مەملەكەت باسشىسىنىڭ توراعالىعىمەن وتكەن الماتى قالاسىن الەۋمەتتىك-ەكونوميكالىق دامىتۋعا باعىتتالعان القالى كەڭەسكە بىرقاتار ۆەدومستۆو باسشىلارى مەن قالا اكتيۆى قاتىستى. تاريحى تەرەڭدە جاتقان قالا ەل ومىرىندەگى ەڭسەلى ساتتەردىڭ كۋاسى ءارى ازاتتىقتىڭ التىن بەسىگى ەكەنىن العا تارتقان پرەزيدەنت مادەنيەت پەن ەكونوميكانىڭ كۇرەتامىرىنا بالانعان كونە شاھاردى كوركەيتۋ باستى نازاردا ەكەنىن اتاپ ءوتتى.
– الماتى – تاۋەلسىز قازاقستاننىڭ ىرگەسى قالانعان قاستەرلى مەكەن. ءبارىمىز ءۇشىن بۇل شاھاردىڭ ورنى بولەك. مۇندا ەل تاعدىرىنا قاتىستى ماڭىزدى ءارى تاريحي شەشىمدەر قابىلداندى. اتا زاڭىمىز, مەملەكەتتىك رامىزدەر, ۇلتتىق ۆاليۋتامىز وسىندا بەكىتىلدى. بۇگىندە الماتى ءبىلىم, عىلىم, مادەنيەت جانە ىسكەرلىك ورتالىعى رەتىندە دامىپ كەلەدى. سوڭعى جىلدارى قالاعا جاڭا اۋماقتار قوسىلىپ, كولەمى 2 ەسەگە ۇلعايدى. حالقىنىڭ سانى 20 پايىزعا ءوسىپ, ءبىر ميلليون سەگىز ءجۇز مىڭ ادامعا جەتتى. قالادا باسقا وڭىرلەردەن كەلگەن جانە وسى توڭىرەكتە تۇراتىن جارتى ميلليونعا جۋىق ادام جۇمىسپەن قامتىلىپ وتىر. قازىر الماتىدا بانكتەردىڭ, حالىقارالىق ۇيىمدار مەن ترانسۇلتتىق كومپانيالاردىڭ باس كەڭسەلەرى ورنالاسقان. وسىندا اشىلعان بىرىككەن ۇلتتار ۇيىمىنىڭ 17 مەكەمەسىنىڭ وكىلدىكتەرى ورتالىق ازيانىڭ وڭىرلىك حابىنا اينالىپ وتىر. قالانىڭ ەكونوميكالىق, الەۋمەتتىك, ەكولوگيالىق ماسەلەلەرىنە قاتىستى اۋقىمدى جۇمىس جۇرگىزىلدى. الداعى ۋاقىتتا بۇل باستامالار جالعاسىن تابۋى ءتيىس, – دەدى قازاقستان پرەزيدەنتى.
سونىمەن قاتار مەملەكەت باسشىسى بۇگىندە دۇنيە جۇزىندەگى 600 قالالىق اگلومەراتسيا الەمدىك ىشكى جالپى ءونىمنىڭ ۇشتەن ەكىسىن ءوندىرىپ وتىرعاندىعىن, بۇل رەتتە ءبىزدىڭ ىرگەلى قالالارىمىز دا ۇلتتىق ەكونوميكانى دامىتۋعا اۋقىمدى ۇلەس قوسۋعا ءتيىس ەكەنىن باسا ايتتى.
– بۇگىنگى تاڭدا ەلىمىزدىڭ ىشكى جالپى ءونىمىنىڭ ۇشتەن ءبىرى الماتى جانە نۇر-سۇلتان قالالارىنا تيەسىلى. الماتى تاۋەلسىزدىك جىلدارى ءىرى ەكونوميكالىق ورتالىققا جانە رەسپۋبليكالىق بيۋدجەتتىڭ دونورىنا اينالدى. شاھار ىشكى جالپى ءونىمنىڭ بەستەن ءبىرىن, مەملەكەتتىك بيۋدجەتكە تۇسەتىن ءتۇسىمنىڭ 20 پايىزدان استامىن جانە بانكتەر بەرەتىن نەسيەنىڭ 60 پايىزىن قامتاماسىز ەتىپ وتىر. سونداي-اق ەلىمىزدەگى كوتەرمە جانە بولشەك ساۋدانىڭ 40 پايىزدان استامى, سىرتقى ساۋدا اينالىمىنىڭ 15 پايىزعا جۋىعى وسى قالادا جۇرگىزىلەدى, – دەدى قاسىم-جومارت توقاەۆ.
