دەگەنمەن «اق التىننىڭ» باعاسى ماقتا شارۋاشىلىعىنداعى نەگىزگى ماسەلە بولىپ تۇر. بۇگىنگى تاڭدا ماقتاارال اۋدانىنداعى زاۋىتتار ماقتانىڭ تونناسىنا 100 مىڭ تەڭگەدەن اۆانس بەرۋدە. الايدا ءالى كۇنگە دەيىن ناقتى باعا بەكىتپەگەن. تۇركىستان وبلىسىنا كەلگەن اۋىل شارۋاشىلىعى ءمينيسترى ساپارحان وماروۆ پەن وبلىس اكىمى ومىرزاق شوكەەۆ ءدال وسى ماسەلەنى شەشۋ ماقساتىندا اتاكەنت كەنتىندەگى «قازاق ماقتا شارۋاشىلىعى عىلىمي-زەرتتەۋ ينستيتۋتى» جشس-ىندە اۋداننىڭ ماقتا وڭدەۋ زاۋىتتارىنىڭ باسشىلارى مەن اۋىل شارۋاشىلىعى تاۋارىن وندىرۋشىلەرمەن جيىن وتكىزدى. جيىن بارىسىندا وبلىس ەكونوميكاسىنىڭ ەڭ ماڭىزدى سالاسىنىڭ ءبىرى – ماقتا شارۋاشىلىعىنىڭ وزەكتى ماسەلەلەرى تالقىلانىپ, وبلىس اكىمدىگى تاراپىنان مينيسترلىككە ءتيىستى ۇسىنىستار ەنگىزىلدى. بۇل رەتتە, ساپارحان وماروۆ ۇسىنىستاردى قولدايتىندىعىن, الداعى ۋاقىتتا ۇكىمەت دەڭگەيىندە كوتەرىپ, وڭ شەشىمى تابىلاتىندىعىن ايتتى. ال, ومىرزاق شوكەەۆ ءشيتتى ماقتا باعاسى الداعى كۇندە تۇراقتايتىندىعىن, شارۋالاردىڭ سۇرانىستارى بويىنشا ءتيىمدى باعا بەكىتىلەتىنىن جەتكىزدى. ءوز كەزەگىندە زاۋىت باسشىلارى ماقتا باعاسىن بەكىتۋ ءۇشىن 3 كۇن مەرزىم سۇرادى.
سونداي-اق مينيستر ماقتاارال اۋىلدىق وكرۋگى, «اق التىن» ەلدى مەكەنىندەگى «اشم سەرۆيس-ورتالىعى» وندىرىستىك كووپەراتيۆىنىڭ ماقتا تەرىمى ناۋقانىمەن تانىستى. وندا بيىلعى جىلى 70 گەكتارعا ماقتانىڭ «م-4011» سورتىنان 25,0 تس/گا تۇسىمدىلىكپەن ءونىم الىنۋدا. بۇگىنگى تاڭدا 43 ادامدى جۇمىسپەن قامتىپ وتىرعان وندىرىستىك كووپەراتيۆى 58 اۋىل شارۋاشىلىعى تەحنيكاسىمەن جابدىقتالعان.
