

تەاتردىڭ ونلاين تارتۋى

رۋحانيات • كەشە

ءۇي جانۋارىنان ۆيرۋس جۇعا ما؟

كوروناۆيرۋس • كەشە

ۇقساس جاڭالىقتار