الماتىنى دامىتۋعا باعىتتالعان كەڭەستە قاسىم-جومارت توقاەۆ, دەگەنمەن بۇل ساندارمەن ماساتتانۋدىڭ ەش قاجەتى جوق ەكەنىن, ميلليوندار توعىسقان مەگاپوليستە ءالى كۇنگە دەيىن وڭتايلى شەشىمىن تابا الماي كەلە جاتقان وزەكتى پروبلەمالار بارىن العا تارتتى. بۇل رەتتە پرەزيدەنت قالا اكىمىنە كوپتەن بەرى كوكەيدە جۇرگەن كولىك كەپتەلىسى, تۇرعىنداردى الاڭداتقان ەكولوگيالىق احۋال, ءبىلىم مەن دەنساۋلىق سالالارىنداعى شيكىلىكتەردى ءبىرىنشى كەزەكتە جولعا قويۋدى تاپسىردى. اسىرەسە اپاتتى جاعدايداعى مەكتەپتەردى انىقتاپ, رەتكە كەلتىرۋ, بالاباقشا جەتىسپەۋشىلىگى ماسەلەسىنە نۇكتە قويۋ, تۋريستەر ءۇشىن ءتيىمدى جاعداي جاساۋ, قالا اۋماعىنا كەيىننەن قوسىلعان الاتاۋ, ناۋرىزباي اۋداندارىنداعى حالىقتىڭ ينفراقۇرىلىمدىق قاجەتتىلىكتەرىن قاناعاتتاندىرۋدى جۇكتەدى. بۇل رەتتە, كۇن ساناپ اۋماعى ءوسىپ كەلە جاتقان الىپ مەگاپوليستەگى مادەني نىسانداردىڭ سانى مەن ساپاسىن ارتتىرۋ جايى دا نازاردان تىس قالعان جوق.
– كەيىنگى جىلدارى كولىك ينفراقۇرىلىمىن دامىتۋ ءۇشىن كوپ جۇمىس اتقارىلعانى ءمالىم. الايدا, بىرقاتار كۇردەلى ماسەلەلەر دە جوق ەمەس. كۇن سايىن 700 مىڭعا جۋىق اۆتوكولىك قالا كوشەلەرىمەن جۇرەدى. ميلليوننان استام ادام تاسىمالدانادى. ءار كۇنى قالاعا 200 مىڭنان استام اۆتوكولىك قاسكەلەڭ, قاپشاعاي, تالعار جانە قۇلجا تاس جولدارى ارقىلى كىرەدى. بۇل الماتىنىڭ كىرەبەرىسىندە, تاڭەرتەڭگى جانە كەشكى ۋاقىتتاردا كەپتەلىس تۋدىرادى. اتالعان پروبلەما جولداردى قايتا قۇرۋ جانە كەڭەيتۋ ارقىلى عانا ەمەس, سونىمەن قاتار پەرسپەكتيۆالى كولىكتى دامىتۋ ارقىلى شەشىلۋى ءتيىس. مەترو جەلىلەرىنىڭ سانىن ارتتىرۋ قاجەت. سونداي-اق قالاعا جاقىن اۋدانداردى بايلانىستىراتىن قوعامدىق كولىكتى دامىتۋ كەرەك. قوعامدىق كولىك جولاۋشىلارىنا ىڭعايلى بولۋ ءۇشىن ايالدامالارعا اقپارات تاقتالارىن ورناتۋ ماڭىزدى, سونىمەن قاتار سمارتفوندارعا ارنالعان قوسىمشالار ازىرلەۋ قاجەت, – دەدى بۇل باعىتتاعى باستامالار جاڭا زاماناۋي كولىك big data سمارت-اقىلدى تەحنولوگيالارى نەگىزىندە قۇرىلۋى كەرەكتىگىن اتاپ وتكەن پرەزيدەنت.
شاھاردا ءالى دە جارىقتاندىرىلماعان كوشەلەر بار ەكەنىن, ارىق جۇيەسىن جەتىلدىرۋ ءىسىن ءجىتى قولعا الۋ كەرەكتىگىن ءسوز ەتكەن مەملەكەت باسشىسى, سونداي-اق «ىلە الاتاۋى» ۇلتتىق پاركى اۋماعىنداعى جەكە تۇلعالارعا زاڭسىز بەرىلگەن جەر تەلىمدەرىن انىقتاپ, الما باقتاردى ورىنسىز وتاعاندارعا ءتيىستى شارا قولدانۋدى مىندەتتەدى.
