كاسپي وڭىرىندەگى زياتكەرلەر ورداسىنىڭ اعىلشىن ءتىلى ءپانى مۇعالىمى لاۋرا بايتوقاەۆا جانە جاھاندىق مۇمكىندىكتەر جانە جوبالىق جۇمىس ءپانى مۇعالىمى گۇلدەن سۋيۋندىكوۆا نازارباەۆ ۋنيۆەرسيتەتىنىڭ ماگيستراتۋراسىن اياقتاپ, ديپلومدارىن الدى.
- ەلىمىزدىڭ كوشباسشىلارىنا ساپالى ءبىلىم بەرۋ ءۇشىن, اقىلدىلار وزعان زاماندا وقۋشىلارىمىزعا ۇلگى بولۋ ءۇشىن زياتكەرلىك مەكتەپ مۇعالىمدەرىنە ارتىلار جۇك كوپ. ۇنەمى ءبىلىم شىڭداۋ, ىزدەنۋ, جاڭا ءادىس-تاسىلدەردى بايقاپ كورۋ جاڭا زامان مۇعالىمى ءۇشىن وتە ماڭىزدى. سول سەبەپتى دە وسىدان ەكى جىل بۇرىن ۋنيۆەرسيتەتكە قۇجاتتارىمدى تاپسىرىپ باعىمدى سىناپ كورگەن ەدىم. ءساتى ءتۇسىپ, وقۋعا ءتۇستىم. ءمودۋلدى وقۋ قىزمەتتەگى ۇستازدارعا وتە ءتيىمدى بولدى. ساباقتان جيعان ءبىلىمىمدى بىردەن تاجىريبەدە قولداندىم, دەيدى لاۋرا بايتوقاەۆا.
جاس پەداگوگتار الداعى ۋاقىتتا جوعارى ءبىلىم مەكتەبىندە ۇيرەنگەن بىلىممەن ارىپتەستەرىممەن ءبولىسۋدى, مۇعالىم بويىنداعى زەرتتەۋشىلىك داعدىلاردى قالىپتاستىرۋدى جانە سول ارقىلى ءبىلىم بەرۋ سالاسىنداعى وزەكتى ماسەلەلەردىڭ شەشۋ جولدارىن ارىپتەستەرىممەن بىرگە تابۋدى جوسپارلاپ وتىر.
- نازارباەۆ ۋنيۆەرسيتەتىندە وقىپ جۇرگەن كەزىمدە العان نەگىزگى داعدىلارىم - زەرتتەۋشىلىك جانە كوشباسشىلىق. بۇلار وقىتۋدىڭ زاماناۋي ادىستەرى مەن تەحنولوگيالارىن قولدانا وتىرىپ جاساقتالعان كۋرستار ارقىلى دامىتىلدى. ساباق بارىسىندا ءبىز ءارتۇرلى ساراپتامالىق ماقالالار جازىپ, شاعىن زەرتتەۋلەر جۇرگىزدىك. ولاردىڭ كوپشىلىگى تەك ءبىزدىڭ پروفەسسورلارىمىزعا عانا ەمەس, سونىمەن قاتار ءارتۇرلى ءبىلىم سالاسىنداعى كونفەرەنتسيالارىنىڭ كوميتەتتەرىنە دە ۇسىنىلىپ جوعارى باعالانعان ەدى, دەيدى گۇلدەن سۋيۋنديكوۆا.
ۇستازداردىڭ اعىلشىن تىلىندە ءبىلىمىن شىڭداپ, كاسىبي تۇرعىدان وسۋدە زياتكەرلىك مەكتەپتەردەگى ۇشتىلدىلىك ساياساتى ءتيىمدى بولعانىن ايتا كەتۋ كەرەك. ءپان مۇعالىمدەرىنىڭ اعىلشىن ءتىلىن جوعارى دەڭگەيدە مەڭگەرۋى قىزمەتتە كومەك بولىپ قانا قويماي, ەلىمىزدىڭ جەتەكشى ۋنيۆەرسيتەتتەرىندە تەگىن وقۋعا مۇمكىندىك بەرەدى. قازىرگى تاڭدا زياتكەرلىك مەكتەپتىڭ ەكى ۇستازى «بولاشاق» باعدارلاماسى بويىنشا انگليادا ءبىلىم ارتتىرسا, ەكى مۇعالىمى Yessenov University دوكتورانتۋراسىندا وقىپ ءجۇر.
