ورتالىقتا ءوز ءىسىنىڭ شەبەرى, بىلىكتى اسكەري دارىگەرلەر مەن عالىمدار جۇمىس ىستەيدى. بۇگىنگى تاڭدا بۇل جەردە 50 قىزمەتكەر, 11 ساراپشى, 9 وقىتۋشى مەن جوعارى ساناتتى 6 دارىگەر قىزمەت ەتۋدە. ەكى قىزمەتكەر مەديتسينا عىلىمىنىڭ كانديداتى عالىم دارەجەسىن يەلەنسە, ءبىر PhD دارىگەر بار.
ورتالىق ازيادا تەڭدەسى جوق اسكەري مەديتسينا ورتالىعىنىڭ تاريحى 1969 جىلدىڭ 1 قاراشاسىندا الماتى قالاسىندا ورتاازيالىق اسكەري وكرۋگىنىڭ وكرۋگتىك سوت-مەديتسينالىق زەرتحاناسى قۇرىلعاندا باستالدى. قازاقستان تاۋەلسىزدىك العاننان كەيىن ونى قر قم ورتالىق مەديتسينالىق زەرتحاناسى دەپ اتادى. ال 2010 جىلى مەكەمە ءوزىنىڭ قازىرگى اتاۋىن الدى.
مەكەمە اسكەري مەديتسينا سالاسىندا قوسىمشا ءبىلىم بەرۋدى قامتاماسىز ەتەدى, بىلىكتىلىكتى ارتتىرۋ جانە كۋرستىق دايارلاۋ سالاسىنداعى ۇيىمداستىرۋ جانە وقۋ-ادىستەمەلىك جۇمىستارعا جاۋاپ بەرەدى, قارۋلى كۇشتەردىڭ مەديتسينالىق قۇرامىنا اسكەري-مەديتسينالىق دايارلىقتا, سوت-مەديتسينالىق, پاتولوگواناتوميالىق, حيميالىق-توكسيكولوگيالىق جانە گيستولوگيالىق زەرتتەۋلەر جۇرگىزۋدە ادىستەمەلىك جانە پراكتيكالىق كومەك كورسەتەدى. 2011 جىلدان باستاپ ونىڭ قۇرامىنا قازاقستان قارۋلى كۇشتەرى مەديتسيناسى قۇرامىنداعى ينتەرناتۋرا قوسىلدى.
بۇدان باسقا, ورتالىق ءىىد, ۇلتتىق ۇلان جانە قر ۇقك شەكارا قىزمەتىنىڭ اسكەري قىزمەتشىلەرىنە مەدەتسينالىق كومەك كورسەتۋدى ۇيرەتەدى.
