ۇكىمەت • 09 قاراشا، 2019

مەملەكەت مۇقتاج ازاماتتاردى الەۋمەتتىك قولداۋ جۇمىستارىن كۇشەيتەدى - بەردىبەك ساپارباەۆ

148 رەتكورسەتىلدى

پرەمەر-ءمينيستردىڭ ورىنباسارى بەردىبەك ساپارباەۆ باستاعان ۇكىمەتتىك جۇمىس توبى پاۆلودار وبلىسىنا بارىپ قايتتى. جۇمىس توبىنىڭ قۇرامىندا ەڭبەك جانە حالىقتى الەۋمەتتىك قورعاۋ ءمينيسترى ءبىرجان نۇرىمبەتوۆ، مادەنيەت جانە سپورت ۆيتسە-ءمينيسترى ەلدوس رامازانوۆ، اقپارات جانە قوعامدىق دامۋ ۆيتسە-ءمينيسترى مارات ءازىلحانوۆ، ءبىلىم جانە عىلىم ۆيتسە-ءمينيسترى شولپان كارينوۆا، دەنساۋلىق ساقتاۋ ۆيتسە-ءمينيسترى كامالجان نادىروۆ بولدى. بۇل تۋرالى primeminister.kz حابارلادى. 

ۇكىمەتتىك جۇمىس توبى پاۆلودار وبلىسىنىڭ جۇرتشىلىعىمەن كەزدەسۋ وتكىزدى. ءوز سوزىندە پرەمەر-ءمينيستردىڭ ورىنباسارى پرەزيدەنتتىڭ قازاقستان حالقىنا ارناعان جولداۋىندا العا قويىلعان مىندەتتەردى ىسكە اسىرۋ ءۇشىن ۇكىمەت قانداي شارالاردى قابىلداپ جاتقانىن ايتىپ بەردى.

«بيىل الەۋمەتتىك سالاعا 7،5 ترلن-نان استام تەڭگە نەمەسە رەسپۋبليكالىق بيۋدجەت شىعىستارىنىڭ 45%-ى باعىتتالدى. 2020 جىلعا ارنالعان بيۋدجەت جوباسىندا الەۋمەتتىك سالا شىعىستارىنىڭ ۇلەسى 47%-عا دەيىن ارتادى. بۇگىنگى تاڭدا مەملەكەت ءوزىنىڭ الەۋمەتتىك مىندەتتەمەلەرىن تولىعىمەن ورىنداۋدا. ماسەلەن، وسى جىلدىڭ 10 ايىندا 200 ملرد تەڭگەدەن استام سومادا اتاۋلى الەۋمەتتىك كومەك تولەندى. 2،2 ملن ادام قامتىلدى، ونىڭ ىشىندە – 1،5 ملن بالا. قارجىلاندىرۋ كولەمى 9 ەسەگە ءوستى»، — دەدى ب. ساپارباەۆ.

سونداي-اق ۇكىمەتتىك جۇمىس توبى وبلىستىڭ پەداگوگتارىمەن جانە مەديتسينا قىزمەتكەرلەرىمەن كەزدەسۋلەر وتكىزدى، اقسۋ اۋدانى ەۆگەنەۆكا اۋىلىنىڭ تۇرعىندارىمەن كەزدەستى جانە بىرقاتار الەۋمەتتىك نىساندى ارالادى.

وڭىردەگى مەديتسينا قىزمەتكەرلەرىمەن وتكەن كەزدەسۋدە جالاقىنى كوتەرۋ، مىندەتتى مەديتسينالىق ساقتاندىرۋدى ەنگىزۋ، مەديتسينالىق قىزمەت ساپاسىن ارتتىرۋ، ماتەريالدىق-تەحنيكالىق بازانى جاقسارتۋ جانە تاعى باسقا ماسەلەلەر تالقىلاندى.

وڭىردە حالىقتىڭ ءمامس ەنگىزۋ تۋرالى اقپاراتتانۋىنىڭ 52%-دان 85%-عا دەيىن جوعارىلاعانى بايقالاتىنى اتاپ ءوتىلدى.

مىندەتتى الەۋمەتتىك مەديتسينالىق ساقتاندىرۋ ەنگىزىلگەننەن كەيىن دەنساۋلىق ساقتاۋ جۇيەسىن قارجىلاندىرۋ ەداۋىر ارتادى. ءۇش جىل ىشىندە دەنساۋلىق ساقتاۋ جۇيەسىنە جۇمسالاتىن شىعىندار كەم دەگەندە ءبىر جارىم ەسەگە — 1،3 ترلن تەڭگەدەن 2،5-3 ترلن تەڭگەگە دەيىن ارتۋى كەرەك.

سونداي-اق ءدارى-دارمەكپەن قامتاماسىز ەتۋگە جانە ءدارى-دارمەكتەردىڭ باعاسىن بەلگىلەۋگە نازار اۋدارىلدى. بۇگىنگى تاڭدا قازاقستاندا 7،8 مىڭعا جۋىق ءدارى-دارمەك ءتۇرى ساتىلادى جانە ولاردىڭ جارتىسىنىڭ قۇنىن مەملەكەت رەتتەيدى.

بۇعان قوسا ۆيتسە-پرەمەر حالىقتى ءدارى-دارمەكپەن ۋاقىتىلى قامتاماسىز ەتۋدىڭ ماڭىزدىلىعىنا توقتالدى.

«كەلەسى جىلدىڭ باسىندا بىزدە ءدارى-دارمەكپەن قامتاماسىز ەتۋدە ەشقانداي كىدىرىستەر بولماۋى ءۇشىن، قاراشا-جەلتوقسان ايلارىندا كەلەسى جىلعا ارنالعان بارلىق كەلىسىمشارتتى جاساۋىمىز كەرەك»، — دەدى ول.