– مۇندايعا جول بەرىلمەۋى كەرەك. وكىنىشكە قاراي, بۇل ءتيىستى ورگانداردىڭ سالعىرتتىعى سالدارىنان بولىپ وتىر. ىلە الاتاۋىنىڭ بوكتەرىندە الما باقتارىن ساقتاۋ جانە ءوسىرۋ ماسەلەسى ەرەكشە باقىلاۋعا الىنۋى كەرەك. بۇل – الماتى قالاسى مەن بۇكىل قازاقستاننىڭ يگىلىگى. قالا ماڭىنداعى تابيعاتتى قورعاۋ ايماقتارىنا تۇگەندەۋ جۇرگىزىپ, ولاردى پايدالانۋدىڭ قاتاڭ راسىمدەرىن بەلگىلەۋ قاجەت. اكىمدىك قالانى كوگالداندىرۋ جانە اتى اڭىزعا اينالعان الماتى اپورتىن قالپىنا كەلتىرۋ جۇمىستارىن جانداندىرۋى ءتيىس. ايگىلى بوتانيكالىق باقتى – قالامىزدىڭ وزىندىك سيمۆولىن قالپىنا كەلتىرۋ قاجەت, – دەدى پرەزيدەنت.
وكىنىشكە قاراي, ەل اۋماعىندا الماتى قىلمىس سانى بويىنشا كوش باستاپ تۇرعانىنا توقتالعان پرەزيدەنت بۇل پروبلەمانى تەز ارادا ەڭسەرۋ كەرەكتىگىن ايتىپ, كولىك ايناسىن ۇرلاماق بولعان قىلمىسكەرلەردىڭ قولىنان قازا تاپقان دەنيس تەننىڭ ءولىمىن مىسالعا كەلتىردى. «سىن تۇزەلمەي ءمىن تۇزەلمەيدى». مۇنداي سالعىرتتىققا جول بەرىلمەۋى كەرەك. الماتىنى قاۋىپسىز قالاعا اينالدىرۋ باستى نازاردا», – دەگەن قاسىم-جومارت توقاەۆ الماتى جاستاردىڭ قالاسى ەكەنىن ايتا كەلىپ, ستۋدەنتتەر ءۇشىن جاتاقحانا تاپشىلىعى ماسەلەسىن تۇبەگەيلى رەتتەۋدى تاپسىردى.
پرەزيدەنت بيزنەس پەن يننوۆاتسيانى دامىتۋ ەسەبىنەن قالا ەكونوميكاسىنىڭ جوعارى ءوسىمىن قامتاماسىز ەتۋدىڭ ماڭىزدىلىعىن باستى مىندەت رەتىندە ايتتى. اتالعان باعىت بويىنشا قالاداعى اتقارىلعان جۇمىستارعا توقتالعان مەملەكەت باسشىسى قالانىڭ يندۋستريالىق ايماعىندا 33 كومپانيا تىركەلگەنىن جانە 156 ميلليارد تەڭگەدەن استام ينۆەستيتسيا سالىنعانىن مىسالعا كەلتىردى. پرەزيدەنت اتالعان ايماق قۇرىلعان 7 جىل ىشىندە نەبارى 6 جاڭا كاسىپورىن ىسكە قوسىلعانىنا, بيىل تەك 1 شاعىن زاۋىت قانا جۇمىس ىستەي باستاعانىنا نازار اۋداردى.
وسىعان وراي قاسىم-جومارت توقاەۆ قالا اكىمىنە يندۋستريالىق ايماققا, اسىرەسە جوعارى تەحنولوگيالىق جانە ەكسپورتقا بەيىمدەلگەن جاڭا جوبالار تارتۋعا كەڭەس بەردى. يننوۆاتسيانى دامىتۋدىڭ جانە تىڭ جوبالاردى ەنگىزۋدىڭ ماڭىزدىلىعىنا توقتالىپ, قالادا جەتەكشى ۋنيۆەرسيتەتتەر شوعىرلانعانىن جانە عىلىمي ءارى كادرلىق الەۋەتى جاقسى ەكەنىن اتاپ ءوتتى. بۇل رەتتە ول وسى سالادا ماڭىزدى ازىرلەمەلەردىڭ جوعىنا نازار اۋدارىپ, الماتىداعى «يننوۆاتسيالىق تەحنولوگيالار پاركى» ارنايى ەكونوميكالىق ايماقتىڭ الەۋەتىن پايدالانۋدى تاپسىردى.
