الايدا, زامان تالابىنا ساي كەز كەلگەن كەلۋشىنىڭ ءوز بەتىنشە ءوڭىر ءتۋريزمى تۋرالى اقپارات العانى دۇرىس. بۇل رەتتە جامبىل وبلىستىق تۋريزم باسقارماسىنىڭ تاپسىرىسىمەن ەلىمىزدە تۇڭعىش رەت ەلباسىنىڭ «رۋحاني جاڭعىرۋ» باعدارلاماسى مەن «جاستار جىلى» اياسىندا «تاراز – الماتى» جانە «تاراز – شىمكەنت» اۆتوجولدارىنىڭ كىرەبەرىس دوعالارىنا 88,8 FM راديوتولقىنى ورنالاستىرىلدى.
ەندى ەجەلگى تاراز شاھارىنىڭ باتىس جانە شىعىس قاقپالارىنا ورناتىلعان راديوتولقىننان كونە قالاعا كەلۋشى قوناقتار دا, تۋريستەر دە كولىكتە كەلە جاتىپ-اق ءوڭىر ءتۋريزمى تۋرالى بارلىق اقپاراتتى تىڭداي الادى. «اتالعان راديوتولقىندا قازاق, ورىس جانە اعىلشىن تىلدەرىندە تۋريستىك اقپاراتتىق اۋديوروليكتەر ترانسلياتسياسى ىسكە قوسىلعان. سونىمەن قاتار مۇندا ءوڭىردىڭ تۋريستىك الەۋەتىن ارتتىرۋ ماقساتىندا «تسيفرلى قازاقستان» باعدارلاماسىن جۇزەگە اسىراتىن «Taraz Tour» موبيلدىك قوسىمشاسى تۋرالى اقپارات تا تۇراقتى تۇردە بەرىلىپ تۇرادى», دەيدى باسقارما باسشىسى قارلىعاش ارالبەكوۆا.
اتالعان قوسىمشادا وڭىرگە كەلۋشى تۋريستەر مەن قوناقتارعا وبلىستاعى نەگىزگى 33 تاريحي-مادەني ورىن مەن قوناقۇيلەر, تاماقتانۋ كەشەندەرى مەن شيپاجايلار تۋرالى قازاق, ورىس, اعىلشىن, تۇرىك جانە قىتاي تىلدەرىندە اقپارات بەرىلەدى. وڭىرگە كەلۋشى بارلىق تۋريست بۇل رەتتە ءوز تاڭداۋىن جاسايدى. ال شەتەلدىك تۋريستەر سول قوسىمشاداعى سويلەۋ سوزدىگىمەن جانە ەكسكۋرسيالىق مارشرۋتتاردى قۇرىپ بەرەتىن ينتەراكتيۆتى كارتانى قولدانىپ, ءار نىساندا ورناتىلعان ارنايى QR-كودتاردى دا وزدەرىنىڭ ۇيالى تەلەفوندارىنا سكانەرلەي الادى. سول ارقىلى كەز كەلگەن تۋريست ارنايى ورناتىلعان اۋديوگيدتەن تولىققاندى اقپارات الۋىنا بولادى. ءبىر سوزبەن ايتقاندا, ءتىلى دە, تۇرمىسى دا بولەك شەتەلدىك تۋريستەر ءۇشىن تارازداعى بۇل باستاما بارلىق قاجەتتىلىك ءۇشىن قولجەتىمدى بولىپ تۇر.
جامبىل وبلىسى