وبلىس ورتالىعىندا جۇمىس توبىنىڭ مۇشەلەرى وڭىرلىك جەدەل جاردەم ستانساسىنىڭ جۇمىسىمەن تانىستى. پاۆلودارلىق 103 قىزمەتىنىڭ اۆتوپاركىندە 100-دەن استام ارنايى كولىك بار. بارلىق ماشينا GPS سەزبەگىمەن جابدىقتالعان، جەدەل جاردەم بريگادالارىنىڭ مەديتسينالىق قامتىلۋى «س» ساناتىنىڭ جوعارى ستاندارتتارىنا سايكەس كەلەدى. بۇل، ب. ساپارباەۆتىڭ ايتۋىنشا، مەملەكەتتىڭ دەنساۋلىق ساقتاۋدىڭ ماتەريالدىق-تەحنيكالىق بازاسىن نىعايتۋ بويىنشا قابىلداپ جاتقان شارالارىنىڭ ايقىن دالەلى. 

ءبىلىم بەرۋ جۇيەسىن دامىتۋ جانە پەداگوگتىڭ مارتەبەسىن ارتتىرۋ تۇرعىسىنان، كەلەر جىلدان باستاپ پەداگوگتەردىڭ جالاقىسىنىڭ ورتاشا كولەمىن شامامەن 30%-عا ارتتىرۋ جوسپارلانعانى اتاپ ءوتىلدى. بۇل ماقساتقا شامامەن 200 ملرد تەڭگە ءبولىندى.

دارىندى جانە تالانتتى بالالارعا جان-جاقتى قولداۋ كورسەتىلەدى. تۇڭعىش پرەزيدەنت – ەلباسىنىڭ قورىمەن بىرگە جاقىندا اقتوبەدە باستاۋ العان «ەل ءۇمىتى» جوباسى ىسكە اسىرىلىپ جاتىر. ونىڭ ماقساتى — 1000-نان استام دارىندى بالانى ىرىكتەپ الۋ، ولاردىڭ ءبىلىم الۋىنا جانە تالانتىن دامىتۋعا قولداۋ كورسەتۋ. ەرەكشە قاجەتتىلىكتەرى بار بالالاردىڭ اتا-انالارىنا دا جاقىن ارادا ەلەۋلى قولداۋ كورسەتىلەدى. كەلەسى جىلدان باستاپ تۇڭعىش پرەزيدەنت – ەلباسىنىڭ باستاماسى اياسىندا ەلىمىزدىڭ وڭىرلەرىندە وڭالتۋ ورتالىقتارى سالىنا باستايدى.

«مەملەكەت ءوز ازاماتتارىنىڭ ءال-اۋقاتىن جاقسارتۋ تۇرعىسىنان اۋقىمدى جۇمىستار اتقارىپ جاتىر. كەلەسى جىلدان باستاپ ءبىز كوپ بالالى جانە از قامتىلعان وتباسىلاردى قولداۋ باعدارلامالارىنا وزگەرىستەر ەنگىزەمىز. ەگەر بۇعان دەيىن الەۋمەتتىك كومەك الۋشىلار وزدەرىنىڭ ناقتى كىرىستەرىن جاسىرا السا، وندا 2020 جىلدان باستاپ بۇنداي فاكتىلەر مۇلدەم بولمايدى. سونىمەن قاتار ۇكىمەت مۇعالىمنىڭ مارتەبەسىن ارتتىردى جانە مۇعالىمدەردىڭ جالاقىسىن 2 ەسەگە ءوسىرۋدى جوسپارلاپ وتىر»، — دەدى ۆيتسە-پرەمەر.

پرەمەر-ءمينيستردىڭ ورىنباسارى باستاعان ۇكىمەتتىك جۇمىس توبى اقسۋ قالاسى مەن ونىڭ اۋىلدىق ايماعىندا بولدى.

ۆيتسە-پرەمەر وسى جىلى مەملەكەتتىك-جەكەمەنشىك ارىپتەستىك اياسىندا قۇرىلعان مۇگەدەك بالالارعا ارنالعان «ورتوپروت» وڭالتۋ ورتالىعىندا بولدى. ورتالىقتا ءبىر جارىم جاستان 18 جاسقا دەيىن تىرەك-قيمىل اپپاراتى بۇزىلعان بالالارعا قىزمەت كورسەتىلەدى. اشىلعاننان بەرى تىرەك-قيمىل اپپاراتى بۇزىلعان 15 بالاعا كومەك كورسەتىلدى. سونداي-اق ەۆگەنەۆكا اۋىلىنداعى دارىگەرلىك امبۋلاتورياعا دا باردى.

ۇكىمەتتىك توپ جۇمىس ساپارىن ەۆگەنەۆكا اۋىلىنىڭ تۇرعىندارىمەن كەزدەسۋمەن اياقتادى. بەردىبەك ساپارباەۆ پرەزيدەنتتىڭ «Cىندارلى قوعامدىق ديالوگ – قازاقستاننىڭ تۇراقتىلىعى مەن وركەندەۋىنىڭ نەگىزى» جولداۋىندا جۇكتەلگەن مىندەتتەردىڭ ورىندالۋى تۋرالى ايتتى. ول مەملەكەت مۇقتاج ازاماتتاردى الەۋمەتتىك قولداۋ جۇمىستارىن كۇشەيتەتىنىن اتاپ ءوتتى.

سوڭعى جاڭالىقتار

ۇلتتىق كينوداعى كارانتين

ايماقتار • بۇگىن، 16:56

ۇقساس جاڭالىقتار