قازاقستان پرەزيدەنتى قالاداعى بيزنەس احۋالدى جاقسارتۋ جانە ونىڭ ينۆەستيتسيالىق تارتىمدىلىعىن ارتتىرۋ جونىندەگى جۇمىستاردى جانداندىرۋ, شاعىن جانە ورتا بيزنەستىڭ دامۋىنا كەدەرگى كەلتىرەتىن پروبلەمالاردى شەشۋدىڭ ماڭىزدىلىعىن اتاپ ءوتتى.
– كاسىپكەرلەر اراسىندا جۇرگىزىلگەن ساۋالداما ناتيجەسىندە كوپتەگەن كورسەتكىشتەر بويىنشا قالا جەرگىلىكتى اتقارۋشى ورگاندار جۇمىسىنىڭ تيىمدىلىگى, سىبايلاس جەمقورلىقتى ازايتۋ, تەكسەرۋلەردىڭ نەگىزدىلىگى جونىنەن ارتتا قالىپ كەلەدى. شاعىن جانە ورتا بيزنەسكە جان-جاقتى قولداۋ كورسەتۋ, ءتۇرلى كەدەرگىلەردى الىپ تاستاۋ مىندەتى قالا اكىمدىگىنىڭ موينىندا قالا بەرەدى. الماتى ەلىمىزدىڭ باستى ىسكەرلىك ورتالىعى مارتەبەسىن ساقتاۋى ءتيىس, – دەدى پرەزيدەنت.
سونداي-اق قالانىڭ تاريحي-سيمۆوليكالىق مۇراسىنا بالاناتىن ترامۆاي جولدارىنىڭ سۇرىلگەنىن سىنعا العان قاسىم-جومارت توقاەۆ كوپتەن تالقىلانىپ كەلگەن «كوكجايلاۋ» جوباسىنان تولىققاندى باس تارتۋدى تاپسىردى.
پرەزيدەنت باسا نازار اۋدارعان تاعى ءبىر ماسەلە – الماتىنى ساياحاتشىلار ءۇشىن تارتىمدى قالاعا اينالدىرۋ. وسى ماقساتتا شەتەلدىكتەرگە جەرگىلىكتى كوشى-قون ورگاندارىنا تىركەلۋ ءراسىمىن الىپ تاستاۋ ۇسىنىلدى. ال قالاعا ەلەكتر قۋاتىمەن جۇرەتىن اۆتوبۋستاردى كەدەندىك تولەمدەرسىز اكەلۋ قاجەتتىگى اتاپ ءوتىلدى. ەكولوگيالىق پروبلەمالاردى وڭتايلاندىرۋ ماقساتىندا قالادا قوقىس وڭدەيتىن زاۋىتتار سالۋدى جۇكتەدى.
باسقوسۋ بارىسىندا بيىلعى جىلدىڭ 9 ايىنداعى دامۋدىڭ نەگىزگى ناتيجەلەرىنە جانە كۇن تارتىبىندە تۇرعان ءتۇيىندى ماسەلەلەرگە توقتالعان الماتى قالاسىنىڭ اكىمى باقىتجان ساعىنتاەۆ اتقارىلعان شارۋالار تۋرالى باياندادى. اكىمنىڭ ايتۋىنشا, سوڭعى كورسەتكىشتەر الەۋمەتتىك-ەكونوميكالىق دامۋدىڭ وڭ ديناميكاسىن كورسەتىپ وتىر. العاشقى جارتىجىلدىقتا جالپى وڭىرلىك ءونىمنىڭ ءوسىمى 4,1%-دى قۇراعان. بۇل رەتتە قالانىڭ ونەركاسىپ سالاسى 5,9%-عا, ينۆەستيتسيا – 5,5%-عا, قۇرىلىس – 3,1%-عا, تۇرعىن ءۇيدى پايدالانۋعا بەرۋ 2,8%-عا وسكەن.
ينفلياتسيا 3,3%-دان اسپايدى. جۇمىسسىزدىق دەڭگەيى 5,1%-عا دەيىن تومەندەدى. جىل باسىنان بەرى 29,2 مىڭ جاڭا جۇمىس ورنى اشىلدى. سالىقتىق اكىمشىلەندىرۋدى جاقسارتۋ ەسەبىنەن مەملەكەتتىك بيۋدجەتكە تۇسەتىن سالىق وتكەن جىلعا قاراعاندا 12,4%-عا كوپ جينالدى, – دەدى باقىتجان ساعىنتاەۆ.
ءوز كەزەگىندە باقىتجان ساعىنتاەۆ ەكولوگيا ماسەلەسى بارشا قالا تۇرعىندارىن الاڭداتىپ وتىرعانىن اتاپ ءوتتى. «2018 جىلى قورشاعان ورتاعا شىعارىلعان زياندى زاتتاردىڭ جالپى كولەمى 123 مىڭ توننانى قۇرادى, ونىڭ ىشىندە جەو-2 ۇلەسى 27% بولدى. قازىرگى ۋاقىتتا «سامۇرىق-ەنەرگو» اق قولدانىستاعى ستانسانى گازعا اۋىستىرۋدى كوزدەيتىن تەحنيكالىق-ەكونوميكالىق نەگىزدەمە ازىرلەۋدە. جوبانى ىسكە اسىرۋ ارقىلى اتموسفەراداعى زياندى شىعارىندىلاردىڭ ۇلەسىن 17 ەسە ازايتۋعا مۇمكىندىك بار. وسى جوبانىڭ الەۋمەتتىك ماڭىزىن ەسكەرە وتىرىپ, «سامۇرىق-قازىناعا» سايكەس قۇجاتتامالار ازىرلەنىپ بولعان سوڭ بارلىق پروتسەدۋرالاردى تەزدەتۋدى تاپسىرۋىڭىزدى سۇرايمىن», – دەدى ب. ساعىنتاەۆ.
الماتىنىڭ وتكەنى مەن بۇگىنى, الداعى دامۋ جوسپارى كەڭىنەن تالقىلانعان كەڭەستە قازاقستان پرەزيدەنتىنىڭ كومەكشىسى ايدا بالاەۆا, پرەمەر-ءمينيستردىڭ ورىنباسارى – قارجى ءمينيسترى ءاليحان سمايىلوۆ, يندۋستريا جانە ينفراقۇرىلىمدىق دامۋ ءمينيسترى بەيبىت اتامقۇلوۆ باستاعان بىرقاتار ۆەدومستۆو باسشىلارى الماتىنىڭ بۇگىنگى احۋالى مەن الداعى دامۋىنا قاتىستى ءوز ۇسىنىستارىن ورتاعا سالدى.
الماتى قالاسىنىڭ اكىمى باقىتجان ساعىنتاەۆ مەملەكەت باسشىسى قاسىم-جومارت توقاەۆقا «الماتى – 2050» دامۋ ستراتەگياسىنىڭ جوباسىن تانىستىردى. اتالعان باعدارلاما بويىنشا الماتى قالاسىن الەۋمەتتىك-ەكونوميكالىق تۇرعىدان دامىتۋ, ينۆەستيتسيا تارتۋ, جاڭا جۇمىس ورىندارىن اشۋ, تۇرعىنداردىڭ تۇرمىسىن جاقسارتۋ, قاۋىپسىز قالا قالىپتاستىرۋ, شاھاردىڭ شەتكەرى ايماقتارىنىڭ ينفراقۇرىلىمىن دامىتۋ جانە باسقا دا كوپتەگەن ماڭىزدى ماسەلەلەر اتقارىلادى. سونداي-اق جوبادا الماتى اگلومەراتسياسى اۋماعىنىڭ دامۋ بارىسى دا قاراستىرىلعان.
شارا شەڭبەرىندە قاسىم-جومارت توقاەۆ باسپانا كەزەگىندە تۇرعان, اسىراۋشىسى جوق 12 بالاعا پاتەر كىلتىن تابىس ەتتى.
– بارشاڭىزعا جاڭا قونىستارىڭىز قۇتتى بولسىن! باسپانا ماسەلەسى ءاردايىم مەملەكەتتىڭ نازارىندا بولادى. ەڭبەكتەرىڭىز تابىستى بولسىن! – دەدى پاتەر يەلەرىن قۇتتىقتاعان مەملەكەت باسشىسى.
سونىمەن قاتار الماتىعا جۇمىس ساپارى اياسىندا پرەزيدەنت «Tech Garden» يننوۆاتسيالىق كلاستەر ورتالىعىنىڭ جۇمىسىمەن تانىستى. وندا مەملەكەت باسشىسىنا يننوۆاتسيالىق كلاستەر ورتالىعىندا ورنالاسقان 4 تەحنولوگيالىق لابوراتوريا, 50-دەن اسا IT كومپانيالار مەن بىرقاتار ستارتاپ جوبالار تۋرالى جان-جاقتى اقپارات بەرىلدى.
يننوۆاتسيالىق كلاستەردىڭ جۇمىسىنا 284 ۇيىم بىرىكتىرىلگەن. ولاردىڭ قاتارىندا 23 جوعارى وقۋ ورنى, 25 عىلىمي-زەرتتەۋ ورتالىعى, 2 تەحنوپارك,
1 دامۋ ينستيتۋتى, «يننوۆاتسيالىق تەحنولوگيالار پاركى» ارنايى ەكونوميكالىق ايماعىنا قاراستى 166 كومپانيا, 1 بىرلەسكەن ينۆەستيتسيالىق قور جانە 66 ۇيىم بار. مەملەكەت باسشىسى Tech Garden ورتالىعىنىڭ جۇمىسىن جوعارى باعالاپ, الداعى باستامالارىنا ساتتىلىك تىلەدى.
مەملەكەت باسشىسى شاھارداعى «مۇگەدەك بالالار اتا-انالارىنىڭ اسسوتسياتسياسى» قوعامدىق بىرلەستىگىنىڭ بستسا بالالارعا ارنالعان بەلسەندى وڭالتۋ جانە ەرتە جاستان قولداۋ ورتالىعىنا بارىپ, ارناۋلى ماماندارمەن اڭگىمەلەستى. وندا پرەزيدەنتكە بستسا-مەن ناۋقاستانعان بالالاردى كوپجاقتى وڭالتۋعا جانە جان-جاقتى الەۋمەتتىك تۇرعىدان جەتىلدىرۋگە باعىتتالعان قاناتقاقتى جوبانىڭ جۇزەگە اسىرىلۋ بارىسى باياندالدى. سوڭىندا مەملەكەت باسشىسى ورتالىققا ارنايى جابدىقتالعان شاعىن اۆتوبۋس تارتۋ ەتتى.
مەملەكەت باسشىسىنا الماتى قالاسىنداعى «ينۆەستيتسيا ءۇيىنىڭ» نەگىزگى قىزمەتتەرى جايىندا مالىمەت بەرىلدى.
قازاقستان پرەزيدەنتىنە كاسىپكەرلىكتى قولداۋعا ارنالعان «Qoldaý» ورتالىعىنىڭ, «Almaty Finance», «Almaty» ميكروقارجى ۇيىمدارىنىڭ بيزنەستى وركەندەتۋ باعىتىندا اتقارىپ جاتقان جۇمىستارى تۋرالى باياندالدى.
كاسىپكەرلىكتى دامىتۋعا باعىتتالعان ورتالىقتاردى ارالاپ كورگەن پرەزيدەنت قاسىم-جومارت توقاەۆ قولعا الىنعان باستامالاردىڭ تابىستى جۇزەگە اسىرىلۋىنا تىلەكتەستىك ءبىلدىردى.
مەملەكەت باسشىسى ءال-فارابي اتىنداعى قازاق ۇلتتىق ۋنيۆەرسيتەتىنە باردى. وندا قاسىم-جومارت توقاەۆ جاعداياتتىق باسقارۋ ورتالىعىنىڭ جۇمىسىمەن, جوعارى وقۋ ورنىنىڭ تسيفرلى تەحنولوگيانى ەنگىزۋ جونىندەگى جەتىستىكتەرىمەن, سونداي-اق بيزنەس-قۇزىرەتتىلىكتى دامىتۋ كلاستەرىمەن تانىستى.
مەملەكەت باسشىسى ستۋدەنتتىك كامپۋس اۋماعىندا ورنالاسقان «كەرەمەت» قىزمەت كورسەتۋ ورتالىعىن ارالاپ كوردى. بۇل ورتالىق ء«بىر تەرەزە» قاعيداتى بويىنشا ستۋدەنتتەر مەن وقىتۋشىلارعا 500-دەن استام قىزمەت تۇرلەرىن ۇسىنادى.
ايتا كەتەيىك, جۇمىس ساپارىنىڭ ەكىنشى كۇنى مەملەكەت باسشىسى قاسىم-جومارت توقاەۆ الماتىداعى رەزيدەنتسياسىندا بىرقاتار كەزدەسۋلەر وتكىزەدى دەپ جوسپارلانعان.
الماتى
